Non CDM saya/ma pawl nih camipuai phi ding in siangngakchia cheukhat phone in an lemsoi hna

Non CDM saya/ma pawl nih camipuai phi ding in siangngakchia cheukhat phone in an lemsoi hna
=============
Myanmar ram uknak Min Aung Hlaing nih hramhram in a laak hnu siang ca chim saya/ma tampi CDM an tuah lio ah CDM a tuah lomi saya/ma hna nih Hakha khuapi chung siangngakchia cheukhat hna cu camipuai phi ding ah phone an chawnh hna i an lemsoi hna tiah kan theih.

Chin Ramkulh Fimcawnnak zung lei in thawng kan theih ning ah tangcheu in taanghra tiang March 17 ah camipuai an phi dih lai tiah kan theih. Cawn ning hlun in an cawn mi a phi ding hi cu taang kua le taang hra lawng an si lai i, G6 in G8 hi a thar an cawnmi in an phi lai tiah CDM a tuahmi siangsangruun ca chim sayama pakhat sin in kan theih.

Chin Ramkulh Peng kua chung ah, peng a tam deuh hi cu SAC ralhrang hruainak in tuah mi camipuai phit an i tim nain a phi hnga ding siangngakchia tu cu an tlawm tiah kan theih. Myanmar ramhuap in 2022 taanghra camipuai phi ding lawng hi minung 312299 an si tiah theih a si.

Mandalay Taihpaan lam puahkehnak ah a thi mi Urban Guerilla PDF ralkap pahnih an ruak cu council ralhraang nih an lakter hna lo, an i thup i an bawh. Nizan zaanlei ah Mandalay ramthen, Chianmyatharsi peng Taihpan lam le 78 lam pawng ah puahkehnak a chuak i Urban Guerilla lei pahnih an thi i cu a thi mi rammi ralkap pahnih ruak cu an lakter hna lo.

Lam an kham i an bawh tiah tualchung mi nih Yangon Khit Thit Media ah an chim. “Zing ah cun minung pahnih ruak le cycle zong a kaang dih. Ralhraang pawl nih lam an kham dih i mithi ruak cu cuti cun an chiah. Uniform aa hruk lo mi ralkap zong an um. An i thup i an bawh.

Hohmanh nih an ruak an la ngam hna lo. Mizapi zong tih hna seh tiin an kan thihphaih. Mah ti in nan um ahcun mah ti khin nan si ve lai tiah tih hna seh tiin an kan thih” tiah Mandalay tualchung mi pakhat nih a chim. Mandalay Ranger PDF nih zahan i a thi mi pahnih cu PDF an si tiah theihternak thawng an thanh.

Naungcho ah Northern PDF le council ralhraang kar nihinh chung kahdohnak ah ralhraang ralbawi tel in 40 nak tlawm lo an thi. Shan ramkulh, Naungcho ah Council ralhraang le Northern PDF kar March 13-14 nihnih chung kahdohnak a chuak i ralhraang commander pakhat tel in 40 nak tlawm lo an thi tiah tualchung thawnghram nih Yangon Khit Thit Media ah a chim.

March 13 ah Council ralhraang Battalion No. 147, Battalion No. 59 le Shan Northern PDF kar kahdohnak a chuak i ralhraang lei an commander pakhat tel in 25 an thi tiah kan theih. March 14 ah Council ralhraang Battalion No. 147, Battalion 99 le Shan Northern PDF kar kahdohnak a chuak than i ralhraang 15 an thi tiah kan theih. Cuti kadohnak a fah i council ralhraang lei thi le hliamtuar an tam ca ah hnu an kir than i PDF lei zong hnu an kir ve tiah kan theih.

Dawei-Hteekhee lam ah KNU le Council ralhraang kahdohnak ah ralhraang panga an thi, Second Battalion Commander pakhat aa tel. Taninthayi ramthen, Dawei khua le Thailand ramri pehtlaihnak lam ah March 13 zing, chun le zaan in kahdohnak a chuak tiah tualchung mi hna le cuka lam ah a tlungkal mi cheukhat nih an chim.

Karen mipi lak ah minthang a si mi Kawlaphu phu he kahdohnak a chuah hi a si tiah kan theih. Kahdohnak ah council ralhraang IB-267 battalion in 5 an thi, 3 hliamtuar an um. Hriamnam cheukhat zong an lak tiah Karen ramkulh thawng a tialtu Kwe Ka Lu News nih a tial.

Athi mi chung ah Second Battalion Commander zong aa tel tiah kan theih. RPG pakhat, 60MM pahnih, MA 2 zun li le a dang thilri zong kan lak tiah an chim. Kahdohnak ruang ah khuami cheukhat hliam an tuar i a tlawm bik 2 an thi tiah tualchung thawnghram nih a chim. Council ralhraang pawl nih Dawei-Hteekhee lam khualtlawng motor 5 nak tlawm lo porter an phurhter hna tiah kan theih. Credit: The Hakha Post, Khit Thit Media