Ralhrang mawtaw 27 le Tank 2 Cu CNA le CDF hriamtlai phu nih an phomh hna!

Taal khua ah CNA/CDF le Ralhrang an i kap: A ni in hren dawh an si!
==========
Chin ramkulh Falam peng, Taal khua ah Falam in Hakha leiah a rak kaimi Ralhrang mawtaw 27 le Tank 2 telh mi phu le miphun hriamtlai phu Chin National Army (CNA) le Chinland Defense Force (CDF) bawm in nihin March 1 ah Taal khua ah kahdohnak a chuak tiah theih a si.

Hi kong ah, “March 1 zing in khua hauka ah an i kap i sml cheu hrawng a rau lai. Chun ah ralhrang pawl cu khuachung ah an i din. Khua chuah dingin an mawtaw he an i timhtuah i khua an chuah bakah kahdok a chuak ṭhan. Hmun hnih thum in sml. pakhat tluk hrawng cu an i kap lai dah tiah” khuami pakhat nih zaanlei sang ah The Chinland Post ah a chim.

Ralhrang mawtaw thluan pawl cu Taal khua kiangkap, khua chuah lai ah CNA/CDF he dohnak a chuak i, an mawtaw an kah piak lengmang hna caah khua lonhtak kho taktak loin [Hakha lei kalnak] khua chuah hauka ah an tap i tuzaan hi an riak kho men. Khua chungah rak kir ṭhan in riah khawh zong an si. Zeidah a lawh lai ti cu a fiang in chimkhawh a si rih lo tiah khuami nih cun a chim.

Nihin zaanlei sang tiang ah, Ralhrang nih khanghmi inn cu a um rih lo nain, khua sianginn pakhat cu hriamngan nih a khen tiah theih a si. Taal khuami hna hi Ralhrang Falam an phan ti thawng an theih February 27 hrawng in nu, hngakchia, tar le loriak a der thawm deuhmi hna cu Falam leiah an kalter cia cang hna tiah runvennak len an tuahmi kong khuami nih a chim.

Khua nigatthlai ah a tangta mi hi, Tlangval le Patung no 10 hrawng lawng an si i kahdohnak a chuah in ramlak ah an um ve tiah theih a si. Taal khua hi cozah rianṭuantu hna telh in Inn 39 khuasa an si i a tu bantuk in Falam in a rak kaimi ralhrang le CDF karlak kahdohnak a chuah ruangah khua an chuahtak dih nak hi a si tiah theih a si.

Hramhram uknak lak hnu ah Paletwa mipi 1,500 India ah an zaam. Hramhram in uknak lak a si hnu ah Chin ramkulh, Paletwa peng chungah ralhrang le Chinland Defense Force (CDF) karlak kahdohnak pawl ruangah khuami 1,557 cu India ram ah an zaam tiah theih a si.

Mizoram ah a rak phanmi Paletwah ralzaam pawl cu hmun 17 ah ṭhen in eidin tirawl tawlrelpiak an si. “2015 hnu ah Arakan Army (AA) le Kawl ralkap karlak ah kahdohnak a chuah caah khuate i ralzaam pawl cu khuapi ah tlik a si. Paletwa khuachung ah Ralzaam camp pawl dirh le bawmhchanh a si. Sami khua ralzaam camp hna zong mah ticun bawmh an si.

Hramhram uknak lak a si hnu cun, khuate mipi hna cu khuapi an rak kai ngam ti lo. An pawngkam minung hna i khawm in Mizoram ah an tli cang” tiah Paletwa ralzaam a bawmtu pakhat nih Mizzima ah a chim. Chin ramkulh he aa tlaimi Mizoram ah Myanmar ralzaam 30,000 leng an um cang tiah a si.

“Zeiruang dah an tlik ti a si ahcun, an ṭih caah a si ko. Kan hnu thla ah Pastor pakhat telh in Pawa khua ah an tlaihmi minung 25 cu sual phunhnih phawt chap in Paletwa khuapi ah an hren hna. An zumh lomi hna cu tukvelh le tlaihkhih a si caah hohmanh um ngam a si ti lo” tiah ralzaam pakhat nih a chim.

Atu hi ralhrang nih Sami khua chaklei luhchuaknak vialte an phih dih caah caan tlawmpal ahcun mangṭam a tlung kho men mi a si caah an tlikzaam dihnak hi a si tiah theih a si. Mizoram a phanmi ralhrang pawl hi Mizoram cozah, NGO, Biaknak lei le Mozoram mipi hna nih bawmh len a si ko nain rari ralzaam camp ah a ummi hna cu harnak an tong rih ko tiah theih a si.

Helicopters pahnih in an kah hna caah khuaning piin a kangmi Thapyeaye khua. Sagaing ramṭhen, Yinmarpin peng, Thapyeaye khua cu February 28 ah ralhrang nih Mi35 Helicopters pahnih in an kah lawng si loin a dang Helicopters pahnih in ralhrang 60 hrawng cu Thapyeaye khua ah a ṭhumh hna.

Phungki sianginn telh in mipi inn pawl cu an hrawhkhangh tiah khuami nih Yangon Khit Thit thawngzamh ah an chim.
“ Inn zeizah dah a kangh cu a fiang in theih a si rih lo. Thapyeaye khua hi inn 230 khuasa an si. Mipi pakhat hriamngan nih a khen tiah theih a si nain fianh khawh a si rih lo” tiah khuami pakhat nih a chim.

Tulio ah Thapyeaye khua telh in Kyaukpyut, Moekaung, Ohpho khuami hna cu himnak ah an zaam dih tiah Khit Thit thawngzamh nih a ṭial.

Hpakant min cimh ruangah lung mansung a kawlmi tampi an thi kho. Kachin ram, Hpakant lungvar a chuahnak YTT tlangbo pawng Shan Yoma le (111) rianṭuancianak ah February 28 zaan sml 9:00pm ah min a cimh caah lung mansung a kawlmi tampi aa nenh hna i an thi kho men tiah thawng theih a si. Min cimhnak ah lung mansung a kawlmi minung 50 hrawng le lungvar a khoihtu backoe pathum a nenh chih tiah Mizzima nih a ṭial. Credit: The Chinland Post