Pi Ngun Thluai Cin Le A Chungkhar Nih Kawlram Tangka In Ting (100) CNF/A Caah An Hlut

Japan ram i a um mi Pi Ngun Thluai Cin le a chungkhar nih kawlram tangkaa in ting (100) CNF/A caah an hlut tiah thawng kan theih. Pathian nih thluachuahnak pe chin ko hna seh. Atutan, CNA/F a soiseltu tampi lak ah a bawmtu chungkhar cu upat awktlak taktak chungkhar an si, Pathian nih thluachuah chin ko hna seh. Pi Ngun Thluai Cin Nih CNF/A Ks. Sing 100 a hlut mi hi a tam taktak ko. Chin miphun a simi paoh nih kan lawmhpi cio lai dah.

Pi Ngun Thluai Cin hi 2020 kum a voi 72nak Chin Miphun Ni ah Thantlang i khuangcawi a rak si. Japan ram um a si i, Chin ramkulh Hakha khualipi zongah 3 Star Hotel an sak cuahmah mi zong a si. Pi Ngun Thluai Cin hi Vomkua khuami Pi a si i, tu bantukin a chungkhar nih Chin miphun dohthlennak kum 33 tlin ni ah CNA/F cu Kawlram tangka Ks. Sing zakhat (100) an bawmh hna tiah CMpage le Chin Cable Network Channel nih an langhter.

Relchap, March 20, 2021, The 33rd Chin Revolution Day. Atu lio Kawlram ah ralkap puarhrannak a chuah caan ahhin kan thin a hung i kan tuar kho cio lo. Miphun fa santlailo te kan simi kong ah kan lung a fak. A taktak ahcun, Pathian nih a kan serning in cun vawlei cungah Chin miphun cu 2 million hrawng kan si lai tiin tuak a si. Kan tam tuk ko. Sifak santlai lo kan si ruangah a tlaumi kan tampi lai. Mah miphun sinak a tuak kho lo mi kan tampi lai. Cu caah, thisen khat a simi vialte kan i kawl than i miphun lian kan sinak langhter khawh hi a hau.

Kan Chin miphun cu Kawlrawn le Arakan State ah Asho Chins, East Chinram Myanmar, West Chinram India, le Southwest Chinram Bangladesh ah tampi kan um. Pathian nih Israel miphun sertu le khamhtu ah Joseph cu Egypt ram ah a thlah i bawi lianpi ah a ser bantuk in vawlei cung ram rum le dawh Asia, Australia, New Zealand, Europe, Canada le USA ah Chinmi 200,000 hrawng a kan thlah. Leikhuaza Chinmi dihlak ih 10% hi ramdang ah khua kan sa. Chinmi cu Khrihfa kan si hlan in Khuazing Pathian a ngeimi miphun kan si. Pathian cu a tha tuk i, kan pipu hna nih an bia lo. Nain, “Khuazing hnatlak lo in nun ding” an tih tuk. An tizah tuk. Ruah lo piin an naal sual hmanh ah “Khuazing” tiah chanhtu a aumi kan si. Rawhralnak a pe tawntu hna khuachia tu kha an tih i saram thisen in an tluanhtlamh. An biak kan ti ko lai.

Kan siangbawi te nih Pathian kan ngeihmi hi rak hngal hna sehlaw Paul nih Ethen khuami hna kha “Hngalh lo mi Pathian caah” tiin nan biakmi cu a hngalh cu hngal hmanh hlah ulaw, nan sin i kan thanhmi hna hi a si” (Lamkaltu 17:23) tiah a rak ti bantuk in kan pilepu hna cu “nan Khuazing hi kan in chimhmi hna Pathian a si” tiah an rak ti ve ko hna hnga. Pathian kong cu an chimh hna. Jesuh Khrih nih vailam ah a pum le thisen in a kan tlanhnak kong cu an chimh hna. Pathian a ngei cang mi kan si caah le saram thisen raithawinak in luatnak a kawlmi kan si caah an chimmi Pathian le Khrih thisen raithawinak in khamh kan sinak cu awl tein an cohlan khawh. Cu ti cun Chinmi vialte hi khrihfa kan si dih. Nihin ah Pathian sin in thluachuah tamtuk kan dong.

Vawleicung biaknak pical Buddha biaknak Burma, Hindu biaknak India le Islam biaknak Bangladesh, le Pathian zumlo Commnist China ram lian pi hna karlak ah a ummi Chinmi cu khrihfa kan si dih. Kan Chinram cu khrihfa ram a si. Miphun fate chinchap si hlei ah, khuachia biaknak le ram lian pipi nih a kan karceh tikah kan miphun sinak in thazaang derthawm cia kan si. Cu chinchap ah, kan Chin miphun lakah holh dang tete 42 hrawng a um, fing le tlang nih a kan dan viar caah mah holh, mah peng, le mah khrihfabu tanh in kan i then ngai hna caah mah tein cio in teinak hmuh kan i tim lulh hna. Leikhuaza Chin miphun lak ah “lungrualnak” a um lo ahcun ahohmanh nih teinak cu kan hmu kho lai lo. Kan umnak hmun ciacia ah saltaang mi bantuk kan si peng lai.

Atu cu mah peng le tlang le holh hna lonh in vawleipi (global/international) dirhmun in riantuan kho ding ah Pathian nih a kan cawisan cang. Jesuh Khrih ah pum khat kan sinak hi hngal usih. Thennak kawl ti lo in thisen khat kan sinak hi upat tihzah usihlaw Pathian nih a thimmi miphun kan si caah teinak cu kan hmuh ko lai. Kawl ralkap sal ah kum 59 kan tannak in Pathian nih chanhchuah a kan timh cang. Hi pin lei ah kan fale le techin fapar nih sal ah an taan than ding cu kan duh lo. Pathian hi bochan usih. Khrih zumhnak he dir ti hna usihlaw Vawleipicung Chin Pennak (Chin Kingdom International) ah Khrih cu Bawi si ko seh. A Pennak kan cung ah tlung ko seh. Vanmi holh kan hmang cang lai. Teinak cu Khrih chungah a um (Victory is in Jesus). Teinak cu kan hmu ko lai. Kan miphun le ram hi Pathian sunparnak caah hmang ko seh. Amen. Credit: Rev. Dr. C Duh Kam