President Zelensky nih Kyiv khuapi Russia nih nan lak khawhnak ding ahcun!

Russia Vs Ukraine War Ah Ka Hmuh Ning Tawi
======
Russia nih Ukraine a tuknak cu ni 19 asi cang nain zeipipa a chuahpi kho rihlo caah top general minung 8 tiangin an rian a phuah cang hna tiah Ukraine’s Defence Secretary Oleksiy Danilov nih a ti. Russia nih Ukraine a tuk February 24 thokin Russia nihhin China sinah hriamnam (military equipment) bawmh dingin a rak nawl lengmang tiah The Washington Post nih cun a chim.

Hi kongah China nihhin a hriamnam cu a bawm maw bawm tak lo timi kong cu U.S. official pawl nih fiannak an tuah lo. Sunday ni i Russia bomb thlatu vanlawng mawng Ukraine ralkap pawl nih an kahthlak i an tlaihmi Lieutenant Colonel Maxim Krishtop nihcun “ Putin midang vanthat dingin orders na kan pekmi hi ma cang dingin forhfial kan duh, hi raltuknak hi ma cang, hi ral hi kan sungh cang hi na hmu lo maw” tiah a chim.

Nizaan March 12 i French President Emmanuel Macron le German Chansellor Olaf Scholz nih Putin cu daihnak kongah minutes 75 tluk phone in an call nain Putin nihcun daihnak kong an ceihpi mi hi zei pipa ah a rel duhlo I a lung a khong tur ko rih an ti. Ukraine hi lak khawh ding hrimhrim in a lamkip um chun in ai tim peng ko rih.

Ukraine nihcun Russia ralkap minung 12,000 renglo kan thah cang hna i kan ralkap minung 1,300 tluk nih an nunnak an pek ve cang tiah an chim nain Russia lei report lei nih cun zeihmanh ah chim lo. Zeilei tanh ngeihlo neutral lei in catialtu Wikipedia nihcun March 9 tiang ahkhan Russia hi 6,000 tluk an thi cang lai i minung 13,000 tluk nih hliam an tuar cang lai, Ukraine ralkap hi 4,000 tluk cu ah thi ve cang lai tiah US official pawl zumh ning hawih in report a pek.

BBC nihcun a thimi zah hi a fiang lo caah chim awk a tha lo a ti ve. Kyiv khuapi cu ralhau faktuk in an siam caah Russia ralkap nunnak tamtuk pek hau in lak hau ding phun a vun si cang. Russia ralkap pawl zong nih cun i fiangtuk ve cang hna kaw an tactic an vun thlen ve i a kulh in kulh an i tim deuh cang.

Ukraine President Zelensky nih Kyiv khuapi Russia nih nan lak khawhnak ding ahcun Carbet-Bomb nan Hman a hau lai, cu bantuk in Ukraine mipi thi viar hna seh ti nan duh ahcun vun ra ko u ca tiah a ti ve. Kyiv khuapi chung ahhin ralkap zeizat dah an um timi cu theih khawh asi lo nain Ukrainian mipi cu nu he pa he hriamnaam an tlaih dih nawn caah a tlawmbik minung ting khat paoh nih cun Kyiv khuapi hi an ven lai zumh asi.

NATO le ramdang tampi nih Ukraine hriamnam thatha an vun bawmhmi cu Russia caah cun an i ruah ning in thil a kalter kho ti lo tikah NATO le ramdang nih hriamnam bawmhnak an vun peknak hmunpi le training kainak bik Lyiv khua kiang cu missiles 30 tluk in an vun kah i minung 35 tluk an thi i minung 134 tluk nih hliam an tuar. The New York Times nih a tial ning ahcun Russia nih missiles a vun kah lio ahhin Ukraine bawm dingin a kalmi Foreigner fighters minung 1,000 tluk nih training an kai lio asi ati. Lyiv khuapi hi Ukraine ah an khuapi bikmi pathumnak asi i ralkap hmunkip biapi taktak (stronghold) bak asi.

Russia hi vawleicung ah raltuk lei ahcun US changtu ah kan ruah nain sipuaizi leiah a thawn tuk lo tikah a advanced military weapon tampi a chuah kho tuk lo, S-400 hna khi 28 tluk lawng a ngeih in an tuak piak. A tam u cu Cold War lio (1960 lio) ah an rak siammi deuh an si tikah NATO le US pawl hriamnam lakah cun an khu vuaimai tawnnak khi asi bik.

Putin nih i ruah sual in Ukraine a tuk vaivek caah a maktak ngam te lai maw, asiloah biaruahnak in dah an donghter te lai timi cu ruah tlak asi. Russia nih Afghanistan a rak tuk 1979-1989 kum 10 chung ahkhan a ralkap 14,000 tluk nunnak a rak liam nain Ukraine a tuk ni 18 chung ah cuzah cu an thi deng cang. Tutiang an dirhmun zoh ahcun Russia nih Ukraine hmunpi pakhat hmanh an la kho rih naisai lo, Ukraine ram dihlak an lak tikah cun minung a ting nih an i thih kho te men lai.

Ukrainian minung pawl hi an sungh hnu zongah mujahideen pawl bantuk in mi raltha an si tikah Guerrilla warfare bak in an tuk ve te hna ahcun Russia caah cun a lam hi a har ngaingai ve ko. Cucaah Putin hi a molh thlu ve lo tikah Western countries pawl sanction, ral kut in tamtuk an thih tikah anmah ramchung lila ah buainak a chuahter khawh lai caah a mah nunnak tiang a liam kho asi timi ai fian ve ko lai caah daihnak hi ai ham deuh ve lai zumh a um. Credit: Chelsea Bawi