PDF-Saw Nih Ralhrang Minung 300 Tluk An Phomh Than Hna!
PDF-Saw Nih Ralhrang Minung 300 Tluk An Phomh Than Hna!
===========
Kyaukhtu Lamhlat Kahnak Sakhan In Saw Leikap Ah A Kalmi SAC Ralhrang Motor (16), Ralhrang 300 Tluk Cu Saw PDF Nih An Kah Hna Caah Ralhrang 25 Nak Tam An Thih Pinah 15 Nak Tam Nih Fak Tukin Hliam An Tuar!
Kyaukhtu lamhlat kahnak sakhan in Saw leikap ah a kalmi SAC ralhrang motor (16) ralhrang 300 tluk cu Saw PDF le an hawile phu i fonhin Febuary 11-13 karlak, ni 3 chung an rak kahdoh hna caah ralhrang ralkap 25 nak tam an thih pinah 15 nak tam nih faktuk in hliam an tuar tiah theih a si.
Mipi thlacampiaknak thawngin mipi ralkap PDF hna cu hliam tuartu an um lo i, Saw PDF he kahdohnak a tuahtu YDF (Saw& Kyaukhtu), CDF Kanpalet cungah lawmhnak tampi kan ngei tiah cathanh an chuah.
Thaton Ah Ramri Lonhtu SAC Ralhrang Ralkap Kah An Tong, Ralhrang 2 An Thih Pinah 3 Nak Tam Nih Hliam An Tuar!
Thaton peng chung Wan Be Ing khua thlanmual pawngah Febuary 14 zinglei caan ah ramri lonhtu SAC ralhrang ralkap kah an tong tiah KNLA Brigate 1 sinin theih a si.
Zinglei sml 7:00 hrawngah KNLA Brigate 1 control nak hmunhma chungah ramri lonhtu SAC ralhrang ralkap cu KNLA Brigate 1, Battalion 1 telh in PDF i fonhin an rak kah hna tiah theih a si. Kahdoh an ton ruangah SAC ralhrang ralkap leikap ah a tlawm bik 2 an thih pinah 3 nak tam nih hliam an tuar tiah theih a si.
Zinglei sml 7:00 hrawngah a si i, anmah ralhrang ralkap nih ramri lonhin an cawlcangh ruangah kannih lei nih kan rak kahmi a si. Bomb zong in kan puah hnawh i, meithal zongin kan kah. Anmah leikap ah a thimi le hliammi an tam lai, aruang cu mizaw phortu motor zong an ra. Ralhrang ralkap nih an tuah tawn bangin pawngkam ah ningcang loin an puah ruangah khua chungum mipi leikap ah hliam tuarmi an um le um lo tu kan theifiang rih lo tiah KNLA Brigate 1, bohmu pakhat nih Than Lwin Times ah a chim.
SAC ralhrang ralkap cu kahdoh an ton ruangah pawngkam khua chungah hriamngan le hriamhme hmangin kan kah. Febuary 13 zinglei caan zongah Thaton peng chung Pih Nue Taw khua lai ah a ummi phungki sianginn ah umnak sakhan tuahtu SAC ralhrang ralkap hna cu kahdoh an tong i, ralhrang 5 an thi tiah Thaton-PDF nih cathanh an chuah.
“Tem Tawn Tuar Ahcun Luat Dingin Chuah, Namneh Ahcun Hrawh Dih, Teinak Thanhtar Phunh U” Tiah Hanta Wady U Win Tin Nih Ramkhel Kongah A Chimmi Bia Roling!
Febuary 14 ah khuakip fonh duhlonak langhternak committee phu kip i fonhin kan tonmi ramkhel dohthlenhnak ah khua te tampi le khuapi tiangin mipi nawlngeihnak a latu sinin nawlngeihnak cu chuhsak than in a tharin sersiam than ding a si cang.
National United Government cozah i ramchung tawlreltu hruainak tangah tlamtling tein miipi nawlngeihnak hi kan dirh than khawh lawngah National United Government cozah cu vawlei cung ramdang dang nih zumh ngamnak an ngei lai caah mipi dihlak nih raltha taktakin zalam cungah chuakin duhlonak kan langhter a herh tiah khuakip fonh duhlonak langhternak committee hruaitu Ko Lwin Tu nih ramkhel kongah mipi sinah thazaang peknak a ngei tiah Zalen tiah a tial. Credit: The Federal Times