Ralhrang Phu Le TNLA, MNDAA Hriamtlai Phu Hna An I Phomh Than

Ralhrang Phu Le TNLA, MNDAA Hriamtlai Phu Hna An I Phomh Than
============
Shan ramkulh chaklei, Kunlong pengkulh chung um Pan Kham khua pawngah ralhrang phu le Ta’ang National Liberation Army (TNLA) le Myanmar National Democratic Alliance Army (MNDAA) hriamtlai phu karlak ah kahdohnak a um than. Nihin June 20, 2021 ni chun suimilam 2:00 hrawngah hi kahdohnak hi a cangmi a si i, TNLA hriamtlai phu information lei tuanvo ngeitu sinin thawngtheih a si.

Ralhrang phu Sa-ka-kha (17) Kha-mar-ya (520) hna nih Pan Kham khua thlanglei in cunglei ah an hung kai lio ah TNLA, MNDAA hriamtlai phu hna he an i ton i an kah mi a si, tiah khuami sinin thawngtheih a si. Cun, Kutkai pengkulh chung Lwe Kan khuate kahdohnak ah ralhrang ralkap 3 nak tam an thi i, hriamnam cheukhat zong an chuh khawh hna, tiah theih a si. Hi kong he pehtlai in TNLA le MNDAA hriamtlai phu i bawmh in ralhrang phu cu an phomh hna hi a si.

Ralhrang phu lei a thi mi hna an ruak cu Monastery sianginn kalnak lam pawngah mei in an khangh hna, tiah khuami nih an chim. Ralhrang phu le MNDAA, TNLA hriamtlai phu karlak kahdohnak hi June 15, 2021 ni thawk in June 18, 2021 ni tiang Kunlong khua pawngah fakpi in an kap, tiah khuami nih an chim chap. Hi kahdohnak ruangah Pan Kham ralzam umnak ah Kunlong khuami minung 300 leng hna cu nihin suimilam 9:00 hrawngah khua lei ah an kir than cang, tiah theih a si.

Kunlong pengkulh, Pan Kham ralzam umnak ah a rak phanmi Kunlong khuami 332 hna cu nihin June 20, 2021 ni suimilam 9:00 hrawngah an khua lei ah an kir than cang, tiah thawngtheih a si. TNLA, MNDAA hriamtlai phu le ralhrang phu karlak kahdohnak ruangah khuami dihlak an zamh dih. Ni 4 a rau hnu ah an kir than hi a si. Atu ahcun an khua te ah an kir cang i, ralhrang phu zong khua chungah an um ti lo, tiah theih a si.

Ralhrang phu an ruak pawl cu lam pawng teah mei in an khangh sawhsawh hna, tha tein an khangh hna lo caah khuami nih tha tein khangh than dingah an itimhtuah. Hi ralhrang phu ruak an khanghmi hi a zat theih khawh a si lo. Kutkai pengkulh chung ralhrang phu le MNDAA, TNLA, KIA, AA hriamtlai phu karlak ah pehzulh nawn in kahdohnak a um peng ko, tiah khuami sinin thawngtheih a si.