Pomb puahsual a tong mi kan pasaltha minung pa 4 an thawngpang background an vun theih cu dah!!

Kan Rau Nih A Rak Hngalh Ko Rua!
================
Pafa hmelpalh a ti cang. Zaanlei mui hualham ahkhin Commander he Council meeting in Camp kan phan. Ruah siamsiam nih a kan ciar ter pah. Dengteo amah buk kan fuh. Sakhanhmu nih a rak kan don. Ralkap pahnihthum zong an hunglut. Thadit damh pah khin panh ngai in kuan kan phurh mi kan samh. Khoimaw thaitholh fimtawl bang.

Tuzaan cu zaandang a kel ko. Zarhtin pastor umpi tu Camp Chaplain zong a rak um. Zarhpi zaan a si. A muih khin khawmh dar an tuk colh. Kan nih kholhtawl le zaanriah ei ah Chapel kan tanh deuh lo. Pumhchuah tu in pastor kan leng lai tiah Commander he kan i ruah pah.

Pumh an chuak. Kan nau le he kan biaruah a hung tlo. Ralkap cheukhat kan buk ah an run i chap pah khin pastor inn ah kan i thial. A caan caan ah khuadawm nih Thlapa ceu a hun thlah tawn. Zaandang bang Camp ka riah zaan ah pastor he biaruah duh ah Sakhanhmu, Commander he Pastor inn kan fuh.

Cu hrawng ah cun kan nau le tam-u cu coka ah bu thup in an thu. Thlavang hawh lai bang Tingtang an tum len. Kan nau pakhat cu hla cauk chah nawn pi he coka lei ah a run tli. Coka lam kan hun tan pah ahkhin meikam ai bu mi kan nau le cu hlasak an i thawk liopi a si. Zuunhla an sa lo. Khrihfa hlabu an sa cuahmah. Ka lungthli in Crusade tuahka a si i dah maw, Hlabu sak an cim lo a si theo lai ka hei ti. Tlo ngai in KHB an sak len khi kan hna in kan hei ngaih ko.

Pastor inn ah sau ngaite kan i leng hna. Kei hoi hna cu 11:00 pm deng tiang Pastor he kan i kom. Cu tiang ah cun kan nau le hlasak an ngol kho rih lo. Ka hna in ka hei theih mi hla pakhat cu Khrihfa Hlabu No.25 kha a si. “Kan bu in kan i ton than hlan tiang” ti kha a si. Hna nih hi hla an sak khi a hei theih ko. Hla dang an sak mi cu ka cing lo nain cu hla te cu ka hei theih ko. Voikhat lawng an sa lo.

Kan ralkap Tum Bawi Tling nih “cu hla te cu nolh than ko rih usih” tiah ai thawh nolh i kan sak nolh tiah a hnu ah kan ralkap nih an chim. A thaizing 10 October 2022 cu zingdang kel bang in kan tho ko. Thantlang lei in kan nau Biak Tha le Chan Chan an rak phan ve. Pastor kir ding zing a si ca ah sakhanhmu nih ar a thah. Rawl ei lai ah pastor nih thla a cam. Thaw ngai khin kan ei cio ko hna.

Ei hlan deuh ah kan dinning hall sak ding tungvang kan tah len. Coka saknak kan tah lio ah Biak Tha cu a hawi le capo a hung saih len hna. Kan hei ni len ko. Ei khawh cun kei kai thawh. Ruah lo hi zing thil kan hun ton cu, kan thi a lau. 40 minutes hrawng a rauh ahkhin ka phone a ring. Dir in ho hen tiah Secretary nih hi thawng a run ka thanh. Hlauhsaphawk ka lung a caw khut.

Khulrang in kan siizung ah an run tlikpi hna cu, thi le daw he tunai te capo a sai hiahmah mi kan nau le cu an rung zonh ko hna. Kan rau nih van a au colh. Zei hme kan tuah hmasa lai kan ti. Hruaitu cio ko kan i zoh ah kan mit a phiing dih. Kan thilton a rang tuk. Zeimawrek lo thil. Kan bomb storeroom ah ral lei hriam kan rak chiah mi kan fimtawlnak ah hithil kan ton a si.

