SAC Ralkap Tank A La Khotu Karenni Ralkap Cu NUG Nih Lawmman A Pek Lai!
=============
Karen ramkulh ah SAC ralkap Tank cu Karenni hriamtlai phu nih an laak khawh caah lawmman kan pek hna lai, tiah NUG project Minister of Finance and Investment, Tin Htun Naing nih a chim. 88 hruaitu Min Ko Naing le NUG project Minister of Finance and Investment, Tin Htun Naing cu biaruahnak an ngeih lioah Min Ko Naing nih, Karenni hriamtlai phu nih SAC ralkap Tank an laak khawh caah laksawng nan pe hna lai maw tiin halnak a tuah i Tin Htun Naing nih laksawng pek dingin kan i tim. Tangka zong kan ngei ko tiin a leh, tiah Burma VJ nih a langhter.
A luancia March 9 ah Kalaymyo in a rak kaimi SAC ralkap Tank pahnih telh in motor 30 leng cu Chin ralkap phu nih lampithluan ah an rak kah hna i April 13 ah a dihlak in an rak hrawh khawh. NUG nih Chin ralkap phu cu lawmman laksawng kyats sing 4,000 a rak pek bal cang hna.
Karenni ramkulh ah SAC ralkap Tank pahnih cu Karenni hriamtlai phu nih an laak khawh tiin thawng a thang nain Karenni hriamtlai nih thawngthanhnak an tuahmi a um rih lo. Karenni hriamtlai phu he naihniam in a ummi hna cu Burma VJ nih pehtlaihnak le thawng halnak an tuah hna i Tank pahnih an laak nain zei bantuk Tank dah a si ti cu an hngal lo, tiah theih a si.
Karenni Kahdohnak Ah SAC Ralkap Tank Pakhat A La Khotu Cu NUG Nih Laksawng A Pek Lai. Karen ramkulh kahdohnak ah SAC ralkap Tank pakhat cu Karenni hriamtlai phu nih an lak khawh caah lawmman kan pek hna lai, tiah NUG Ministry of Planning, Finance and Investment Minister U Tin Htun Naing nih NUG media a si mi PVTV ah a chim.
Pau dohthlennak PVTV media bia ruahnak ah aa tel mi, 88 hruaitu Min Ko Naing le NUG Ministry of Planning, Finance and Investment Minister U Tin Htun Naing cu “billion 20000 tangka chuah a si hnu Suzaka operation ah a rawk mi chan ah mirum hna hmailei lamtluam” ti in tlangtar in biaruahnak an ngei I cu ah cun an chim mi a si.
Mah biaruahnak ahcun, Min Ko Naing nih, Karenni ramkulh chung ah mipi hriamtlai phu nih SAC ralkap Tank pakhat an laak khawh caah NUG cozah Ministry of Planning, Finance and Investment lei nih laksawng nan pe hna lai maw tiin biahalnak a tuah hi a si.
“Kan pek kho hna lai. Tangka zong kan ngei ko. Chin ramkulh ah ralkap Tank pahnih an hrawh kho lio zong ah tangka kan rak pek ko. Tangka peknak kong ahcun a harnak a um lo. Lawmhman pek ding cu kan rian a si ko” tiah NUG Ministry of Planning, Finance and Investment Minister U Tin Htun Naing nih a chim.
Chinramkulh, Hakha peng, Chuncung khua pawng kahdohnak ah SAC tank pahnih cu April 13 ni ah CNA/ CDF ṭangrual phu hna nih an hrawh i, NUG nih July 4 ah sing 4,000 laksawng an pek cang hna tiah theih a si.
“April 13 ah Hakha peng, Chuncung khua pawng kahdohnak ah CDF, CNA nih SAC Tank 2 an hrawh khawh nak cu tette ṭha te he an rak langhter caah NUG cozah nih a rak thanh bantuk in Tank 1 ah sing 2,000 in 2 caah sing 4,000 cu Chin ramkulh CNF/CNA + CDFs rianngeitu pawl sin ah laksawng kan pek hna” tiah NUG nih tuni an cathanh ah an rak langhter.
NUG caan karlak President Duwa Lashi La zong nih ” Khuapau dothlennak chung ah Chin ramkulh hi zalonnak caah fak pi in ral an doh kan hmuh caah lunglawmh awk ngaingai a si. Hramhram uknak a hram in hrawh khawh nak le Chin miphun zalonnak caah raltuknak kan tuahṭi khawh mi hi mipi caah thluachuah a siter tiah ka zumh” tiah a rak chim ve.
Ye U Peng Ah Tualchung Mi 10 Leng SAC Ralkap Nih Ralphaw Hman Ding Ah An Tlaih Hna, Minung 10,000 Leng An Zaam. Sagaing ramṭhen, Ye U peng chung ah SAC ralkap nih minung 10 leng ralphaw hman dingin an tlaih hna i rallam an sial, tiah People’s Defense Comrade in ṭuanvo ngeitu Hto Khant Zaw nih a chim.
Nizan August 21 zinglei ah Depeyin peng ah rallam a sialmi SAC ralkap pawl cu Ye U peng nitlaklei ah an lan i Butalin peng chung ah rian a ṭuanmi minung 10 leng cu ralphaw hman ding ah an tlaih hna, tiah theih a si. SAC ralkap nih rallam an sial ruangah Ye U peng nitlaklei a ummi Kanpyia, Kyikone, Chaungyu, Pauktaw, Zikone le a dang khuate 11 in khuami 10,000 leng cu ralhrial in an zam, tiah theih a si.
August 21 zinglei ah Depeyin in Ye U nitlaklei ah SAC ralkap an kal i tualchung mi hna cu ruahsur lak ah an zaam. Butalin peng chung zong ah rian a ṭuanmi minung 10 leng zong ralphaw hman dingin an tlaih hna, tiah People’s Defense Comradein ṭuanvo ngeitu nih cun a chim chap. SAC ralkap pawl cu Ye U peng nitlaklei ah a ummi Ywamithar khua pawng le Musone khua pawng ah phu hnih in an i ṭhen i umhmun an khuar, tiah theih a si.
Bilin Le Kyaikto Karlak Khualtlawng Motor Cansualnak In Minung 7 Hliam An Tuar. Mon ramkulh Bilin le Kyaikto karlak ah khualtlawng phurtu motor cu cansualnak a tong tiah tualchung mi nih an chim.
August 22, zinglei suimilam 10:00 tluk ah Bilin khua in an chuak mi khualtlawng motor cu Aluley khua pawng palai vut (Plywood) sernak pawng ah aa let tiah theih asi. Khualtlawng minung 40 tluk a phurmi motor ah hin pa 1, nu 4 le ngakchia 2 an dihlak minung 7 cu hliam an tuar tiah an langhter. Motor cansualnak in hliam tuarmi 7 hna cu Bilin peng sii-inn pi ah an tlikpi hna tiah theih asi. Credit: The Chinland Post, The Chn Post, Lungmili MEea