PDF-Kalay Cu An Thawn Bak Ko, Nikhat Chungah Hi Zat Ralhrang Thah Khawh Hna Cu!

PDF-Kalay nih ralhrang 20 an thah hna
=========
Kalaymyo peng kahdohnak ah ralhrang 20 tluk nunnak liam tiah theih a si. Kalay peng Tin Thar khua cu tuzing sml 9:00am hrawngah ralhrang nih a langhlat in bomb in heh tiah an kah caah khua mi 10 hliam an tuar. Cu bantuk in khua an kah mi lehrulhnak ah ralhrang pawl cu PDF-Kalay nih landmine an puah hnawh ve hna.

Ke in a kal cuahmah mi ralhrang 60 chung in minung 15 cu bomb puah hnawh ruangah an thi. Cun hliam a tuar mi chung in minung 5 cu Kalaymyo ralkap Sizung ah an nunnak a liam tiah PDF-Kalay nih thawng an thanh.

KIA le PDF fonh nih ralhrang 100 dengmang an thah hna. Kachin ram Hpakan khuapi pengah KIA le PDF fonh nih ralhrang 100 hrawng a si mi cu an thah dih dengmang hna tiah theih a si. Ralhrang minung 100 le KIA le PDF fonh ni thum chung kahdohnak ah ralhrang lei cu an thi dih dengmang, an တပ်ရင်းမှူး zong a thi ve. Ralhrang lei nih Fighter Jet le Helicopter hmang in an hong kah lengmang hna tiah theih a si.

“February 3 zaanlei sml 5 hrawng khan an i kap cang. A caan ah an dai, nizaan hna kha cu chun ni tlak bak in an i kap.Tuchun zong an i kap ko. Vanlawng in a tlawmbik voi 8 cu an hong kah cang hna. Cun hriamngan in voi 70 hrawng an kah fawn cang hna. Tutiang ahcun KIA le PDF lei ai hliamkhuai mi an um lo. Ralhrang lei cu a thi an tam ngaingai.”

“Ralhrang lei hi 100 an si. kahdohnak ah a thi mi an tam. An thi dih dengmang, a tang mi hnihchun zong cu heh tiah lam lo in an zaam len ko hna” tiah KIA naihniam nih an langhter. An thah mi hna zat cipciar langhter mi bal a um lo. Tuchun zaanlei sml 4 hrawng ah Vanlawng hmang in a hong kah nolh hna caah kum 80 upa pakhat a nunnak liam tiah theih a si.

CDF-Matupi sin ah Kawl ralkap pakhat hriamnam he ai pe. Matupi khua hrambunh mi ခမရ 304 in ralkap bawi pakhat cu CDF-Matupi battalion 4 sin ah hriamnam he ai pe tiah theih a si.

Matupi khua in Kawl ralkap San Lin Htywe cu meithal zuun khat, Zenthong 2 le kuan zei maw zat he February 3 ni ah CDF-Matupi sin ah ai pe tiah February 6 ni ah CDF-Matupi nih an langhter. Tu ahcun hmunhimnak ah an kuat cang tiah theih a si.

AA le ralhrang an i kap AA lei in pakhat nunnak liam. Rakhine ram ah AA umnak buk pakhat cu ralhrang nih an va kah hmasa hna caah AA lei in pakhat nunnak liam. February 4 ni ah Maungdaw khuapi peng ah a um mi AA pawl buk pakhat cu Kawl ralkap nih an va fuh hna i an kah hmasa hna, sml 1 chung dengmang an i kap. AA lei in mivengtu ralkap pakhat nunnak a liam tiah theih a si.

Rakhine ram chungah daihnak um lo ding hi Kawl ralkap nih an duh mi a si caah hi bantuk in an kan kah nak hi a si, thil sining buaiter vima an i timh ahcun kahdohnak pehzulh in a chuak kho mi a si tiah AA chimnak nawl ngeitu Khine Tuh Khah nih a chim. Ralhrang pawl nih an pel hmasa hna i AA buk vengtu pakhat an kah thah. Ralhrang lei in mithi an um le umlo theihfian a si lo.

KIO Chairman: Rampi huap ral a fak kho, NUG hi biatak tein dirpi a herh. Tukum cu rampi huap in ral a fah lai caah NUG hi biatak tein dir pi cio a herh ee tiah KIO Chairman nih a chim. Avoi 61nak Kachin Revolution day cu February 5 ah Laiza khuapi ah tuah a si.

Cu ah cun KIO Chairman N Ban La nih NUG he lungrual in an i fonhnak kong a chim. Ralkap uknak nih a pek mi zalonnak hrimhrim cu caan sau caah a tthatlonak kong zong a chim. “Tutan ah ralhrang do ding in min phunphun i bunh in hriam a tlai mi mino tampi an um cang. Asinain cu hriamtlai phu dihlak nih cun NUG hi bawmh le dirpi a herh.

Cu lo ahcun caan a ruah tikah buainak a chuak kho” tiah a chim. Cun mah le hmunhma cio ah a herh mi tirawl damhkhan ding le rambuai lio le ramkhel tthat lo lio kha caan ttha ah la in mah hlawknak lawng ruat in chawlehnak siseh tuah lo ding in forhfialnak zong a ngei. Credit: Suimilam Media