Kan nih CDF-Thantlang Battalion-4 hi kumkhat le thlasarih kan kalchung ah avoikhatnak hliamkhuai fak le thihloh hi kan ton a si. Kan ton tir ah fakkhun in kan ralkap fel bikbik chung ah Salai Biak Tha Peng le Salai Tum Bawi Tling hna nih an kan liamtak. Kan zaang a zun i, kan thin a phudip.

Aw, minung nunnak ngai hi kan ti. Thilcang hnulei run ruahthan tikah kan rau nih a rak hngalh ko rua. Ruak he kan kir, mawtaw cung ah Biak Tha Pa le Tum Bawi Pa he mawtaw hnulei ah kan cuang. Khuadawm an chah lo. Kik lakah kan pathum in bia kan i ruah hna. Biak Tha pa nih “nai cikua ka mangmui a rak chia” a ti.

Siizung kan riantuantu nih “zahan nai cu ka lung in mithi hla rumro ka sa” a ti ve. Kei cu zei mangmui le rau hngalh cu ka ngei lo nain; zing bomb inn kan kal lio ahhin kan ralkap bomb zohtu nih bomb pakhat a run chuah. Phone kai chawnh lio asinain, “kha bomb kha tawng hlah, fim zok” ka hei ti len.

Thil kan ton lai zaan kan ralkap nih coka hla an sak mi KHB 25 kha ka hna ah a rung cuang than. Cu hla te cu ka kau than. Kan rau nih a rak hngalh i ta, “an rak i thlah ko hna hi” ka ti. Pathian dawtnak in kan nih Battalion hi tukum chung ah crusade voihnih kan tuah kho. Avoihnihnak kan tuah ahhin kan nau Tum Bawi cu Pathian bia a hlanh i, heh tiah a laam.

“A sunglawi tuk hih, a caan lio te a si hih” tiah Bawipa thangthat nak he a lam. Kha lio ah hi lai kan rak hngal lo. Tutan kan crusade cu kan ralkap hna Pathian bia nih fak piin a hlanh hna. A dongh zaan zong cim hngal lo in Bawipa an thangthat.

Kan ralkap hna ralram in an tlun i thlacamnak le tehtekhannak an ngeih caan ah an bia ka cin peng mi cu “A nung mi Pathian a um” tihi a si. Bawipa nih Biak Tha le Tum Bawi cu a hram ah a dinhter cang hna tiah ka zumh. A caan ah cun Bawipa ziah hen a fel bikbik le a tha bikbik hna hi na kan lakpiak tiah chalh awk te khin a um.

Kan ui hringhran hna. Asinain, Bawipa kut ah an i din hrimhrim ti ka ruah zawn tu hin ka hna a hung ngam deuh tawn.
Khrihfa Hlabu 25 ah hitin ai tial.

Hla-1. Kan bu in kan i ton than hlan tiang in, nan sinah Pathian um ko seh. Amah nih him in keng ko seh. Amah chimhhrinnak in lamsial seh. Kan i ton than hlan tiang, , Jesuh sin kan i ton tiang. Kan i ton than hlan tiang . Nan sinah Pathian um ko seh.

2. Kan bu in kan i ton than tiang in, Kan sinah Pathian um ko seh. A thla in in hupphenh ko seh. Nifa tein rawl in pe ko seh. 3. Kan bu in kan i ton than tiang in. Nan sinah Pathian um ko seh. Sifahnak kha na hmuh tikah, Nangmah kha a kut in pom ko seh.

4. Kan bu in kan i ton than tiang in, Kan sinah pathian um ko seh. Dawtngiatnak puan kha lek ko seh, thihnak tilet kha daihter ko seh.

Tum Bawi le Biak Tha; tutan dohthlennak ah kan Battalion lawng hmanh lo in, midang bochantlak ralkap tha tuanbia nan ser. Nan nunzia hi a tang rih mi hna nih CAWN AWK tha taktak an si. Pumpeknak, nawlngaihnak, Pathian bochannak le zumhawktlak sinak ah ai zuam mi nan nunzia hna nih cawnpiaknak tha taktak an kan pek.

Nan kal lai kha nan kan chim ta lo nain, nan kal lai kha kan rau nih a rak hngalh ko. Dohthlennak a dih hlan tiang; Federal zaukphung le ralhrang uknak a hram in bongh ding ah a tang rih mi Dohthlennak rian tu cu kan nih nih kan run pehzulh lai mu.

