Ralhrang Bomb Puah Hnawh Dingin A Timh Tuah Lioah Bomb A Puah Sual Caah Mipi Ralkap Nunnak A Liam!

Ralhrang Bomb Puah Hnawh Dingin A Timh Tuah Lioah Bomb A Puah Sual Caah Mipi Ralkap Nunnak A Liam!
========
SAC Ralhrang Bomb Puah Hnawh Dingin A Timh Tuah Lioah Bomb A Puah Sual Caah PDF Pakhat Nunnak Liam! KNU Brigate (1) umnak hmunhma chung simi Bi Lin peng Yi Lin Taw ah SAC ralhrang ralkap bomb puah hnawh dingin aa timh tuah lioah bomb a puah sual caah PDF pakhat nunnak a liam hi a si.

Febuary (2) zinglei sml 3:00 ah Bi Lin peng chung Yi Lin Taw khua leikap ah a kalmi SAC ralhrang ralkap motor rual cu KNU Brigate (1), Battalion (2) hram bunh People Guard Force Local PDF phu in bomb puah hnawh dingin aa timhtuah nakah atu bantukin a cang sualmi a si. Cu bantukin bomb puah sual nakin nunnak a liamtu min hi fiang tein theih thiam a si rih lo.

Bomb siseh hriamnam tibantuk an timhtuah lioah tuah sual/tongh sual nakin an nunnak a liam bangin hliam an tuar caan zong tampi a um. A liamcia January 22 zinglei caan zongah Chin ramkulh chungum mipi vengtu PDF-Zoland in Ko Mung Nu le CNA in Salai Cung Lian Sang hna zong bomb puah sual nakin an nunnak a liam.

Kalaymyo Thlanglei Kahdohnak Ah Kalay-PDF Pahnih Nunnak Liam! Kalaymyo thlanglei sang Ta Ya Kung le Htu Ma karlak ah Febuary (2) chun sml 12:00 ah nawlngeihnak latu SAC ralhrang le Kalay PDF karlak Battalion (2) karlak suimilam (1) chung kahdohnak a chuak i, Kalay PDF leikap ah ကိုပြည့်စုံဦး le ကို သူရစီုး pahnih nunnak a liam tiah Kalay PDF nih cathanh an chuah.

Febuary 2 zinglei sml 5:00 Kalaymyo in SAC ralhrang ralkap motor (7) hna cu Kalaymyo in thlanglei sang Ta Ya Kung leikap ah an rak kal tikah Sii Ta khua le Nat Myaung khua karlak ah motor dir hratin an ke bakin Nat Chaung leikap ah an kal.

Kalaymyo PDF nih timhcia tein an chiahmi bomb (28) hna cu pehzulh in an puah hnawh hna tikah SAC ralhrang ralkap (30) tluk a khenh hna. Bomb puah hnawh an ton hnuin ralhrang ralkap nih hriamngan he hriamhme he pawngkam ah heh le hnik in an puah. SAC ralhrang ralkap hna cu bomb puah nakin hliam a tuartu hna cu motor cungah an thiar hna i, Nat Chaung leikap ah pehzulh in an kal chih.

Anmah bawmh dingin Kalaymyo in SAC ralhrang ralkap motor (5) cu Nat Chaung leikap ah an kal i, Kalaymyo Technology sianghleirun camp chung an phak zawnah motor dir hratin an ke in Ta Ya Kung khua leikap ah an kal than caah chun sml 12:00 ah Kalay PDF phu he sml 1:00 chung an i kap hna i, cuka ahcun Kalay PDF Battalion (2) i mipi ralkap pahnih nih ram le miphun caah an nunnak a liam hi a si tiah cathanh an chuahmi ahcun an langhter.

Nawlngeihnak Laaknak Kum Khat Tlin Ni Febuary (1) Ah Thantlang Khuapi Ah Inn 94 Mei An Khangh Than! Febuary (1) ah CDF-Thantlang le nawlngeihnak latu SAC ralhrang ralkap karlak ah kahdohnak a chuak than i, SAC ralhrang ralkap nih minung umnak inn 94 bak mei an khangh than tiah CHRO nih cathanh an chuah.

SAC ralhrang nih nawlngeihnak a laak hnuah Thantlang khuapi chungah September thla thawkin Febuary (1) tiangah inn 928 bak an khangh cang.

Tidim Khuapi Chungah Meithal Puah Thawng An Thei! Chin ramkulh Tidim khuapi palek sakhan leikap in Febuary (2) zaan sml 7:30 thawkin meithal puah thawng kan theih tiah khuami nih an chim. Meithal puah thawng vawihra (10) leng an theih hnu zaan sml 8:00 in cun a dai ngai than. Febuary (1) chun sml 12:00 zongah hriamngan puah thawng kan theih ruangah khuapi chungum dawr ngeitu vialte zong nih an dawr an khar colh tiah theih a si.

January 31 zaan sml 7:40 hrawngah palek sakhan cu PDF-Zoland, CDM Siyin hna i fonhin an kah hna hnuin hriamngan hmangin an rak kah hna ruangah Tidim in meng 1/30 tluk a hlatnak khua Gaungmual khua chungum minung umnak inn pakhat cungah a tla nain a puah lo caah hliam tuarmi an um hna lo. Tlanglo an tuahmi zongah a puak rih lomi hruamngan kuanfang an hmuh tiah theih a si. Credit: The Federal Times