Ralhrang Le TNLA, MNDAA Hriamtlai Phu Kahdohnak A Chuak Than

Ralhrang Le TNLA, MNDAA Hriamtlai Phu Kahdohnak An Thawk
==================
Tuzing suimilam 11:00 hrawng ah Shan ramkulh, chaklei Kunkhine Township, Manbang khuate pawng ah ralhrang bu le TNLA, MNDAA hriamtlai phu fonh in kahdohnak a um, tiah thawngpang theih a si. TNLA hriamtlai phu chimhnak nawlngeitu Bohmu Mai Ah Kyaw nih hi kahdohnak kong he pehtlai in ralram ralkap pawl pehtlaihnak kan tuah cuahmah lio hna an si, tiah a chim.

Bohmu Mai Ah Kyaw (ဗိုလ်မှူးမိုင်အိုက်ကျေ) nih khuami nih cun a dikmi thawng a si ko, an i kahmi thawng kan theih ko tiin an chim. Ralram um ralkap pawl cawlcangh ning tha tein kan theih kho rih lo. Keimah zong atu hi Confirm tuah khawhnak ding caah ka hlait cuahmah lio a si. April 11, 2021 ni ah Lashio Townxhip, Naungpuh Palik sakhaan cu TNLA, MNDAA le AA hriamtlai phu nih an luhhnawh i, an kah hna ruangah palik 10 leng an thi i, palik 5 leng nih hliamhma an rak tuar cang.

2021 May 5 in University, College, GTI le GTHS sianginn ah a kaimi siangngakchia cheukhat ca cawn hram an thok than lai. Myanmar ramhuap University, College, GTI le GTHS sianginn i sianginn a kaimi siangngakchia cheukhat hna cu 2021 May 5 in ca cawn hram an thok than cang lai tiah Hakha GTI sianginn Principal Dr. Salai Tluang Za Thang sin in thawng kan theih.

Dr. Salai Tluang Za Thang nih, “Council zung lei nih May 5 ah cacawn hram thok than ding in thawng an kan thanh. Ca cawn hram thok than ding a si ca ah sianginn lei rian ngei mi hna zong nih a si khawh chung in rak i timlam ve uh. Cun, atu hi siangngakchia dihlak si loin Final Year a kai mi poh an si lai,” tiah The Hakha Post ah a chim. Ralkap nih February 1 ah Myanmar ram uknak a laak hnu in Myanmar ramhuap sianginn ca chim a tam deuh cu CDM cawlcanghnak ah an i tel.

Ca chim tu ding saya/ma hna kong he pehtlai in, “Ca chimtu hi CDM an tuah pah dih ca ah kan chambau ngai lai. Cun, Final Year siangngakchia hna zong hi kai ding kan ti ko nain, anmah lei nih kai an i timh le timh lo a si lai,” tiah Dr. Salai Tluang Za Thang nih a chimchap.

May 5 in sianginn a kai than mi dihlak ni 40 chung hrawng an kai dih hnu ah camipuai tuahter an si lai tiah theih a si. Myanmar ramhuap sianginn a tam deuh cu COVID-19 zawtnak Myanmar ram a phak 2020 March 23 hnu siangngakchia si hna seh, ca chimtu saya/ma si hna seh sianginn an kai ti hna lo. Credit: The Hakha Post