“Kan bu in kan i ton than hlan tiang, kan sinah Pathian um ko seh.” KAN RAU NIH A RAK HNGALH KO. Nan dawt mi hruaitu le nihin ah thisen biakam he an upat hna tu. Salai Tial Hram Ling.

Relchap, Paletwa Ah SAC Ralkap Nih Tualchung Mi 2 An Tlaih Hna , Chin ramkulh, Paletwa khuapi ah SAC ralkap nih khualtlawng cazin kongkau he pehtlaiin October 13 ah mino 2 cu an tlaih hna tiah tualchung mi nih an chim.

Tlaihkhih a tongmi hna cu kum 20 luan mino an si i, an pahnih in pa-yan rianṭuanmi an si tiah theih a si. Tlaih a tongmi pahnih chung in pakhat cu October 13 zaan ah khualtlung cazin an checklio ah an tlaih i, pakhat cu a thaizing zinglei ah an tlaih tiah tualchung mi nih an chim.

An pahnih in Paletwa khuachung Rakhine sang tiah auhmi(Rakhine miphun tampi an umnak) Paloauktaung(ပလုတ်တောင်) sang ah an tlaih hna. A tutiang ah tlaihkhih a tongmi hna an konglam thawng theihmi a um rihlo tiah tualchung mi pakhat nih a chim.

Mingaladon SAC Vanlawng Tual Chung 107mm Hriamngan In Kan Kah Tiah Dohthlengtu Phu Nih An Fehter, Yangon ramṭhen, Mingaladon SAC vanlawng sakhan chung ah 107 mm hriamngan lung 3 in October 14, zaanlei ah kan kahdoh hna tiah dohthlengtu phu nih an chim.

“October 14, zaan suimilam 7:50 renglo deuh ah 107mm lung 3 in Mingaladon vanlawng sakhan chung kan kahdoh” tiah dohtglennak tuahtu phu chungtel ralkap pakhat nih an chim. “A si, vanlawng tualchung an kah ti cu a fiang, vanlawng an i rawk le rawk lo cu kan thei lo” tiah vanlawng tualchungum mi pakhat nih a chim.

Monywa Ah SAC Ralkap Motor Pakhat Kutcheh Bomb Puahhnawh An Tong, 3 An Thi, Sagaing ramṭhen, Monywa ah SAC ralkap motor pakhat cu kutcheh bomb hmang in kan kahdoh hna caah minung 3 an thi tiah Myanmar’s Royal Dragon Army(MRDA) phu nih an chim tiah theih a si.

SAC ralkap motor cu Monywa khua tar zohkhenhnak hmun pawng a dir lio, October 14, zaan suimilam 5:41 ah tualchung hriamtlai phu hna nih kutcheh bomb hmang in an doh hna caah SAC ralkap 3 an thih hi a si i hliamhma tuar zong an tam tiah theih a si.

Cu kahdohnak cu MRDA battalion 6 ṭat-khuai 1 Monywa, Nway Oo Tetsa pah-kah-phah, Nation People Defence, Monywa Generation phufonh nih an tuah mi a si tiah MRDA nih an thanhmi ah an langhter.

Mizoram Ramkulh Ah Rupee Sing Thongthum Leng Man Bing Raang An Tlaih, Mizoram ramkulh, India-Myanmar ramri, Camphai peng ah rupee sing thongthum man leng bing raang cu Mizoram palik phu nih October 14 zinglei ah an tlaih tiah theih a si.

Camphai ah ummi Lalawmpuia cu October 14, zinglei ah taxi a khalh lio Camphai khuathar Tuipui tiva pawngah Mizoram palik nih kan tlaih tiah Mizoram palik phu nih an thanh. Mizoram palik nih an tlaihmi bing rang cu sapiat bawm 500 chung ah an khumh mi a ai i, rupee sing 3418 man a si tiah Mizoram palik nih an chim.

Yephyu Ah SAC Ralkap Gate Pakhat Kahdoh An Tong, 4 An Thi, Tanintharyi ramṭhen, Yephyu peng Ye-Htawai motor lampi cung um Kalingaung(ကလိန်အောင်) hleidonh um SAC ralkap check gate cu nihin October 14 ah kahdoh an tong tiah theih a si.

