Pu No Than Kap: Tuanbia hlun Pawl zoh Thannak A tialmi a mak bak!

THUANTHU KIRSAL: THU MAKSAK
=========
1988 ah Myanmar Rampi a buai vutvo. 2007 le 2021 ah Ram pumpi a buai lala. Hivek ciah in Independence ngah pekte 1948 ah nasaten a rak buai dah. Thuanthu vei 2 a kirsal ti theih a si. Mipi hriltlin uktu thuneihnak (AFPFL) do can a um (1948), Ralkap uknak duh loin do can a um (1974, 1988, 2007, 2021).

BAMA le BAMA (1948) Myanmar in January 4, 1948 ah Independence a ngah hnu thla 3 hman kim hlan March 28, 1948 ah, Bama Communist (Ralkap 10,000 -15,000) cun hriamhrei thawn PM UNu ih AFPFL Cozah (uktu) dinglai an do thawk. Independence hlan ih Aungsan in a rak din mi People’s Volunteer Organization (Pithuh Zebaw 4,000 luan) in July 28, 1948 ah Bama Communists cu an fin bet.

August 8, 1948 ah 30 Comrades (Zebaw Tungcik) ih tel kum 28 upa Bo Zeyah ho No.1 Bama Regiment (ralkap 300 luan) in siseh, Bo Zehtut ih ho No.3 Bama Regiment (ralkap 100 luan) siseh, Bo Aungmint ih ho No. 6 Bama Regiment (ralkap 200) rualin siseh, an zaten Battalion (3) in Communists cu an fin bet lala.

Ayeyarwady, Bago, Mandalay and Magwe region ih khuapawl an luah hnuah Pyinmana, Yamethin, Myingyan le Pakokku pawl an luah ih umhmun khuarin Unu Cozah an do. Culai ah Rampi mipum 17 million lawng a si. Tu ah 55 million. Cutin, Pyi khawpi le kiangkap an lak bet hnuah motor 32 thawn Cozah hmunpi Yangon lak tumin thum dupdoin an pan.

Mechine guns, Pukpi le Tank tiang an nei thluh. Cozah dotu ralkap (Tapung) cu 20,000 luan an si. Khatlamah, Cozah ralkap cu Col. Newin ih ho 2,000 fang an si (20:2 tluk an si). Himi 2,000 hman hi Battalion famkim ten dinmi hman an silo thu beidong zetin thuanthu thiamsang Dr. Maung Maung cun a ngan.

Asinan an neih sun thilri phur vanzam 2 in bomb an rak thlak ih an dolet. Cozah ding lai a si ruangah India in Ralthuam thawn a bawm ih Unu cozah a cak. Ukawkdan (Ideology: democracy le communism) duhzawng bangawk lo ruangah Bama le Bama an doaw ih pakhat deuhin a neh.

KAREN (Tlangmi) le BAMA; Himi hnute January 30, 1949 ah Karen Sawbah U Kyi ho ralkap 10,000 luan KNDO (KNU) in UNu Kawl Cozah an do lala. Pyay ih um Karen battalions 2 (Pyay le Taungoo ih um), Karen palik in KNDO an zawm. Kachin ralbawi kum 27 upa Naw Seng ih ho #No.1 Kachin Rifles khalin KNDO an bawm. Maymyo, Mandalay tipawl an la thluh.

Asinan, Col. Hrang Thio ho 1st Chin Rifles (Chin Ralkap) cun Karen bawm loin UNu ho Bama cozah an bawm. “Insein Ral”timi a thawk. A thawkpek ah Karen lam an cak ih Yangon lawng an la lo. UNu cozah cu nautat zetin “Yangon Cozah” tin hmin an sak phah.

HMANSEH, Ralkap 2,000 fang nei Yangon Cozah cun nuamte ten an hnak ih tam le cak Karen an nehsal. ZIANGRUANGAH?
1)- Cozah ding lai a sinak in PM UNu cun India PM Nehru hnenah ralthuam bawmnak a dilih a ngah. Ramdang BAWMNAK (Foreign aid) thupitzia a lang.

