Hpasawng Kahdohnak Ah SAC Ralkap 10 Nak Tlawm Lo An Thi
==========
Karenni (Kayah) ram, Hpasawng peng kahdohnak chung ah SAC ralkap 10 nak tlawm lo an thi i hriam le kuanzen pawl zong an lak khawh tiah Hpasawng PDF sin in thawng theih a si. August 5 ah Hpasawng peng le Mese peng karlak ah a um mi Kyauksu khuate pawng ah kahdohnak a fak tiah theih a si.
Hpasawng in Mese khualei ah a rak lut mi SAC ralkap pawl hi Brigade 55 kuttang Infantry 508, 512 pawl an si tiah theih a si. August 5 kahdohnak chung ah KNPLF lei in hriamtlai 2 an nunnak a liam.
Atulio Karenni ram ah a lut mi SAC ralkap pawl cu KA, KNDF, KNPLF le Hpasawng PDF hna bawm in an doh hna tiah theih a si. July 27 zong ah Hpasawng peng chaklei ah a um mi SAC ralkap pawl nih hmunhma an khuarnak cu Karenni phufonh nih an kah hna i hriam le kuanzen tampi an lak khawh tiah theih a si.
Kalay Thonginn Ah Thongthlak Mi CNDF Hriamtlai A Nunnak A Liam. Sagaing ramṭhen, Kalaymyo thonginn ah thongthlak mi CNDF hriamtlai Salai Van Biak Him cu Kalaymyo sizung pi ah August 6 zinglei sml 10:00am ah a nunnak a liam tiah thawng theih a si.
Salai Van Biak Him @ Nicolas cu a luancia 2022 March 15 ah a cang mi Kalaymyo thonginn chung kahdohnak ah a nunnak a liam mi Van Dam he 2021 March 30 ah SAC ralkap nih Kalaymyo ah an tlaih hna i Article 505 (A) telh in Terrorism sual phawtnak pawl in thongthlak a tong mi a si.
“Keimah he a khaan hmete ah an kan khumh. 15/3 thong kahdohnak lio ah Vandam he an umṭi caah amah cu aa tel lo nain kahdohnak ah hruatu na si ve tiah fak pi in an velh, zung 7 a chah mi thir an khih i khaan hmete ah cawl kho lo in an khumh. A ngandam lo mi a si. A cuap zong a ṭha lo. Sizung ah a um peng mi a si” tiah Salai Van Biak Him he Kalay thong ah a umṭi mi nih Ayeyarwaddy Times ah a chim.
Hriamtlai Van Biak Him hi mi ngandam lo a si ko nain ṭha tein thlopbulnak nawl a ngah lo leng ah a zual tuk hnu lawng ah thonginn leng chuah in thlopnak nawl an awnh caah atu bantuk in a nunnak a liam hi a si tiah amah he thongtlaṭi mi pakhat nih Ayeyarwaddy Times ah a chim.
“Pawfah zong ah Paracetamol le Burmeton, lufah zong ah Burmeton lawng pek a si. Sizung ah mi a thlop mi pawl zong hi rithai sii a hmang mi lawngte. Minung thahri kawl khawh ruang ah thonginn sibawi a ṭuan mi an si. A ngandam lo mi caah thong chung ah thih lo tein um cu a si kho lo. Thong ka tlak kum 2 chung ah minung 5 an thi cang” tiah ramkhel lei thongtla pakhat zong nih a chim fawn.
Cu CNDF hriamtlai Salai Van Biak Him a thihnak kong he pehtlai in “Thinlung zawtnak a ngei cang mi a si. Sizung a phak hnu sml cheu ah a nunnak a liam. Zoh dawhnak sawhsawh in sizung an kuat mi a si. A ruak zong a chuahkehnak Falam ah phum kan duh ko nain nawl an awnh lo caah Kalaymyo ah an vui” tiah CNDF biachimnak nawl a ngeitu Salai Cung Ngai nih a chim. CNDF chungtel 14 cu SAC ralkap nih an rak tlaih/hren hna i 2022 March 15 lio thong chung kahdohnak ah Van Dam a nunnak a liam cang i atu Salai Van Biak Ham zong a nunnak a liam ve hi a si.