October 14, zinglei suimilam 3:30 hrawngah hriamtlai phu pakhat nih SAC ralkap check gate cu hriamngan le hriamhme hmang in an kahdoh hna tiah tualchung mi pakhat nih a chim. SAC ralkap check gate kahdoh an ton caah ralkap 4 an thi, hliamhma tuar zong an um tiah kan theih. Hliamhma tuarmi hna cu dei hnu ah sizung ah an kalpi hna tiah tualchung mi hna nih an chim. SAC ralkap kahdoh an tonnak kong ah mi zei phu nih an kahdoh hna timi cathanh chuah in langhtermi a um rih lo.

KNDF Battalion 1 Le SAC Ralkap Kar Thlakhat Chung Kahdohnak Ah SAC Ralkap 15 Hrawng An Thi, Kaya ramkulh ah KNDF battalion 1 le SAC ralkap kar thlakhat chung ikahdohnak ah SAC ralkap 15 nak tlawmlo an thi tiah KNDF battalion 1 nih an chim. Kahdohnak chung ah SAC ralkap lei a thimi hna kong he pehtlai in KNDF battalion 1 in chim phuannak nawl ngeitu pakhat nih “ral hmaisa kalmi hna nih thawngpang a kan pek ning tein kan fehtermi an si ko” tiah a chim.

SAC ralkap hna cu KNDF battalion 1, battalion 4, battalion 18, battalion 19, battalion 7, KA le tualchung hriamtlai phufonh an ṭang i, kaphnih kar i kahdohnak voi 6 nak tlawmlo a cang. Cu kahdohnak ah cun battalion 1 in ralkap 2 an nunnak a liam tiah KNDF battalion 1 nih cathanh an chuah.

Monywa-Mandalay Lampi Ah SAC Mawtaw Bomb Puahhnawh An Tong, 15 An Thi, Sagaing ramṭhen Monywa peng lampi pakhat ah SAC mawtaw pathum cu October 13 zing suimilam 9 hrawngah bomb puahhnawh an tong i SAC ralkap 15 nak tlawm lo an thi tiah theih a si. Thazaang 100 hrawng nih zulhmi SAC ralkap mawtaw pathum cu Mao (မအူ) khua le Myin khua (မင်းရွာ) kar ah padeta bomb an puahhnawh hna hi a si tiah Monywa Fighter Group in ṭuanvo ngeitu pakhat nih a chim.

A hlankan in thawng kan theih caah timhcia tein kan bawh hna i bomb kan puah hnawh hna, a thi mi an tam pinah kut ke bulmi zong an tam, anmah lei zong nih hriamngan le hriamhme he an kan kah. Kan nih lei cu hriamngan cu chim lo kutser meithal lawng kan ngeih caah kah ngam loin kan zaam tiah a chim chap. Cu kahdohnak cu The Brightness Monywa, Monywa Fighter Group le Peace Taker Task Force hna i bawm in an tuahmi si tiah theih a si.

Butalin Peng Ah PDF Chungtel 2 An Thah Hna, Sagaing ramṭhen Butalin peng Kadoe (ကတိုး) khuami PDF chungtel 2 cu SAC ralkap nih October ni 11 ah an rak tlaih mi hna cu October ni 13 ah tualchungmi nih an ruak in an hmuh hna tiah theih a si.

Thah a tongmi PDF chungtel 2 hna cu kum 33 a si mi Kyaw Myint U le Zaw Myin Khaing, kum 26 hna an si. October ni 11 ah an rak tlaih hna i October ni 13 ah Kyaung khua (ကျောင်းရွာ) ah kan hmuh hna hi a si tiah tualchungmi pakhat nih a chim. Atu bantukin PDF chungtel a tlai i a thattu hna hi Kotaw (ကူတော်စခန်:) palik sakhan in a rak chuakmi an si. Butalin peng ah hin October ni 1 in 13 tiang ah SAC ralkap nih a tlawmbik tualchungmi 3 an thah cang hna tiah theih a si.

Kalaymyo Le Hmualpi Kar Kahdohnak Kong He Pehtlaiin CDM Siyin Nih Cathanh An Chuah, CDM Siyin nih Kalaymyo le Hmualpi kar kahdohnak a chuahmi kongah October 14 ni ah cathanh an chuah tiah theih a si. A cathanh cu a tanglei bantukin a si;

Taingen in Kalaymyo lei ah a kalmi SAC ralkap nih tualchung mi hna cu ralphaw caah tlaih in an kalpi hna, cu SAC ralkap motor ruun hna cu Kalaymyo le Hmualpi khuacuanhnak ah a hosi theihlomi hriamtlai phu nih an rak kahdoh hna tiah theih a si. Cu kahdohnak ruang ah ralphaw caah tlaih a tong mi sualnak ngeilo tualchung mi hna cu hliamhma an tuar tiah theih a si.

