Ralhrang nih Mi sawhsawh an thah ning hna hi zoh hmanh u, zoh ngam an si loh!

Ayartaw Peng Ah SAC Ralkap Nih Tualchung Mi Pahnih An Thah Hna, Khuami Inn Le Lo An Hrawh!
==========
Sagaing ramṭhen, Ayartaw peng ah SAC ralkap nih tualchung mi pahnih, Phu La Pih le Sein Thant cu ralphaw ah an hman hna hnuah an kah thah hna, tiah Ayartaw peng PDF in ṭuanvo ngeitu pakhat nih a chim. A luancia November 7 ah SAC ralkap pawl cu Wetpit khua ah an kut i, kum 26 tluk Phu La Pih le kum 20 tluk Sein Thant cu an baan an leh hna i, PDF nan si nan hruaitu khoika dah an um tiin an hal hna, tiah theih a si.

An tlaih hna hnuah Ayartaw-Wawtawma(ဝါးတောမ) lampi cungah an baan an leh hna i an lu ah meithal in an kah hna. An ruak cu khuami nih an fimhlawm hna, tiah theih a si. Thah a tongmi hna hi lo rian a ṭuanmi an si i PDF he pehtlaihnak a ngei lomi an si. SAC ralkap nih ralphaw ah an tlaih hna hnuah an thah hna, tiah tualchung mi hna nih an chim.

“SAC ralkap pawl hi rallam an sial caan ah an thilthuam i hruk loin mi sawhsawh bantuk in rallam an sial. Tualchung mi cu a thli tein an thah lengmang hna. PDF an tha a zor nakding in tualchung mi cu a phunphun in an hrem hna,” tiah Ayartaw peng PDF ṭuanvo ngeitu nih a chim.

Khuate ummi cu theihhngalhnak an ngeih lo tikah an phone chung a ummi dohthlennak he aa pehtlaimi zong thianhhlimnak a ruah awk an hngal lo. SAC ralkap uk duhlohnak an langhternak hmanthlak zong an hnawt lo. SAC ralkap nih cu hmanthlak an hmuh tikah PDF he pehtlaihnak nan ngei tiin sual an phawt hna i an thah hna. Thah a tongmi pahnih zong hi PDF he pehtlaihnak zeihmanh a ngei lomi an si, tiah Ayartaw peng PDF in ṭuanvo ngeitu nih cun a chim.

Kyeikhtu(ကျိုက်ထို) Peng Ah Tualchung Mi Pathum SAC Ralkap Nih An Thah Hna! KNU Brigade 1 hmunram Kyeikhtu peng ah a luancia October thla lio rallam a sialmi SAC ralkap nih, tualchung mi 3 an thah hna, tiah Thatone pengkomh nih cathanh an chuah.

Kyeikhtu peng khuate ah a luancia October 13 ni thawk in SAC ralkap 300 leng nih rallam hmun hnih ah an sial i khuate ah an lut tiah theih a si. Rallam a sialmi SAC ralkap nih kum 33 tluk A Thet Inkabu(အထက်အင်္ဂဘို) khuami Aung Myint cu October 14 ah an thah. October 19 le 21 ah kum 30 tluk Zaw Htet le kum 66 tluk Mone Kyi zong an thah hna, tiah an langhter.

KNU, Thatone peng chungṭuan Padu Saw Aye Naing nih cun, SAC ralkap nih khuami inn le lo zong an hrawhpiak hna i an khanghpiak hna. Inn 10 a ciam i khuami thilri zong an firpiak han, tiah a chim. Kyeikhtu peng chungah SAC ralkap le KNLA kar kahdohnak voi 10 nak tlawm lo a chuak i kaphnih in a thimi le aa hliammi an um, tiah theih a si.

Letpan Khua SAC Ralkap Nih An Khangh Pinah Nu 4 An Tlaih Hna! Magway ramṭhen Saw peng Letpan khua cu SAC ralkap nih an khangh pinah nu 4 zong an tlaih hna i, an nunnak ca ah thinphang a si ko, tiah Yaw Alin Tan phu in ṭuanvo ngeitu pakhat nih a chim.

Nizan November 10 chun sml 12:50 ah SAC ralkap Tatma 55,11 le 101 in ralkap 80 hrawng cu Letpan khua ah an lut i, khuami inn pakhat an khangh pinah nu 4 zong an tlaih hna. Khuami pakhat zong a tlau, tiah theih a si. “Chun sml 12:50 ah Letpan khua ah SAC ralkap 80 hrawng nih meithal an puah.

Zanlei sml 4:30 ah inn pakhat an khangh. Nu 4 an tlaih hna i pakhat cu a tlau. Khuami a dang hi an him le him lo kan hngal kho rih lo,” tiah a chim chap. SAC ralkap cu zanlei sml 5:00 hrawngah Pasauk khua phungki sianginn le khuami inn cheukhat ah umhmun an khuar, tiah theih a si.

Myinmu Ah Myanmar Economics Bank Hngaktu SAC Ralkap Kah An Ton Caah 5 An Thi! Sagaing ramṭhen, Myinmu peng Myanmar Economics Bank hngaktu SAC ralkap cu, nihin November 11 zing ah kah an ton caah SAC ralkap 5 an thi, tiah theih a si.

Nihin zing sml 5:00 hrawngah Myanmar Economics Bank hngaktu SAC ralkap cu, an i hngilh lioah bomb in kan puahhnawh hna i SAC ralkap 5 an thi, pakhat hliamhma fak ngai a pu, tiah Myingyan Zero Guerrilla phu in ṭuanvo ngeitu nih a chim.

“An i hngilh lioah Bank hngaktu SAC ralkap 8 cu bomb in kan puahhnawh hna, SAC ralkap 2 nih an kan kah ko nain kan him. Thawngpang kan hlathlai ṭhan tikah SAC ralkap 5 an thi i pakhat cu hliamhma fak ngai a pu,” tiah an kan chimh tiin Zero phu ṭuanvo ngeitu nih cun a chim. Cu kahdohbak ah Zero Guerrilla phu le True Fighter hna i bawm in an kah hna, tiah theih a si. Credit: The Chin Post