Ral an sunghmi kongah Putin nihhin a ralkap pawl General rank a phan
Russia Nih Ukraine Atukmi Thilcang Tete!
==========
Russia nih Ukraine a tuknak cu ni 25 a vun tling ve ruangmang cang nain Kharson ti dah lo cu Hmun biapi pawl an la kho taktak rih hna lo. Russian ralkap an thazaang a thawnnak bik Donatsk khuapi Mariupol cu an lak cang timi thawngpang a thang nain taktak ahcun an la kho rih lo. Russian Col. Gen. Mikhail Mizintsev nih mipi an him deuhnak dingah chuahnak corridors pahnih kan tuahpiak hna lai an timi zong Ukraine lei nih an cohlang lo i surrender cu an i tim naisai lo.
Russia president Putin cu a lungdong deuh ve cangmi a lo pah Zelensky he daihnak kong iruahti dingmi cu a lungtling ve ruangmang. Asinain hi kongah US le NATO nih cun zei pipa a chuak hlei lai lo zeicatiah Putin nih a demand mi kongah lungthumh ai tim hlei lo tiah an chimmi cu, CNN nih a tial chin. Hi bantuk I Putin nih a chim hi Mariupol khua i sianghngakchia 400 kainak bomb in a puah hnu i “war crime” ah Putin vun chiah dingmi kong duhlonak kong bia a tam hnu in asi ti asi.
Russia nih Ukraine an tuk ahhin Russia ralkap pawl hi an zaam than lengmang nain an tha an vun i hrimthan i hmai an vun fongh kho deuh chin lengmang ve cang. Ral an sunghmi kongah Putin nihhin a ralkap pawl General rank a phan mi minung 8 an rian in a phuah cang hna tiah Ukraine’s security council chief Oleksiy Danilov nihcun ati. Ukraine tuk i a vun ra mi Russia hriamnam 40 per cent tluk cu kan hrawh piak cang hna, tiah the Ukrainian military’s general staff nihcun a ti i cucu South China Morning Post nih a tial chim.
Nichuah lei Ukraine ah Russia ralkap pawl cu an cawl kho deuh ngai mi a lo nain Kyiv le nitlak lei Ukraine ah zei pipa hmasawnnak an ngei kho ruam rih lo. Cu ko cu Russia ralkap pawl caah thilhar ngai asi ter chinchin, zeicatiah Ukraine ralkap thazaang le hriamnam thatha a umnak cu Kyiv le Lyiv hrawng ko ahkhin asi i foreigners fighter pawl an umnak biapi taktak asi fawn.
Cun NATO le US nih zapi theih he athli he hriamnam thatha an vun kuatnak hmun asi fawn. NATO le US nih le zeitikah ka mei an lamh lai tiphun bakin Russia missiles le bombs pawl Poland luh tikah kan lehrul lai timi a hngakmi ko an lo ve, Ukraine hi an rak fimtuk ve i zeitindah NATO hi vun i tel ve dingah Poland hi Russia missiles le bomb nih kan denter khawh ve lai timi cu an tuah thiam ngaingai ve fawn.
US nihhin Putin a tlak khawhnak ding le faktuk in a sungh khawhnak ding ahcun Ukraine hi zeibantuk hriamnam zong bawmh an i tim peng timi cu al awk a um lo. Zeicatiah missiles le vanlawng kan i veng kho lo bik an ti caah zeibantuk vanlawng le missile hmanh a kap khotu ding Ukraine nih training kai hau lo tein an hman khawh dingmi hriamnam an kawl piak peng.
Tuthla thokka ahkhan vawleicung vanlawng le missile kahthlaknak thabik a si ko lai an timi Turkey nih Russia sinin a cawkmi cu Ukraine pe dingin US Deputy Secretary of State Wendy Sherman nih Turkey cu a rak tlawng i a rak hal piak hna nain Turkey nih an rak duh lo. Asinain NATO ram asi ve mi Slovakia nih S-300 ai ngeihmi cu Ukraine pek dingin a lung tling i a zaka ah US nih patriot-104 Slovakia an pek dingmi cu Sunday ahkhan Slovakia a hung phan cang, tiah Slovakia’s defence minister nih a chim.
Russia nih Ukraine a demand mi hi zeitihmanh in cohlan piak khawh dingmi thil asi lo tikah, US nih le zeibantuk hriamnam hmanh bawmh a duh chin lengmang mi zoh tikah hi ral hi a sau rih ko lai. Russian ralkap pawl caah tu i Kyiv khuapi luhhnawh colh dingmi cu raldawn ah tithan fial bantuk asi rih lai.
Ukraine le an president pa zong an lung a vun khong deuhdeuh ve cang fawn i an biachim zoh tikah cuhlan nakin ai zum deuhmi an lo, Tutan ral tuknak kong ahcun ahodah ai tei i ahodah sung timi hi um dawh asi lo. Putin caah cun i hnukdok zokzok sehlaw a tha bik ko lai tihi ka zumh piak ning cu asi. Credit: Chelsea Bawi