Cucaah kanmah CDM Siyin hmunhma chung ah tualchung hriamtlai phu hna sinah a hlankan in theihternak tuah lo in hmailei ah kahdohnak tuah tilo ding in le, a tubantuk theihternak tuah hmasa lo in kahdohnak tuah hi mizapi ralkap phu khat le phu khat kar ah theihthiam lonak a chuah ter khomi a si.

Hmailei ah a tubantuk thil a can sual a si ahcun zei bantuk phu nan si hmanh ah theihthiampiak nan si ti lai lo, cun a tubantukin sualnak ngeilo tualchung mi hna ralphaw ah an hman hna i an kalpi hna ti theih ko buin raltuknak tuah hi fak piin kan doh tiah cathanh ahcun an langhter.

Loikaw Thonginn Ah Ramkhel Lei Thongtla Pakhat A Nunnak A Liam, Karenni ramkulh, Loikaw thonginn ah hren a tongmi ramkhel lei thongtla pakhat cu October 13 ah a nunnak a liam tiah Progressive Karenni People Force(PKPF) nih cathanh an chuah. Cuap le TB zawtnak a rak ngeicia mi kum 21 tluk ramkhel lei thongtla Maung Nge cu a umnak thonginn chung ah sii ṭha tein ai thlop khawh lo caah a nunnak a liam hi a si tiah chungkhar he neihniam in a ummi hna sin in theih a si.

A chungkhar nih a nunnak liammi an fapa Maung Nge ruak lak ding in an i zuam ko na in, SAC ralkap nih an pek duh hna lo caah an la kho lo tiah chungkhar he naihniam in ummi nih an chim. Maung Nge cu 2021, Loikaw check gate ah phone checkpiak a rak tong i PDF he pehtlaihnak na ngei an ti caah SAC ralkap nih an rak tlaih mi a si.

Cu hnuah Phungrelnak caang poh-mah 52 in taza an cuai hnu ah kum 5 chung thong thlak ding in biakhiahnak an tuahpiak mi a si tiah theih a si. Karenni ah SAC ralkap kut in tlaih a tong i ralphaw caah hmanmi le thonginn chung ah a nunnak a liammi hi minung 7 tiang an phan cang tiah PKPF nih an langhter.

Kyunhla Ah Caw Cawngtu Mino 2 Thah An Tong, Sagaing ramṭhen, Kyunhla peng ah Caw a cawngmi mino 2 cu PDF nan si tiah an puh hna caah SAC ralkap le pyusawhṭi phufonh nih an tlaih hna hnuah an thah hna tiah tualchung mi nih October 14 ah an chim.

Kyunhla(ကျွန်းလှ) peng Hngiatpyayṭaw(ငှက်ပျောတော) khua pawng Leikuang ah Caw a cawngmi mino 2 cu minung thazaang 30 hrawng si mi SAC ralkap le pyusawhṭi phufonh nih October 12 ah khan an tlaih hna i an rak thah hna. An ruak cu Kyaukai(ကျောက်အိုင်) khua ah an hlonhtak hna tiah tualchung mi pakhat nih a chim.

“PDF nih bomb an hmanh an ti caah an tlaih hna, motor cung ah an hrem hna hnu ah an thah beh hna, an hmai hi lakawk tlaklo in hremnak hma an tuar. An hnu lei tukbakhur zawn in mei thal an kah hna caah an nunnak a liam hi a si” tiah ruak chartu nih an kan chim.

Thah a tongmi hna cu Hngiatpyayṭaw(ငှက်ပျောတော) khua mi Ko Kyaw Htet(kum 20) le Indai khua mi Ko Aung Htoo(kum 25) an si, PDF chungtel an si lo Caw cawngtu an si tiah tualchung mi nih an chim. Mino 2 tlaihkhih an rak tonlio ah kum 7 ngakchia pakhat zong tlaihchih a rak tong na in, SAC ralkap nih an thlah ṭhan tiah an chim chap.

AAPP nih October 13 tiang an thanhmi cazin ning ah SAC ralkap nih hranhram uknak an lak hnu ah SAC ralkap kut in thah a tongmi le nunnak liammi mipi dihlak hi 2350 tiang an phan tiah an langhter.

