Pu Zing Cung, Dr. Lian Hmung Sakhong, Dr. Sui Khar Hna Tlangcung Hriamtlai Phu Nih Bochannak Kong!

Dal Thumnak (A peh 4) Thazaang Fimkhur!
=========
Kawl nih independence an rak khel lio ah hriamtlaih in Mirang kha an doh, Japan zong an doh. Kawl ralkap nih hriam thazaang in kan Ramkomh ah Kawl lianngannak kha an ser: Kawl miphun, Kawl holh, Kawl biaknak kha an hlorh. Tlangcung miphun hna nih hriamtlaih in independence kan rak khel ve, Kawl ralkap kha kan doh. Atu ahcun federal kan khel. Kawl ralkap he bia kan ruah tikah kan thazaang in an kan tah. Cucaah, thazaang sersiamnak hi a biapi ngaingai.

Kum 70 leng ral kan tu cang ko nain kan ramkhel buainak cu kan tawlrel kho lo. NCA ah, ramkhel buainak kha raltuknak in si ti lo in ramkhel biaruahnak in tawlrel dingin hnatlaknak kan ngei. UA ah federal phung le zauk phung in kan Ramkomh ser dingin biakamnak kan ngei cang. Zeibantuk federal phung le zauk phung in dah kan Ramkomh kan ser lai timi ceihhmai a hau rih. Kan biakhelnak nih lai a rel te lai. Cucaah, ramkhel biaruahnak hi a biapi ngaingai.

Thangzaang hak le Thanzaang nem hi pahnih ah pakhat thim dingmi thlurtinh cu a si lem lo. Ramkhel biaruahnak le thazaang sersiamnak cu aa tlaimi an si. Cucaah, CNF/CNA nih ramkhelnak le runvennak kha ruang tein kan kalpi lai kan ti. Phun dang in kan chim ahcun, thazaang fimkhur kan hman lai – ralkap thazaang zong kan ser lai, ramkhel biaruahnak zong kan tuah lai.

Thazaang in a cawlmi cu thazaang in nam a hau ko. Kawl ralkap kha ‘pressure’ kan pek khawh lawnglawng ah kan duhmi kan hmuh khawh lai. EAO, Ramkhel phu, media phu, biaknak bu, zatlang bu, mipi, ramdang tbk. vialte nih pressure pek a hau. Cun, khatlei ah, ramkhel biaruahnak zong kha ngol lo in tuah peng ding a si.

Mipi Dohthlennak; CNF/CNA nih hriamtlaih dohthlennak lam kha kan thim. Chin mipi dohthlennak in Chinram sersiamnak lam kan thim. Chin miphun thazaang kha kan zumh, Chin miphun kan lung a rual ahcun zei thil paoh kan tuah khawh lai tiah kan zumh. Chin mipi dirkamhnak thawng in kumpi kum 30 leng fek tein kan dir, hriamtlaih dohthlennak kan tuah. CNF/CNA ah pengtlang kip i Chin pasaltha, nusaltha hna kan um, sianghleiruun siangngakchia hna tampi kan rak um caah ‘siangngakchia pawl’ tiah rak auh kan si. Sihmanhsehlaw, ram le miphun caah nun aa pemi kan tlawm tuk i miphun dang bantuk in kan ralkap a thawng kho lo.

Tuluk nih dohthlennak an rak tuah lio ah, ‘miphun cawlcanghnak a chuah khawh nakhnga ka thih a hau’ tiah thihnak kha a rak thimmi hruaitu hna an um. Chin Liberation Army (CLA) ralkap pawl thisen authawng, Chin National Army (CNA) ralkap pawl thisen authawng hi Chin miphun nih kan thei kho ti lo maw? Kawl ralkap nih Chin miphun an kan tuahtonak vialte cungah lungfah awk kan thei ti lo maw? Chinram pennak, Chinram sunparnak cu hitihin maw a lo cang ko lai?

Mirang kan doh lio ah Chin miphun nih meithal a thawngthawng in kan rak ngeih. Chin Rifle zong ah ralkap a thawngthawng kan rak um. Sihmanhsehlaw, cu hnu ahcun ralkap thazaang kan ngei kho ti lo. Chinram ah Chin pasaltha, nusaltha kan chuak ti lo maw? Chin miphun hna phun ttanhnak, ram dawtnak, ralthatnak le sunparnak vialte hi kan pipu tuanbia ah maw kan phum chih cang ko lai?

Atu ah, Kawl ralkap lawng kan ral an si ti lo. Chinram chaklei ah ral kan ngeih, Chinram thlanglei ah ral kan ngei. Chinram a him lo, Chin miphun a him lo. Ral ruangah kan mipi nih harsatnak phunzakip an intuar. CNF/CNA zeidah an tuah tiah an ti. CNF/CNA thazaang cu Chin mipi an si. Chin pasaltha, nusaltha hna CNA ah an rak lut cio ahcun kan ram cu kan runven khawh ko lai. Chin mipi nih zeitindah kan ruah? Kan pi le kan pu hna bang kan Chinram runven dingin kan ruat kho lai maw?

