ALP Ralkap Chungtel 20 Leng Cu Rakhine Hriamtlai AA Nih An Tlaih Hna, Cun Thawngpang Dang!
========================
ALP ralkap chungtel 20 leng cu a luancia thla ah ULA/AA nih an tlaih hna, tiah ALP in chimphuannak nawlngeitu Major Zaw Min Thein nih a chim. “A luancia thla ah kan party chungtel ralkap 20 leng cu AA nih an tlaih hna. Hi kong hi mizapi sinah theihter kan duh lo. Kan tlaih khawh ve ko hna nain kan tlai duh hna lo. A ruang cu Rakhine ram ca ah a ṭuan ciomi kan si. Khat le khat karah buainak le kahdohnak a chuah lai kan duh lo,” tiah a chim.
ULA/ AA he hriamtlaih ṭi ding kan duh ko nain AA cu nawlpeknak pakhat tangah an um i hranhram uknak bantuk a si caah kan cohlang kho lo, tiah ALP nih an langhter. ALP hi phunih in an rak i ṭhen hlanah ALP le ULA/AA cu hriamtlaih ṭi dingin ceihkhannak an rak ngei ko nain atu tiang an i fonh kho hlei rih lo, tiah theih a si.
Pi Saw Mya Yar Zar Lin nih a hruaimi ALP cu mizapi hlen le kahdohnak lam i thim in rian a ṭuanmi kan si lo i, remdaihnak papak in SAC nih an tuahmi NCA lamthluan a zultu kan si, tiah an langhter. ULA/AA telh in a dang Rakhine hriamtlai hna cu kahdohnak lam i thim in an kal i, cheukhat hriamtlai phu hna cu a ruang tampi ruangah kahdaihnak minsen an thut, tiah theih a si.
Bangladesh rili in aa thok ding ‘Mocha’ Cyclon thlichia ruang ah Chin ramkulh telh in Myanmar ramkulh le ramthen cheukhat ah May 9 in 14 kar ah ruahpi sur a fak kho tiah khua caan zohnak zung nih May 8 ah thanh ca an chuah.
Mocha Cyclon thlichia cu a tulio ah thlihran dingin aa thok lio a si i May 9 ah thlichia thazaang der deuh mi le May 10 ah thlichia fak deuh mi in a ra kho tiah an langhter chih.
Hi thlichia ruangah Yangon ramthen, Naypyidaw, Sagaing, Mandalay, Magway , Pago, Ayerawaddy, Tanintharyi ramthen , Kachin, Shan, Chin ramkulh, Rakhine, Kaya, Karen le Mon ramkulh hna ah ruahpi sur a fak lai. Myanmar tlangram le rili thenkhat ah May 9 in 14 kar ah thlichia hrannak in tilet a tho kho i suimilam pakhat ah meng 70 in meng 80 a rang kho. Cucaah mipi hna nih a hlankan in ralrin le a herh mi thilri zong i damh cio dingin khua caan zohnak zungnih ralrin peknak thawng an thanh.
Bandgladesh rili in aa thok ding Mocha Cyclon thlichia hran lai ruah ah Ayerawaddy ramthen, Laput-ta peng khuate hna cu neihniamnak khuapi chungah an zam hna tiah kan theih. May 6 ni in thlichia ral tih ah Ayerawaddy ramthen cheukhat cu khuapi chung ah zam an thok cang tiah mibawmchan tu phu nih an chim.
Mah pin ah Laput-ta khua sianginn, phungki sianginn, pawngkam khua pi le Myiang-mya khuapi hna ah thlichia tih in a rak i dor mi a thong renglo an phan cang. Myanmar ram chung tamdeuh ah thlichia hran tik, mi bawmhchanh nak thilri le a dangdang kong timhtuahnak an ngei cio hna tiah kan theih.