Mandalay Lamzawhnak Tuahlio Ah Hruaitu Pakhat Sayamah Kum 8 Thong Thlak Ding In Biakhiahnak An Tuahpiak, Mandalay ah SAC ralkap uknak duhlo lamzawhnak tuahlio ah hruaitu pakhat si mi sianginn ca chimtu sayamah Daw Thet Su Hlaing cu phungrelnak caang poh-mah 505(a) in kum 3 thong thlak ding an chap tiah theih a si.

Sayamah Daw Thet Su Hlaing cu a luancia August thlachung ah kum 5 chung thongthlak ding in biakhiahnak an rak tuahpiak cang. Cucaah tutan an chapmi he cun kum 8 chung thong a tla lai. SAC ralkap nih hranhram uknak an lak thla 9 hnu October thladih ah sayamah Daw Thet Su Hlaing telh in fimcawnnak lei rianṭuantu General Strike Committee chungtel cheukhat cu Mandalay ah SAC ralkap nih an rak tlaih hna tiah theih a si.

North Korea Nih Nuclear Hriamnam A Phur Khotu Missile Hneksaknak A Tuah, North Korea hruaitu Kim Jong Un nih nuclear hriamnam a phur khotu missile hneksaknak a tuahpi hna tiah October 13 ni ah Korea Central News Agency (KCNA) nih a langhter tiah theih a si.

Tutan hneksaknak kan tuahmi hi kan ral caah fianghlang ngaiin ralrin peknak kan tuah mi a si tiin Kum Jong Un nih cun a chim. “Rampi pakhat a biapi mi raltuknak kan doh i kan kham khawhnak dingah nuclear hriamnam kongkau riantuannak hi biatak tein kan kauh ter i kan cawlcangh a herh” tiah Kim Jong Un nih cun a chim chap. North Korea nih hin a voikhatnak bik missile hneksaknak a rak tuah hi 2021 kum, September thla ah a rak si tiah theih a si.

Yinmarbin Peng Ah Riahcaw Lak Ding In A Kalmi SAC Ralkap Cu Bomb Puahhnawh An Ton Caah Ralkap 15 Hrawng An Thi, Sagaing ramṭhen, Yinmarbin peng Banbuai(ဘန့်ဘွေး) khua in riahcaw lak dingah a kalmi SAC ralkap motor le ke in rallam a sialmi ralkap cu, bomb puahhnawh an ton caah SAC ralkap 15 hrawng an thi, tiah theih a si.

Banbuai khua ah umhmun khuarmi SAC ralkap hna cu nizan October 13 zanlei sml 3:15 ah riahcaw lak ding in motor pakhat le ke in an kal lioah Local People’s Defense Force(LPDF) le Naga Brother phu hna i bawm in bomb lung 15 in kan puahhnawh hna caah SAC ralkap 15 hrawng an thih hi a si, tiah LPDF nih cathanh an chuah. Cun Sagaing ramṭhen Kantalu(ကံတလူ) Toll gate le Pekatu(ပဲကတိုး) khua karah motor in ralvengtu SAC rakap cu bomb puahhnawh an tong ve, tiah theih a si.

Magway Ramṭhen Zitaw Khua Cu SAC Ralkap Nih An Khangh Caah Inn 11 A Ciam, Meheh 30 Leng Zong An Khangh Chih, Magway ramṭhen, Yesagyo peng Zitaw khua cu, SAC ralkap nih nizan October 13 ah an khangh caah inn 11 a ciamh pinah meheh 30 leng zong mei in an khangh hna, tiah PDF sinin theih a si. Nizan October 13 zanlei sml 3:30 hrawng ah Myaing peng le Yesagyo peng ai tlaihnak Zitaw khua ah SAC ralkap pawl cu an lut i, inn an khangh caah inn 11 a ciam. Khuami an meheh 30 leng zong an khanghpiak dih hna, tiah theih a si.

“Myaing peng le Yesagyo peng ramri Zitaw khua cu, uico ralkap nih an khangh caah inn 8 a ciam dih. Khattelei lawng a kaangmi hi inn 3 a si. An khangh ko nain inn 1 cu a kaang lo. Khuami meheh 30 leng zong an thi,” tiah Seven Star YS phu in chimphuannak nawlngeitu Hna Khan Hmuai(နှုတ်ခမ်းမွှေး) nih a chim.

