Ral he aa pehtlaih lomi minung le thilri hrawk in thahnawn kha Geneva le Human Rights (Nuhrin Covo) phu nih

Dalaan Theory hi Tharchuah A Herh Men Lai!
=========
NUG cu Mipi Cozah asi tiah Cohlan cia asi nain 2021, 14 September ah DDay a thanh mi belte a cohlan tu an um lemlo. DDay sullam cu Kawlram ah Civil War aa thawk cang tinak asi. Rallokap le a minung vialte, Dalaan le Non CDMers tiang in, thianh ding tiah DDay Dundan ah aatel caah Vawleipi nih DDay an cohlan lo hi asi.

Ral he aa pehtlaih lomi minung le thilri hrawk in thahnawn kha Geneva le Human Rights (Nuhrin Covo) phu nih an cohlan khawh bak lo. Geneva mumal ahcun a nung in tlaihmi Rallokap thah zong kha a cohlan lo. Tha tein zohkhen in pawkhim tein Tirawl pek ding, hremh bak lo ding, thongthlak in an biaceihding, tihi asi. Dalaan le USDP Party thah hi UN le Geneva phung nih an duhlo bakmi asi.

PDF nih Ralkap he aa pehtlai lomi thilri an hrawk, mi an thah tik ah UN le Geneva phung kan buar chin chin. Vawleipi Ram thawngtha le Ramrum, Ram fim hna an tuak cia mi he aarup bak ko. Rallokap nih cantha lakzau in Mipi ralkapbu he aa pehtlaih bak lomi thilri, innlo hrawk in mei duah, thah an duhmi mipi poah poah, an duh tik caan poah ah an thah salam hna. Mipi ngeih mi an fir mi hi an rum phah cang lai. An hmai ummi Nu poah poah tlaihhrem in an sual pi hna. Vawleipi nih tih bik mi Muslism ralhrang, ISIS nakin, Kawl Rallokap hi, an zual deuh cang.

NUG le Mipi an kan tanh bak mi ram hna cu, Australia, Belgium, S.Korea, Japan le EU 27 ram hna an si. NUG nih anram ah Embassy (Tanzung) an tuah khawh cang. Tanzung riantuan tu zong thlahlawh an pek piak hna.

Ruah awk a um mi cu: Japan le Singapore nih Kawl Rallokap cu a dotla mi Raltuknak Tindan an pek rih hna. Australia, France, Germany ram hna nih Kawl Rallokap he Gasoline Sipuazi an tuah ti rih hna. A hlawk tuk caah thlah an siang tilo. MAH le Crony hna sipuazi phih karh dih timi a hlawh tlin khawh tilo. UN nih Hriam zuar lo ding an ti. China, Russia, India le Ukraine nih MAH cu a duhmi hriamnam kip he Jet Fighter tiangin an zuar fawn.

UN le Vawleipi nih Kawlram mipi cu Humanitarian timi minung le minung zawnruah nak le thlachiat ruatnak lungput he ka bawmh lai ati. UN nih USD 300 Million a hmuh cang. Eidin Tirawl le Sii ai, Fenh ai le Hnipuan in chanchuah an kan timh hi asi. Ralzam hna zohkhen kilven, kilkam riantu tuan aa timh mi asi. Hriamnam in NUG le Mipi bawmhtu ding an um lo. Aruang cu Ralhrang rian kan tuan caah asi. Ral he aa pehtlaih lomi hrawk le thah ruang ah asi bik ko.

Cucaah hriamnam cu mah tein i zalh a herh cang. NUG zong nih tampi in cawk piak ding asi, phaisa tampi a ngeih ko caah. Tutiang NUG umtu ning zoh tikah, MAH le Rallokap tei khawh tiangin, hriamnam an kan bawmh ko lai tihi ruahchan awk ah a har ngai rih. Hmailei kong belte ka chim khawh ve lo. Phaisa USD 1500 Million a ngeih mi NUG nih CDF caah USD million 100 hi a bawmh khawh tuk. 6.67% te lawng asi rih. CDF hi 10% in a bawmh ahcun USD 150 Million asi ve hnga i duhherh mi hriam tha tha kan cawk khawh dih. Arau hlan ah Thantlang kan lak ve hnga. Hakha zong kan lak cang lai cu mu.

Kawl lei ah cun Dalaan an thah mi hi atam tuk hrinhran. Chim cawklo kan ti ko lai. Hakha – Thantlang Dalaan case hi (3-4) lawng a um nain, a buaibai ngai ngai. Cucaah Dalaan thahnawn mumal hi tharchuah hrim hrim a herh cang. Asikhawh ahcun thong inn ngeih a herh. Dalaan cu tlaih hnu ah thongthlak siseh. An biaceih in thih tlak asi ahcun, thih ve ko seh. Meithal tlaih lomi Chin Mino le CDMer hna kha homeguard or Police training i pekseh. An mah nih Dalaan thonginn cu cawngh hna seh. Meithal tlaih lomi, CDF Upa hna nih Biaceihbawi tuanvo lak ve hna seh.

Homeguards or Police hna nih Khuapi le mipi kha ven hna seh. CDF he i bawmh in Khua uktu kha thimh hna sehlaw, rule of law a um i, mipi nih duhdim tein khua an sak khawh nak hnga, khuapi uknak ah i tel ve hna seh. Meithal tlaih mi CDF nih khua uk bak ve hlah seh. Dalaan tlaih le thingthlak cu Homeguard nih tuanvo lak seh. Biaceih bawi hna nih biaceih hnu ah Dantat siseh. Dalaan thongthlak le biaceih cu kan i phah zawh loah cun NUG Cohlantu le NUG Tanzung umnak ram hna cu bawmhnak hal in, an ram ah thongthlak le biaceih siseh.

NUG le ramdang nih phaisa an kan bawmh zungzal lai lo i, ramdang ummi chin mi lawng nih bawmh ding in thil a kal. Kan thah mi Dalaan pa/nu i rualchan cingla, phun hawi, khuami le pengtlang nih CDF caah phaisa an thawh duh tilo kho men.

Dalaan thahnawn nak nih pumkhat sinak siloin i thencheuhnak a chuahpi i ral ah kan i ser khawh caah, Dalaan Theory hi i thlen seh/ i tharchuah seh tiah agenda ka chuah pi bia. Dalaan kaltak in tongh hlah uh ka ti naisai lo hi. Dalaan thahnawn nak nih UN ah Legitamcy a hnursuan ti zong philh lo ding. MAH le Rallokap bawizik rual hna ICC tazacuai phun in tuah kan si lai lo ti khawh asi ve lo. Credit: Joseph R. Thang