Thabeikkyin Peng Ah Tualchung Mi 6 Cu PDF Thuam Hrukter In SAC Ralkap Nih An Thah Hna
========
Mandalay ramṭhen, Thabeikkyin peng, Kyaukai khuami 6 cu SAC ralkap nih an thah hna hnu ah PDF thuam hrukter in “PDF chungtel an si” tiin thawngthanhnak an tuah, tiah Thabeikkyin peng pah kah phah in ṭuanvo ngeitu pakhat nih a chim.
August 4 ah Ayeyarwady tiva hrawn in a kaimi SAC ralkap tilawng 9 humhimnak a lakpiaktu ralkap 700 cu Thabeikkyin pengchung khuate ah rallam sial in, tualchung mi hna umnak inn an khangh. Cu pinah Kyaukai khuami 6 cu an tlaih hna hnu ah an thah hna i, Takaung pah kah phah thuam hrukter in “PDF 6 kan tlaih hna” tiah thawngthanhnak an tuah.
“SAC ralkap thazaang tam ngai nih rallam an sial ruangah tualchung mi hna cu an herhmi thilri i put in an zaam lio ah khuami 6 cu SAC ralkap nih an tlaih hnu i PDF thuam an hrukter hna. PDF 6 an thi tiin thawngpang a than caah khuami nih hlathlainak an tuah i Kyaukai khuami an si tiah tualchung mi nih an chim. A luancia July 29 in nihin August 8 tiangah kahdohnak pehtlai in a chuak, PDF cu kan him dih ko” tiah Thabeikkyin peng pah kah phah in ṭuanvo ngeitu pakhat nih a chim.
SAC ralkap nih Thabeikkyin peng khuate hmunkip ah thazaang tampi he rallam an sial ruangah tualchung mi hna cu harsa ngai in ralhrial dirhmun an phan. SAC ralkap le tualchung hriamtlai phu kar kahdohnak ah SAC ralkap lei a thimi le hliamhma tuar mi an um lengmang caah tualchung mipi cungah lehrulh cham in inn kip ah an duhmi thilri poh an laak hnu ah inn cu an khangh, tiah tualchungmi hna nih an chim.
Kalaymyo Thonginn Ah CNDF Ralkap Pakhat Nunnak A Liam! Sagaing ramṭhen, Kalaymyo thonginn ah thong a tla mi Chin National Defense Force-CNDF chungtel Salai Van Biak Him cu Kalaymyo siizungpi ah thlop cuahmah a si nain August 6, zinglei suimilam 10:00 hrawngah a nunnak a liam, tiah tualchung mi nih an chim.
Salai Van Biak Him cu a luancia 2022, March 15 ni Kalaymyo thonginn chung i kahnak a chuahlio ah a nunnak liammi CNDF chungtel Van Dim he 2021, May 30 ah SAC ralkap nih sualpuhnak he an rak tlaih hna. “Keimah he Kalaymyo thonginn ah kan rak umṭi bal.
Salai Van Biak Him hi Van Dim he hmunkhat teah a umṭi pengmi an si i, Van Dim a thih hnu ah hruaitu a si an ti ruangah fak tuk in hrem a tong. Cu pinah a nih hi a ngandam lo ngai mi a si i, a cuap zong a ṭhat lo caah siizung ah an thlop lengmang mi a si,” tiah Salai Van Biak Ham he hmunkhat ah thong a rak tla ṭi bal mi pakhat nih a chim.
CNDF ralkap Salai Van Biak Him hi a ngandamnak a ṭhat lo pinah sii-ai tlamtling in thlop a si lo, ṭha tein siizung ah i thlopnak nawl zong a ngei lo. A zual tuk hnu lawngah thonginn leng siizung ah an kalpi, tiah an chim.
Salai Van Biak Him thihnak kong he pehtlai in CNDF chimphuannak nawlngeitu Salai Cung Ngai nih cun, “Anih hi lungzawtnak a ngeimi a si tiin kan theih. Siizung an phanhpi hnu minutes 30 hrawng a rauh ah a nunnak liam, tiah an chim nain, a zoh dawhnak in siizung i a thi mi bantuk in an chim a si ko. Thonginn chungah ṭha tein an thlop lo ruangah atu bantuk in a nunnak tiang a liam hi a si. A ruak zong a chuah semnak Chin ramkulh Falam ah vui ding in hal a si nain an sianh hna lo caah Kalaymyo ah nihin ah ruak vuinak an tuah,” tiah a chim.
Atu tiangah CNO/CNDF chungtel 14 cu SAC ralkap nih phungning loin an tlaih hna. 2022, March 15 Kalaymyo thonginn chung i kahnak a chuah lio ah Salai Van Dim cu a nunnak a rak liam i, tutan ah nunnak luammi Salai Van Biak Him hi thonginn chung i nunnak a liam mi pahnihnak a si. Credit: The Chin Post