Monywa Peng In Palik Pahnih Cu Meithal He CDM An Tuah Caah PDF Nih Lawmman Tangka Kyats Sing 100 An Pek Hna, Sagaing ramṭhen, Monywa peng palik Battalion 28 in palik Aung Ko Ko le Moe Lin Aung cu, meithal he CDM an tuah caah lawmman tangka kyats sing 100 kan pek hna, tiah People’s Defense Army(PDA) in ṭuanvo ngeitu pakhat nih a chim. A luancia September 28 lioah Monywa peng palik Battalion 28 in palik Aung Ko Ko le Moe Lin Aung cu PDA sinah an meithal he CDM an tuah hi a si.

Aung Ko Ko nih, “Kan inn cu ralkap nih an kan khanghpiak caah ka nu le ka pa cu umnak inn an ngei ti lo. Cu pinah CDM tuah kai timhnak a sau tuk cang, meithal le kuan he CDM tuah lo cu ka duh lo caah tuan deuh in CDM ka tuah lonak hi a si. Midang kan hawile zong zam a duhmi an tam ngai,” tiah a chim.

PDA in ṭuanvo ngeitu pakhat nih, CDM tuahtu palik pahnih cu, minung pakhat ah kyats sing 50 veve kan pek hna. A dang a taangmi palik le ralkap zong CDM tuah an tuah ahcun kan cohlan peng hna, tiah a chim.

Mon Ramkulh, KyaikHteYoe Pura Hmun Kahdohnak Kongah USDP Party Nih Cathanh An Chuah, Mon ramkulh, KyaikHteYoe pura ah umhmun a khuar mi SAC ralkap hna cu a luancia mi October 12 ni ah mipi hriamtlaiphu lei nih an rak kah i kaphnih kar kahdohnak faak a rak chuak mi kong he pehtlaiin USDP party nih anmah duh hoih zawngin a tanglei bantukin cathanh an chuah:

12 October, 2022 ni zinglei ah Mon ramkulh ah a um mi KyaikHteYoe pura ah a kalmi mipi an umnak SAC ralkap umnak hmun cu KNLA le NUG/CRPH kuttang um PDF hna nih hriamngan le hriamhme he an kah tiah kan theih. PDF hna nih an kahmi kua le bomb hna ruangah sualnak ngei lo mipi (3) an thi i minung (19) hliamhma an tuah tiah kan theih. Pura hmun kal in pathian biak ai tiim mi mipi hna a kap tu KNLA Battalion 1 le NUG/CRPH kuttang um PDF tuah sernak cu fak khun in kan dohkalh tiah cathanh kan chuah.

A cunglei bantukin USDP party nih cathanh an chuah ko nain a hmun um mipi cheukhat nih cun “SAC ralkap nih hriamngan le hramhme tamtuk an hman mi le an duh nak hmun paoh ah an kah mi ruangah mipi kan thih i kan i hliam hi a si” tiah an chim tiah theih a si.

Kali Aung Hlei Check Gate Hngaktu SAC Ralkap Kah An Ton Caah Ralkap 5 An Thi, Tannintharyi ramṭhen, Dawei pengkomh Kali Aung(ကလိန်အောင်) hlei ummi SAC ralkap check gate cu, nihin October 14 zinglei ah hriamtlai phu khat nih an kah i, SAC ralkap 5 an thi, tiah theih a si.

Kali Aung hlei cu Ye-Dawei motor lampi cungah a ummi a si i nihin zinglei sml 4:00 hrawngah hriamtlai phu pakhat nih an kah hi a si. Cu kahdohnak a daih in SAC ralkap a thimi ruak hna cu mizaw phorhnak motor in an kalpi hna. Kali Aung hlei a zawhmi khualtlawng mi hna le mi chawkvai cu SAC ralkap nih checkhlatnak an tuah hna, tiah theih a si.

Nattalin Le Taungngu Kahdohnak Ah PDF Nih SAC Ralkap 12 An Thah Hna, Nizan October 13 ah SAC ralkap le Pago PDF karah voithum tiang kahdohnak a chuak i SAC ralkap 12 nak tlawm lo an thi i hliamhma pumi an tam, tiah Pago PDF nih cathanh an chuah.

