Nihin Zongah Laimi Khrihfa Ai Timi Tampi Nih Leirawitu Judas Iskariot Lam Ah An Kan Hrui Cuahmah

Nihin Zongah Laimi Khrihfa Ai Timi Tampi Nih Leirawitu Judas Iskariot Lam Ah An Kan Hrui Cuahmah
=====================
PHAISA DUH TUK HI SUALNÂK VIALTE HRAM A SI (THE LOVE OF MONEY IS THE ROOT OF ALL KINDS OF EVIL)1Timote 6:10 ah “Phaisa duh tuk hi sualnâk vialte hram a si’ (The love of money is a root of all kinds of evil) tiah a rak timi hi a dik peng i a dik zungzal ko lai. A hlei khun in nihin kan boruak ah hin a dik khun ko rua!A ngai ngai tiah Min Aung Hlain nih uknâk a lâk i mi tampi nunnâk thisen a luan i thinphâng thlalau le lungrethei vânsâng i kan umnâk zong hi a hrampi tak tak cu ‘Phaisa duhtuk ruangah’ a si.Zeicatiah ram chung mipi nih kan covo a simi Kawlram ah a chuakmi sui le lungvar le thing țha țha le oil a phunphun hna ramdang ah zuar i phaisa relcawk lo hmuh le rum cu a duh tuk mi a si caah a si.

Amah bangin âna a la khotu hei si u sih law Laimi Khristian chung zongah amah ban tuk tam nawn kan hei um ko hnga dah kaw.Phaisa duh tuk nâk nih minung nunnâk hi a uk ah cun midang an thih le an temtuar le an sifah le an harnâk hna cu an zei a poi lo i zei ah an rel theng lo.Ralhrâng tiah min an bunhmi ralkap le palik hna nih an inn ah an fuh hna i an tlaihmi le fak tak takin an hrem hnu ah cheu khat an nunnâk tiang a dih i cheukhat thongah an thlak i a fak bikmi hremnâk an pekmi hna zong hi phaisa an duhtuk ruangah leirawitu (dalan) hna nih an umnâk hmun hma an chimh hna ruang ah a si.

A ngai ngai ti ah cun hi leirawitu dalan hna zong hi an miphun le an minung hawi an huat tuk hna ruangah a si theng lai lo,phaisa an duh tuk ruangah a si.Cun lih fangfak bak a si tiah an hngalh ko bu le miphun le ram ca le an minung hawi caah thihnâk le fahnâk a pe khotu zong a si kho ko tiah an hngalh ko bu ah fb ah lih thawng a post lengmang mi zong hi a hrampi tak tak cu phaisa an duh tuk ruangah a si.Kan ram buaibai ruangah ah Bank cheu khat ah phaisa kuat khawh a si lomi hi cânrem ah rak la in a hleihluat in phaisa kuat man an sânter i an lâkmi zong hi midang zawn ruah lo ruangah si theng loin phaisa duktuknâk nih achuahpi mi theipar phun khat a si.

Mi za ah za dengmang Kristian (Khrihfa) a simi Chin State cu kawlram State vialte ah eihmuar a tamnâk bik State a si tiah an timi zong hi phaisa duh tuk ruangah a si tiah Baibal nih a chimmi hi a dik peng i a dik zungzal ko lai.Phaisa hi amah te ah cun sual a si lo.Kan țuanman tein kan hmuh i kan duhherhmi kan i zalhnâk caah kan hmanmi phaisa hi a țha tak tak mi a si lio ah haukauhnâk lungput he kan țuan man a si lomi tiang ngeih duhnâk kan ngeih ah cun a palh kho lomi Baibal nih a chim bangin Sualnak or țhatlonâk vialte hram a rak si tak tak ko.Judas Iskariot nih phaisa sawmthum ah a Bawipa a zuar i rawitu (dalan) ah ai cannâk zong kha a Bawipa a huat ruangah a si theng lai lo. Phaisa a duhtuk ruangah a si i a donghnâk ah amah tein a lei nunnâk zong a donghter i zungzal a mit lomi Hell mei ah a tu tiang a umnâk hi a si.

Nihin zong ah Laimi Kristian (Khrihfa) ai timi tampi cu phaisa duhtuknâk nih Judas Iskariot lam ah a kan kalpi cuahmah i mah le mi phun hawi a leirawitu dalan ah kan i canmi le FB ah Lih thawngthanhtu ah kan i canmi le a hleihluat in phaisa kuat man a latu ah kan i canmi le țuanman a si lomi tiang eihmuar lâk a duhmi le ziknawh a latu ah kan i canmi hi Baibal nih a rak chimmi ‘Phaisa duh tuk hi sualnâk vialte hram a si’ tiah a rak timi a tlintertu kan si.Cucaah Baibal nih ‘Phaisa duh tuk hi sualnâk vialte hram a si’ tiah a rak timi hi a dik peng i a ding zungzal ko lai. Credit: Salai Ephraim, Pa Cuang Facebook