Lashio Khuapi ah Ni Khat Chung ah Ruak Pathum Hmuh An Si!
===========
Shan ramkulh, chaklei Lashio khuapi chung ah May 23 ni khat chung lawng ah pa pathum ruak cu lam kam ah kan char hna, tiah mi bawmchantu phu nih an thanh. Pa pathum ruak cu Lashio khua No. 1 sang, No. 4 sang le No. 6 sang ah Lashio mi bawmchantu phu nih an char hna, tiah theih a si.
A thimi hna hi inn ngei loin a vakvai mi an si i, an min le an umnak zong hngalh an si lo caah an ruak cu Lashio sii-inn ah kan kalpi hna, tiah bawmchantu phu nih an chim. A thimi pa pathum chung in pa pakhat hi kum 60 tluk a si i, a dang pa pahnih hi kum 30-40 kar an si, tiah theih a si.
Wawbate Khua Pawng Ni Hnih Chung Kahdohnak Ah SAC Ralkap 30 An Thi; Mon ramkulh, Ye peng Wawbate khua pawng ah rallam a sialmi SAC ralkap pawl cu ni hnih chung kan kah hna i SAC ralkap 30 an thi, tiah Albino Tiger Company – 1 nih an langhter.
May 19 zanlei suimilam 3:30 hrawng in Ye peng Wawbate khua pawng ah rallam a sialmi SAC ralkap 250 leng cu Kyiaphyu Column 2 le PDF ṭangṭi phu hna nih hmaitonh in suimilam 1 chung an kah hna i SAC ralkap 19 an thi.
May 20 zing suimilam 8:00 tluk ah SAC ralkap pawl cu hnu an kir i, Kyiaphyu Column 2 le PDF ṭangṭi phu hna nih an dawi hna i an kah ṭhan hna lio ah bawmtu SAC ralkap an phan. Kaphnih kar kahdohnak a zual ngai i SAC ralkap 11 an thi chap. Ni hnih chung kahdohnak ah SAC ralkap 30 leng an thi i, hliamhma pumi zong an tam. PDF ṭangṭi phu lei in ralkap pakhat hliamhma hme a tuar ve, tiah Khit Thi Media nih a ṭial.
CDF-Matupi Ralkap Pakhat Cu Bomb Chuahsualnak In A Nunnak Liam! Chin ramkulh, thlanglei Matupi peng hrambunh CDF-Matupi Battalion 2 in ralkap pakhat cu ralhmai a kal lio ah bomb chuahsualnak in May 23 ah a nunnak a liam, tiah CDF Matupi nih an thanh.
Matupi-Hakha lamthluan ah a cawlcangmi CDF-Matupi ralkap hna ngandamnak a zohkhenhtu an tlawm pinah Matupi-Hakha lamthluan um khuate ah sii-ai kan i phazo ti lo. Ngandamnak lei zohkhenhtu sayamah pakhat nih kan ralkap pa cu a thlop ve ko nain a hliamhma a fah tuk ruangah lampi ah a nunnak a liam, tiah CDF-Matupi in chimphuannak nawlngeitu nih The Matupi Times ah a chim.
CDF-Matupi ralkap hna lawng si loin SAC ralkap le CDF-Matupi nih an hmanhmi lamhsualnak in tualchung mi nunnak a liammi zong an um pah tawn cang, tiah theih a si. Ralkap hna ngandamnak a zohkhenhtu an tlawm ruangah le rianrang in i thlopbul zau a si khawh lo ruangah tualchung mi le CDF ralkap nunnak a liammi cu 5-7 kar hrawng an si cang, tiah The Matupi Times nih a ṭial.
hlichia Nih Chin Ramkulh Chung Ah Inn 3,000 Deng A Hrawh – ICNCC; A luancia May 14 ah hrangmi Mocha thlichia nih Chin ramkulh chung ah tualchung mi inn, Biakinn le biaknak he aa pehtlaimi inn, rawlruk, sii-inn le cacawnnak sianginn telh in inn 2,774 a hrawh, tiah Interim Chin National Consultative Council(ICNCC) nih nizan May 23 ah cathanh an chuah.
ICNCC nih cathanh an chuahmi ah Matupi peng chung lawng ah inn 1,211 a rawk i, Chin ramkulh chungah inn rawkral a tam biknak a si, tiah an langhter. Paletwa ah inn 400, Mindat peng ah inn 654, Kanpalet peng ah inn 211, Thantlang peng ah inn 41, Falam peng ah inn 100, Hakha peng ah inn 105 an rawk, tiah an langhter.
Cu pinah sianginn 185, biaknak he aa pehtlaimi inn 102, ngandamnak zung he aa pehtlaimi inn 12, rawlruk 259 le Hall 6 an rawk i, inn zuat saṭil 69 an thi an thi, tiah an langhter. Inn rawk ral remh ṭhannak ding ah thirkhenh le chanpheo an herh i, hartongmi hna nih facang le sii-ai zong an chambau ngai, tiah an cathanh ah cun an langhter. Credite; The Chin Post