Ralhrang nih Hakha Khuami Minung 13 Hrawng Ralkhamnak ah an Hman Hna update!

SAC Ralhrang nih Hakha Khuami Minung 13 Hrawng Ralkhamnak ah an Hman Hna update!
========
Nihin September 3, chunhnu sml. 1:30 hrawng ah Rual-U thlan pawng ah miphun ralkap bu fonh le SAC ralhrang karlak kahdohnak a chuak i, SAC ralhrang nih Hakha khuami minung 13 hrawng ralkhamnak ah an hman hna, tiah thawngpang kan theih.

Rual-U thlan lei ah a kalmi SAC ralhrang pawl cu miphun ralkap nih an kah hmasa hna. SAC ralhrang nih Hakha University kutka congtu (Non-CDM) pa pahnih le a dang dum rian a ttuanmi pawl an tlaih hna, tiah thil sining a theitu khuami pakhat nih The Chin Journal ah a chim.

“Kan miphun ralkap nih an kah hna hnu ah ralkap nih Hakha University kutka congtu (Non-CDM) pa pahnih an tlaih hna i hmai ah an kalter hna. Cun, misur dum ah rian a ttuanmi minung pawl zong lampi ah an tlaih hna i, ralkhamnak ah an hman hna,” tiah a chim.

Hakha Unversity i Non-CDM pa pahnih hi hmai ah an kalter hna. Cun, lampi ah an tlaihmi hna misur dum rianttuantu pawl hi karlak ceh in an kalter hna, tiah a chim chap. Misur dum rianttuantu an tlaihmi hna hi an zapi ah minung 10 hrawng an si i, nu panga hrawng zong an i tel. Ralkhamnak phaw ah an hman dih hna hnu ah an zapi in an thlah tthan hna.

Sualnak ngei lo mipi pawl kha SAC ralhrang nih ralkhamnak phaw ah an hman caah miphun ralkap nih SAC ralhrang pawl cu kah loin an kirtak tthan hna, tiah a cunglei thawngpetu nih a chim chap.

Matupi, Laymyo Hlei Pawng Min Cimh Ruangah Motor Luh Chuah A Ngah Lo. Chin ramkulh, Matupi khua Laymyo(လေမျို) hlei pawng min a cimh ruangah motor le cycle luhchuah a ngah lo, tiah tualchung mi pakhat nih a chim. “Min a cimh caah eidin thilri a phortu motor hna zong a kham dih hna, kal khawh a si lo. Matupi khuachung luhpi ding ah motor pakhat nih thilri cu a thiar hna.

“Matupi khua lei ka kal lio ah min a cimhnak hmun ka phan i, keimah lawng in ka kal kho ti lo. Motor hna zong an kal kho lo,” tiah khualtlawng mi pakhat nih a chim. Chin ramkulh ah kum fatin in hmun dangdang ah min cimhnak a um tawn. Atu Laymyo hlei pawng zong kum fatin in a cimhnak hmun a si, tiah Matupi khua chung ummi pakhat nih a chim.

Min a cimh ruangah motor hna cu Matupi khuachung an luh khawh ti lo caah a dang motor hlan in thilri an thiar i, phorh man tangka zong a hlei in kan liam, tiah tualchung mi hna nih an chim.

Paletwa Peng Ah SAC Ralkap Nih Van Lei Kahdohnak An Tuah Ruangah Tualchungmi 550 Leng Mizoram lei Ah An Zaam! Chin ramkulh, Paletwa peng Myeik Wa(မိတ်ဝ) khua ah SAC ralkap nih September 1 ah raltuknak vanlawng hmang in bomb an thlak caah tualchung mi 564 cu Mizoram lei ah an zaam hna, tiah theih a si.

Myeik Wa(မိတ်ဝ) khua pawng ah Rakhine ralkap AA le SAC ralkap kar kahdohnak a chuah caah September 2 tiang ah Mizoram ramkulh, Laimi umnak Lawngtlai peng ah Myanmar ralzaam 564 an i chap, tiah theih a si. Ralzaam dirhmun in a phanmi hna cu Young Lai Association(YLA) nih facang bag 55 in an bawmhchanh hna, tiah theih a si.

A luancia thla ah Abaungta khua ah kahdohnak a chuah caah Abaungta khuami 500 renglo cu Paletwa khuachung ah an i dor, tiah theih a si. Mizoram chung ah hin Myanmar ralzaam 30,000 leng an i dor lio, tiah ramkulh cozah nih a luancia thlah ah khan an rak thanh.

Falam Pengchung Leikuang Facang Lakah Rungrul An Tlak Caah Facang Kung Tam Ngai An Thi. Chin ramkulh, Falam pengchung Leikuang lak ah cinthlakmi hna cu rungrul nih a tlak hna caah cinthlak kung an bon lo, tiah leirian ṭuantu hna nih an chim. Facang kung hna cu rungrul nih a ei hna caah, an rau i an thi, tiah theih a si.

Cheukhat Lei ah cun facang kung rungrul nih a tlakmi an tam caah pung 500 chuak ding Lei kuang ah pung 100 hrawnglawng an chuak lai, tiah zumh a si. Rungrul thattu sii an vorh ko nain a kham hlei lo tiah an chim. Rungrul nih an tlaknak hmun tam deuh cu India-Myanmar ramri Ṭio tiva kam lei facang kung an si hna, tiah theih a si. Credit: The Chin Post