Ralhrang ralkap nih an hlanmi Lobby le BBC Interview

Ralhrang ralkap nih an hlanmi Lobby le BBC Interview
========================
Hranhraam in mipi nawl ngeihnak a chuttu ralhrang ralkap nih $ 2000000 pek in an hlanmi Lobby nih BBC he interview an ngeihnak ah a tanglei bantukin a chim.

Ralkap nih a rauh hlanah ram mi dihlak nih vote pe kho dingin a dikmi le a felfaimi rampi thimnak tu kum chungah an tuah ko lai tiah ai ruahchannak kong a chim. Rampi thimnak tuah tikah NLD zong a duhmi nih cun thim khawh an si ve ko lai tiah an ti. Atu lio ah meithal in mipi a kap cuahmah i a that cuahmahmi hna hi palik (Police) an si. Kanmah ralkap kan si lo tiah an chim. Atu bantukin mipi an kah an thahmi hna zong hi rampi a daih khawh nakhnga le ram chung mipi dai tein an um khawh nakhnga an tuahmi a si tiah ralkap nih an chim.

1988 rampi a rak buai lio ah khan ralkap nih an rak kah hna ruangah a thimi minung 200 renglo an si tiah an timi hi an tam tuk. Hi zatzah an si lo tiah ralkap nih an chimmi a dik le dik lo cu ka hngal ve lo tiah a ti. 2020 rampi thimnak tuah lio ah khan a diklo ningin vote thlak hi rak um hlah seh law NLD party nih vote 15%-20% hrawng lawng an hmuh ko hnga tiah ralkap nih an ti.

Rakhine ramkulh ah a ummi Rohingya miphun ralkap nih kan rak thahmi hna tham cu Daw Aung San Su Kyi nawl peknak in kan thahmi hna an si. Daw Aung San Su Kyi nih that hna u tiah nawl a kan pekmi a si tiah an chim. Daw Aung San Su Kyi cu miphun thleidannak fak piin a ngeimi a si i muslim pawl hi a hua taktakmi a si. Cucaah cun 1990 lio te khan Daw Aung San Su Kyi nih rampi hruaitu dingah amah kut cungah nawl ngeihnak pek lo dingin ralkap sinah ruahnak a rak kan pek cang. Asinain kannih ralkap nih cun mah bantuk cu a țha lo kan ti i ruahnak a kan pekmi cu kan cohlang duh lo. Cucaah rampi ruahnak petu ah kan thim țhiamțhiam tiah an ti. Ralkap nih mi zei cung hmanh ah thleidannak, miphun thleidannak timi kan ngei lo.

Daw Aung San Su Kyi a fapa sinah Taluk (China) nih tangka tampi an pek. Cu kong he pehtlai in tehte zong țha tein kan ngei. A rauh hlan ah thil sing vialte kan langhter zau lai tiah an chim. Atu lio ram hruaitu ralkap cozah nih a rauh hlanah ram kip thawng latu, media kan auh hna lai i, thil sining vialte a dikthliar in chimphuannak kan tuah lai,” tiah an chim a ti. Credit: Biak Lian Thawng