Ralhrang Ralbawi Lt. Col. Ye Lin Aung nih Minung 9 bak a tlaih hna!

USDP Party A Soiseltu Minung 9 Cu PDF Nan Si Tiin Ralbawi Lt. Col. Ye Lin Aung Nih A Tlaih Hna!
=======
Mandalay ramṭhen, Mahlaing(မလှိုင်) peng Hpucuai(ဖိုးကြွယ်) khuami Lt. Col. Ye Lin Aung cu Kachin ramkulh, Moemauk peng ah SAC ralkap battalion 142 hruai in a kal i, Mahlaing peng USDP party a soiseltu minung 9 cu ‘PDF nan si’ tiin ralkap a tlaihter hna i, an inn zong a hrenhpiak hna, tiah theih a si.

“Mahlaing khua cu USDP party an tam tuknak a si. Mahlaing khuami Ye Lin Aung hi misual taktak a si fawn. Taungyutey(တောင်ရိုးတဲ ) khuami 9 cu PDF an si, tiah Ye Lin Aung nih Meikhtilar( မိထ္ထီလာ) um SAC ralkap pawl a tlaihter hna,” tiah tualchung mi hna nih cun an chim.

Taungyutey khuami 9 cu PDF an si tiin a puh hna pin ah thimnak(election) ngeih lio ah khan USDP party ah vote an pek lo caah a tlaih hna, Mahlaing peng cu USDP party hmunram siseh tiin Ye Lin Aung nih a chim, tiah theih a si. Lt. Colonel Ye Lin Aung cu a nupi San San Naing le a fanu Tun Suh Aung he Kachin ramkulh, Dawhpung Yan khua ah a ummi an si, tiah theih a si.

Myawaddy-Kawkareik Kahdohnak Ah SAC Ralkap 2 An Thi. Myawaddy-Kaekareik Asia lampi ah SAC ralkap cu Black leopard le KNLA i bawm in an kah hna caah SAC ralkap lamhruaitu telh in ralkap 2 an thi, tiah Black leopard nih cathanh an chuah. Nizan September 6 zinglei ah Tatma 22 kuttang Khah Lah Ya 81 lamhruaitu le ralkap 1 an thi i, ralkap 1 hliamhma faak a pu. Black leopard le KNLA lei in a thimi le aa hliammi kan um lo, tiah an langhter.

Cu kahdohnak ah cun SAC ralkap nih pawngkam khuate hna cu hriamngan 120mm in an kah hna i, Htimuhta(ထီးမူးထ) khua chung ah hriamngan kuan lung 3 a tlak caah khuami 1 aa hliam i, caw 1 zong a thi, tiah theih a si.

Mizoram Palik Nih Myanmar Mi Laldika, Khawmawi Khua Sin In Ritsii Tlang Tam Ngai An Tlaih!: Nizan September 6 zanlei ah khan Aizawl khuapi palik nih rithaisii kong biathli an theih mi cu pehzulh in an dawi i, Myanmar mi, India-Myanmar ramri Khuamawi khua, Laldika(kum 52) sin in rithaisii songkhoi 38 ah chiah mi (songkhoi khat ah tlang 10,000) Methamphetamine tlang 3,80,000 cu an tlaih. Ritsii tlang hi India phaisa in Rs. 95,000,000(nuai 95) man a si.

Hi ritsii tlang pawl hi Laldinsanga(kum 37) Armed Veng, Aizawl nih lakphakti dawr khan a hlan mi ah hmuh a si. Dawr ngeitu Laldinsanga zong palik nih an tlaih colh. Aizawl palik nih cun case No. 670/22, section21(c), Narcotic Drugs and Psychotropic Substances Act le Foreigner Act in case an ser i, hlathlainak an tuah cuahmah lio a si.

Mizoram palik nih cun, “Rithaisii dohnak kong ah hin kan tha kan thlah lai lo. Mizoram ah rithaisii tlawmter kan timhnak kong ah hin mi vialte kar hlang cio ding in kan in sawm hna” tiah anmah social media ah an taar.

KIA Battalion 9 Sakhan Cu SAC Ralkap Nih Vanlawng In An Kah! Shan Chak lei KIA battalion 9 Kawng Sak Bum sakhan cu nihin zing in zaanlei tiang vanlawng 2 hmang in fak ngai in SAC ralkap nih bomb an thlak, tiah theih a si. Nihin zing suimilam 8 hrawng in chun suimilam 12 tiang Jet vanlawng in voi 10 bomb an thlak, cu hnu ah zaanlei suimilam 3 hrawng ah Helicopter pakhat in an kah ṭhan, tiah tualchungmi pakhat nih a chim.

Bomb thlaknak ruang ah phone line zong an phih dih nain atu ah cun a ngah ṭhan cang, Jet vanlawng in an kah chel, Helicopter in an kah chel a si. cupinah Nanphetka (နမ်ဖက်ကာ) khua in hriamngan in an kah rih, tiah Nanphetka khuami pakhat nih a chim.