Kawl ralkap nih an phunghram a hmunh zungzal khawh nakhnga kahngolnak an tuah, zalonternak an tuah, ramkhel biaruahnak an tuah. Nain, thazaang hak kha an hman peng. Ramkhel biaruahnak in ramkhel buainak tawlrel kan duh ahcun thazaang zong kan ngeih a hau tinak a si. Kan ram buainak hi a sau tuk cang. Tutan ah, kan thazaang dihlak chuah i kan tawlrel a hau. Chin mipi nih zeitindah kan ruah? Kan ram a fel khawh nakhnga ral tha tein kan dir ngam lai maw?

Thazaang kan ti tikah ralkap thazaang pakhat lawng a si lo. Biaknak bu, ramkhel phu, zatlang bu, media phu vialte telh in Chin mipi thazaang kan ser a hau. Chin miphun hi kanmah le tawk tein kan za ve ko. Pu Zing Cung, Dr. Lian Hmung Sakhong, Dr. Sui Khar tbk. CNF kan pa le pawl hi EAO nih bochanmi le Cozah/Ralkap nih theihpi mi hna an si. Rev. Dr. Pau Khan En, Rev. Dr. Samuel Ngun Ling tbk. biaknaklei kan hruaitu pawl hi rampumhuap in khrihfabu le baibal sianginn pawl nih bochanmi an si. Chaw Su Khin, Sung Tin Par tbk. hlasakthiam pawl hi rampumhuap in min a thangmi an si.

Company zong kan ngei, NGO/CSO zong kan ngei, media phu zong kan ngei, Football Club zong kan ngei, private sianginn zong kan ngei, tbk. Sihmanhsehlaw, kan hram cu a fek taktak rih lo. CNF zong thawng ngai le cak ngai in kan cawl kho lo. CBC zong kan duhning in kan cawl ko. Chin company pawl zong rian ngan deuh cu kan tuan kho lo. Zatlang bu zong ningcang in kan ser kho rih lo. Media phu zong tampi kan bau rih. Miphun pakhat kan si tikah miphun tahfung in kan tah ahcun kan zuam ngaingai a hau rih ko. Thazaang hak a hmangmi zong kan thawn a hau, thazaang nem a hmangmi zong kan thawn a hau, thlacamtu zong kan thawng a hau, thawngzamhtu zong kan thawng a hau, kan thazaang dihlak kan fun a hau. Zeitindah khua kan khan hna lai?

Miphun Lungrualnak; Miphun lungrualnak cu ral kan ngeih caan ah a chuak asilole a lang khun tawn. Chin miphun sining cu Kawl he pehtlaihnak in kan ser tiah a cunglei ah kan rak langhter cang. Atu bantuk in mipi dohthlennak kan tuah lio ah, kan ral kan doh a hau ve bantuk in Chin miphun pakhat kan sinak kha kan ser ve a hau. Tu lio caan hi ral tampi kan ngeih lio a si i miphun lungrualnak sernak caah caantha bak a si.

Kan rian cu miphun dang nih an kan tuanpiak awk a tha lo. Kan ral cu a ho hmanh nih an kan thawlpiak lai lo, kanmah tein kan thawl hna a hau. Cun, Self-determination, federal le zauk phung hna cu kanmah tein lak a haumi le ser a haumi an si. Kum Zabu 21nak Panglong Tonpumhnak cu kum 70 hnu ah a chuakmi a si, zeitindah a thacem in kan hman khawh lai timi ciamman tein kan ruah a hau. Pumpak cio kan thil ti khawhnak lawng a za lo, a bu in thil ti khawhnak zong a hau, a bu in thil ti khawhnak lawng zong a za rih lo, miphun ning in kan cawlcangh a hau. Kan umnak hmunhma cio in Chinram humhimnak le Chin miphun lungrualnak caah zeidah kan tuah khawhmi a um lai?

Miphun cawlcanghnak a chuak khawh nakhnga thisen maw luanhter kan hau rih lai? Ram dawtnak, phun tanhnak cawnpiaknak in a chuak kho lai maw? Zeidah kan tuah awk a si? Mah hngal lo kan si nakhnga lo miphun hngalhnak (national consciousness) cu a sangcem ah kan sanh a hau. Chin miphun humhimnak (national security), Chin miphun thatnak le hlawknak (national interest) caah pengtlang khuaruahnak lonh in miphun lungrualnak (national unity), miphun cawlcanghnak (national movement) kha zeitindah kan tuanchuah hna lai? Miphun lungrualnak lawnglawng hi miphun nunnak lam a si. Zei dang lam a um lo. Credut: Pu Ram Kulh Cung