SAC ralkap 50 hrawng cu Tharyarwaddy pengkomh PDF Battalion 3801, Companny 1 le 2 nih lamhruang in an bawh hna caah Nattalin peng Nyaung Laypin khua le Gyetma Net(ကြက်မနက်) khua karah voihnih kahdohnak a chuak. SAC ralkap 4 an thi i 7 hliamhma an pu, tiah an langhter. Cu hnuah SAC ralkap nih rallam an sial ṭhan caah Nyaung Laypin khua le Gyetma Net khua karah bomb in an puahhnawh ṭhan hna i, SAC ralkap 6 nak tlawm lo an thi, 8 hliamhma an pu, tiah theih a si.

Pago ramṭhen, Taungngu peng Myapinku(မြပင်ကူး) khua ah umhmun khuarmi SAC ralkap sentari cawnghnak hmun cu nizan October 13 zanlei ah Taungngu pengkomh PDF Battaliin 3501, Companny 1 nih an kah ve hna, tiah theih a si. Cu kahdohnak ah SAC ralkap 2 an thi i hliamhma pumi an um. Taungngu PDF lei in a thimi le aa hliammi an um lo, tiah theih a si.

Tamu Khua Ah Pyusawhti Hruaitu Aung Htun Win An Kah I A Thi, Sagaing ramṭhen, Tamu khua Sandaku(စန္ဒကူး) sang um pyusawhti hruaitu Aung Htun Win cu, dalan le pyusawhti fimhlawmtu Tamu Battalion 4 nih kan kah i a thi, tiah PDF Tamu Battalion 4 in hruaitu bawino Khant Lin nih a chim. Cu pinah nizan October 13 zinglei ah Tamu khua leng hmun pakhat ah SAC ralkap le PDF Tamu kar ah caan tlawmpal kahdohnak a chuak, tiah theih a si.

Khuate Pali A Khangtu SAC Ralkap Cu PDF Nih An Kah Hna Caah SAC Ralkap Officer Pakhat Telh In Ralkap 10 An Thi, Magway ramṭhen, Yesagyo peng Zitaw khua a khangtu SAC ralkap pawl cu, kan kah hna caah Officer 1 telh in ralkap 7 an thi, tiah Seven Star YS nih an langhter.

Nizan October 13 zanlei sml 3:00 hrawngah Zitaw khua a khangtu SAC ralkap pawl cu lamhruang in PDF nih an bawh hna i bomb an puahhnawh hna caah SAC ralkap 7 an thih hi a si, tiah theih a si. “Uico ralkap pawl cu Zitaw khua an khangh dih hnu an chuah lei ah bomb in kan puahhnawh hna i, officer 1 telh in ralkap 7 an thi,” tiah Seven Star YS in chimphuannak nawlngeitu bawino Hna Khan Hmuai(နှုတ်ခမ်းမွှေး) nih a chim.

SAC ralkap pawl cu Teytaw(သဲတော) ah umhmun an khuar i, Skat motor in thazaang an chap caah zeitik caan paoh ah kahdohnak a chuak ṭhan khomi a si, tiah a chim chap. Cun Myaing peng Watung Ai(ဝါးသုံးအိုင်) khua a khangtu SAC ralkap cu PDF nih an kah hna caah SAC ralkap 3 an thi, tiah theih a si. Cu kahdohnak ah SAC ralkap nih hriamngan le hriamhme he PDF cu an kah hna caah sml 5 chung hrawng kahdohnak a chuak i SAC ralkap lei in 7 hliamhma an pu tiah theih a si.

Myanmar Rammi Chungkhar 30 Leng Sinah Youth For Myanmar Nih Eidin An Pekchanh Hna, Mizoram ramkulh, Kawlasib pengkomh Khamrang khua ah ralzaam in ai dormi Myanmar rammi hna sinah Youth For Myanmar nih, nizan October 13 ah eidin an pekchanh hna, tiah theih a si.

Khamrang khua ah ai dormi Myanmar rammi hi chungkhar 30 leng an si i, milu in 150 leng an si. Cu chungah sianginn kai a cu cangmi ngakchia hi 30 leng an um, tiah theih a si. Youth For Myanmar nih, vanṭha laksawng (lucky draw) an zuarmi in an hmuh mi tangka in Khamrang khua ah ai dormi Myanmar rammi hna sinah eidin an pekchanh hna hi a si. Crd-The Chin Post