Demoso Ah SAC Ralkap Nih Sianginn Pakhat An Kah I, PDF Nih Tualchungmi Bomb Khor An Cawhter Hna!: Kahdohnak a um lo nain, SAC ralkap nih drone hmang in Demoso tualchung mi hna cu an kah hna caah Sianginn le rianṭuantu hna umnak inn an rawk, tiah Demoso tualchung hriamtlai phu DMO Local PDF nih cathanh an chuah.

Nihin September 7, zinglei suimilam 1:45 hrawng ah Ngwaytaung(ငွေတောင်) hrambunh khah-lah-yiah 102 battalion nih drone hmang in Demoso sianginn lei ah bomh lung 6 hrawng an kah, tiah an langhter.

Cucaah Demoso peng chung um mipi hna le ralzaam mi hna nih mah le umnak ah bomb khor i cawh cio ding in le hriamngan puah thawng, raltuknak vanlawng thawng an theih tikah bomb khorchung ah hmunhma khuar colh ding in PDF nih mipi thawng an thanh hna.

Sagaing Ramṭhen, Butalin Peng Inn A Khangtu SAC Ralkap 20 Hrawng Cu Bomb Puahnak In An Thi! Sagaing ramthen, Butalin peng, Dwintaung khua cu nizaan September 6 ah SAC ralkap nih an khangh i, an kirlei ah bomb kan puahhnawh hna, tiah Chindwin Brothers PDF nih nizaan September 6 ah an thanh.

Dwintaung khua in an kirlei ah SAC ralkap 80 cu Laymay(လေးမြေ) khua le Ngaingthumya(ညောင်သူများ) khua karah ah bomb kan puahhnawh hna. Cu bomb puahnak ah cun SAC ralkap 20 an thi i, 5 faak ngai in hliam an tuar. SAC nih hriamngan le hriamhme hmang in an kan kah ve nain kanmah lei hliamtuar um lo tein hnu kan tolh kho, tiah Chindwin Brothers PDF in ṭuanvo ngeitu nih a chim.

Cu kahdohnak ah cun Chindwin Brothers PDF, Daung Generation, Bu Lah Mauk Seik (ဗိုလ်လမုတ်ဆိတ်) le Royal Diamond hna an i bawm, tiah theih a si.

Myinkin Peng Kungmaw Khua Ah PDF Ralkap 2 Thah An Tong, Tualchung Mi 2 SAC Ralkap Nih An Kah Hna: Sagaing ramṭhen, Myinkin peng Kungmaw(ကုန်းမော်) khua cu September 3 ah SAC ralkap nih an luhnawh i, PDF ralkap 2 an thah hna pinah tualchung mi 2 zong meithal in an kah hna, tiah Myinkin PDF nih an thanh.

Thah a tong mi PDF ralkap Mya Din, kum 35 le Soe Min, kum 25 cu meithal in an kah thah hna pinah an tuk, an velh hnanak hma a um, tiah theih a si.

“SAC ralkap pawl cu Kungmaw khua lei in rallam an sial i, khuami 10 leng an tlaih hna. Saihthar(ဆိတ်သာ) khua an phak ah an tlaih ṭhan hna. SAC ralkap nih an duhmi thilri vialte cu an i laak dih. PDF ralkap 2 ruak cu Saihthar khua ah kan hmuh hna. September 6 ah an ruak cu an vui hna,” tiah PDF an langhter.

SAC ralkap le Pyusawhti 100 hrawng cu Myinkin peng ah rallam an sial i, Kani peng lei ah an kal. Myinkin peng cu SAC ralkap nih internet le phone line an phih, tiah tualchung mi hna nih an chim. Nizan September 6 ah Tatchaung(တပ်ချောင်း) khua pawng ah umhmun a khuarmi SAC ralkap pawl cu Myinkin peng PDF nih hriamngan in an kah hna caah ralkap a thimi an um kho, tiah PDF lei nih cun an chim.

Tanintharyi Ah SAC Ralkap Le Phyosawhti 6 Cu PDF Nih An Thah Hna! D-Day kumkhat tlinnak ah tiin Kyunsu ah a ummi Phyosawhti pawl cu kan kah hna i, Phyosawhti 2 an thi, tiah Tanintharyi-PDF nih nihin September 7 ah an thanh.

Tanintharyi ramthen, Kyunsu peng, Petain(ပဲတိုင်) khua, Myeik pengkomh, Bataillon 2 Tat-Khuai 2 le Tanintharyi-PDF hna nih tuzing suimilam 5 hrawng ah an kahdoh hna tiah theih a si. Cu kahdohnak ah cun Phyosawhti hruaitu U Ni Di Du telhin, Phyosawhti 2 an thi i, pakhat hliam a tuar, tiah kan theih.

Cun, September 4 zinglei sml 11 hrawng ah Tanintharyi peng Laythit-Thinchaungwa (ထိန်ချောင်း၀) khua pawng ah rallam sialmi SAC ralkap hna cu kan kahdoh hna i, SAC ralkap 3 le Phyosawhti 1 an thi i, 1 faak ngaiin hliam a tuar. Kanmah tualchung hriamtlai phu lei hliamtuar um lo tein hnu kan tolh kho, tiah tualchung hriamtlai phu hruaitu pakhat nih a chim. Credit: The Chin Post