2)-Chin ralkap in Kawl cozah a rak kawp a rak bawm. Chin um lo sehla Yangon cozah cu a cem! 3)- Tuhlan ih Unu cozah rak do rerotu Ralkap Batallion 3, Pithuh Zebaw 4,000, Communist 15,000 an zaten 20,000 luan cun Karen KNDO (Tlangmi) do dingah an lungrual. THUMAK a tling.

Hisin THUFIANG vuarvi cu, Bama cu anmah le anmah “Lal tohkham” cuhaw le thuneih cuhaw ah ziangtlukin doaw, kapaw in piataw rero hai hmansehla, Tlangmi kut hnuaiih lut hnak cun lungkhat pu in an ṭangtlang, an dingtlang thotho. Annih cu rampi ah mipum tambik an si, thuanthu sauzet nei duhaw tlakzet miphun khal an si.

Ziangtik lai khalah, Ramthu politics ahcun Tlangmi vekin Bama in thu an ruat dah lo, Bama cun Bama vekin thu an ruat ringring, Mai sungkua doawk le thupi cin an thleidang ringring. Tlangmi, a hleice in Chinin Chin vekin thuruat ih feh hnakin Bama vekin thuruat le thu fehpi kan hmang, kan uar.. Dungthluntu rinum si thei nuam kan ti cuang. Hlanlai thu vek men.. tu hlan vek a si nawn lo ding, San a thlengaw zo.. Bama ee.. Chin ee.. Tlangmi ee .. ti can a silo, Democracy ngah hmaisa dingin tuan tlang a thupi KAN TI MAW!

Zoh bet sehla: 1962 March 2 ih Ralbawi Newin in rampi uknak UNu hnenin a laksak hnuah democracy ngahsal dingih nunnak thapin UNu dinpitubik cu Tlangmi; 1974 phunsang zirlai buai ah democracy ngah dingih hmaituangtubik cu Tlangmi (Chin: Salai Tin Mg Oo); 1988 buaiah democracy ngah dingin nunnak thap in Bama democratic forces dinpitu cu Tlangmi, 1990 le 2015 hrilawk tiangin Tlangmi tam sawn in Bama democracy sualtu cu dinpi a si. Tlangmi cun Federal lawng si loin “Democracy ngah a thupi..”ti ringring a si.

Hmanseh, Kan ding tlang vivo hmang ti laiah, doaw rero annih cu an rak remawsal theu, Tlangmi saduhthah cun an lungmuril a kheng ban lo, buainak a cem ih thuneitu tohkhamah an to veten an tidan kelten Bama vekin thu an ruat ih an fehsal cingcing.

Tlangmipawl aupi rero mi, Bangrep nun (equality) le mai ramkulh tlunih mahte thuneihnak (self determination) phunphun lakih niambik Federal democracy men hman, ngah dingih zuampi cu sim hlah, dokalhtu ah an cang thluh ti cu hmuthiam duhtu hrangah “tualrawn bite ih Saicang ding liailiai” vek..!


Curuangah,

Amahten kirsal rero Thuanthu le THU MAKSAK tling hi hmuthiamin kekardan zirthiam a cu. Ramfinkhawm (Union) ih um vivo kan hril ahcun, Democracy dokhalh uknak pohpoh do ding, Democracy vekih hrilmi Uktupawl khal Lalsual ukdan (dictatorship) an hman ahcun do thotho ding. Tlangmi in Tlangmi vekin thu a ruatih a feh khal amai thu (his right); Bama in Bama vekin thu a ruat ih a feh cu amai thu (his right). A thupi mi cu

Miphun zarawi Rampi dintlang kan lungkimzo (Pinlung thukam) ruangah, hmuhdan dangdang nei cingin umtlang thiam, miphun pakhat le pakhat duhdan thlunsakawk thiam a si. Pinlung thukam hlan (Pre-panglong) ah kirsal in Mirang kai hlan (Pre-British advent) ah kirsal kan tum lawlaw ding ti le thuhran!