Pathian rian a ttuan liomi Asho Chin pastor Salai Ngwe Kyar cu PDF na si tiah

Chin Pastor Pakhat PDF tiah an Puh i SAC Ralhrang Hremnak in Nunnak Liam
————-
Magwe ramtthen, Saduh-daya peng, Thake-daung khuate ah Pathian rian a ttuan liomi Asho Chin pastor Salai Ngwe Kyar cu PDF na si tiah SAC ralhrang nih an hremnak ah a nunnak a liam, tiah thawng kan theih.

December 6 ah khan Saw peng chung ah Khrihfabu rianherh khual a tlawn lio ah SAC ralhrang nih an rak tlaih.
PDF na si tiah an puh i, Saduh-daya palik zung ah ralhrang nih ruru hranghrang in an hrem ruang ah December 8 ah Magwe General Hospital ah an chiah.

An hremnak hliamhma in Pastor Salai Ngwe Kyar cu nihin December 9 zinglei ah Pathian ttang ah aa din. Pastor Salai Ngwe Kyar hi Thake-daung khuate ah a tthanglianmi a si i, Baibal sianginn a dih hnu in an khua Baptist Khrihfabu ah Pathian rian a ttuanmi a si.

Thaizing Hakha “Silent Strike” ah Mizapi i Tel Ding in Forhfial. Thaizing December 10 cu vawleicung Nuhrin Covo Ni a si bang in Myanmar ramchung khuapi kip zong ah ahohmanh lengchuah lo, dawr zong on loin innchung ah daite in umnak in ralkap uknak duhlonak langhter ding in timhtuah a si.

Myanmar ramchung khuapi tampi ah cun zinglei sml. 10:00 in zaanlei sml. 4:00 tiang “Daite Duhlo Langhternak” (Silent Strike) tuah ding in timhtuah cio a si. Hakha khuapi zong ah chunhnu sml. 2:00 in zaanlei sml. 5:00 tiang daite in inn ah i erhnak in ralkap uknak duhlonak langhter ding in mino hna nih forhfialnak an tuah.

Pale peng, Kantdaunt palek sakhaan i palek pakhat PDF nih an tlaih. Sagaing ramthen, Pale peng, Kantdaunt palek sakhaan i palek pakhat cu december 7 zaan suimilaam pariat hrawng ah tualchung PDF nih an tlaih tiah kan theih.
Palek sakhaan in inn ah a rak lawi mi Lwin Moe Htun pumpak No. (တ-တ၂၇၅၆၀၂) cu an tlaih mi a si tiah kan theih.

“Sakhaan in inn ah a ra. Inn a phan ti kan theih in kan kulh i kan tlaih. Hriam le zeidang cu aa ken lo” tiah Pale People Defence force-Headquarters nih an chim. Tlaih mi palek cu Pale PDF sin ah kan ap i NUG nih thanh mi thongtla zohkhenh ning he aa tlak ning in an tawlrel tiah kan theih.

Yinmarpin Engintaung lam then ah tualchung PDF phu sarih fonh nih ralhraang pawl bomb in an puah hna, an bawi pakhat telh in pahra an thi. Sagaing ramthen, Yinmarpin peng, Engintaung lam then ah ralhraang motor cu December 9 zing suimilaam 9:30 ah tualchung PDF phu sarih fonh nih bomb 11 in an puah hna i motor pahnih a rawk, ralbawi pakhat tel in pahra an thi tiah Yinmarpin Democratic Guerrilla nih an thanh.

Ralhraang pawl bomb an puah hna hnu ah rammi rungvengtu hna cu hma a pu mi um lo te in an hnulei an kir kho tiah theih a si. Ref. Mizzima, The Chin Journal