Operator pawl cu Area 21 Revolution Network nih ralrinnak a pek hna!

Phone chawnh man le Internet man kai aa tim mi Operator pawl cu Area 21 Revolution Network nih ralrinnak a pek hna
===========
Phone chawnh man le internet hman man nan kaiter a si ahcun Phone Operator pawl cu ralhraang kuttang riantuan an si tiah pom in Tower tung pawl kan hrawh lai tiah AREA 21 Revolution Network nih December 5 ah an thanh.

Phone chawnh man le internet hman man kaih a si lai tiah Operator Company nih theihternak an tuah ca ah mizapi mithmai zoh, mizapi ca ruat in tuahtuan ding in le ralhraang fial mi poh nan tuah a si ahcun Mytel tower tung bantuk in kan tuah lai tiah an thanh.

Phone Operator pawl atu bantuk ralrin pek hi AREA 21 Revolution Network kan ca ah a voi khatnak le a donghnak a si tiah an ti. Ralhraang kut tang Pehtlaihnak Zung nawl peknak in Phone chawnh man le internet hman man kan kai lai tiah Telenor, Ooredoo le MPT company lei in december 3 thawk in a hmangtu mizapi sin ah theihternak an tuah.

Wifi internet company pawl zong nih tu thla thawk in a man kan kai lai tiah thawng an kan thanh tiah wifi hmangtu nih an chim. Zeizat tiang aman an kai lai ti mi bal fianghlang in thanhnak cu a um rih lo.

Yangon ramthen Htantapin peng USDP party Secretary thah a tong. Yangon ramthen, Htantapin peng USDP party Secretary U Hla Aung cu December 4 zaanlei ah meithal kahnak in a thi tiah tualchung mi sin in kan theih.

Mizei phu ti hngalh lo mi nih Htantapin peng Yaeso khua le Khanaungmaw khua kar lam cungah meithal in an kah hi a si. “Meithal in voi li an kah i a hmun ah a thi colh” tiah tualchung mi pakhat nih a chim.

U Hla Aung hi Htantpin peng Mangesuh khua ah a um mi a si i ralhraang nih uknak an lak hnu ah khuabawi thing hna inn kha ralhraang he i bawm in a chekhlat hna. Khua chung zong ah mi thihphaihnak zong a tuah lengmang tiah tualchung thawnghram in kan theih.

Kahthahnak a chuah hnu ah Mangesuh khua pawngkam hrawng ah ralhraang nih chekhlatnak an tuah. Ref: Mizzima, RFA, The Hakha Post