Hakha Sii-inn Pi Ah Meithal Thawng Pehtlai In A Thang Tiah Tualchung Mi Nih An Chim
=======================
Chin ramkulh khualipi Hakha sii-inn pi cu Chin ralkap hna nih nizan July 2 zan suimilam 9:00 hrawng ah an kah i sii-inn hngaktu SAC ralkap nih meithal an puah len ve, tiah Hakha ummi sinin theih a si. Hakha sii-inn um mizaw hna cu meithal thawngpang ruangah thin phang ngai in an um, tiah an chim.
Cu pinah Nihin July 3 deilei ah SAC ralkap Jet Fighter nih Hakha le Thantlang karah bomb a thlak. Hakha, khusihlubo tlang cung um SAC ralkap zong nih zing suimilam 8:00 hrawng ah hriamngan an kah len, tiah tualchung mi hna nih The Chin Post ah an chim. A luancia June 27 zan zong ah Chin ralkap nih Passport zung pawngkam cu an rak kah caah zung inn cheukhat zong an rawk, tiah theih a si.
Chin ramkulh, Kanpetlet khua ah cycle aa cit lio mi pa pakhat cu SAC ralkap nih July 2 zinglei sml 9:00am hrawng ah meithal in an kah caah fak ngai in aa hliam tiah thawng theih a si. Kanpetlet khua, Myoma thlaan ah hmunhma a khuar mi SAC ralkap pawl nih an kah hi a si i kah a tong mi pa hi a cycle in a zaam manh tiah khuami nih Ayeyarwaddy Times ah an chim.
“SAC ralkap pawl hmunhma an khuarnak hmai a tan lio ah an kah i a ke an khen caah a ke aa tan. A cycle in a zaam manh” tiah an chim. SAC ralkap nih kah ruang ah hliam a tuar mi pa cu himnak hmun ah an thlop lio a si tiah an chungkhat pawl nih an chim fawn.
Cubantuk in a luancia June 27 le 30 zong ah Mindat khua ah SAC ralkap nih khuami pa pakhat an kah caah a nunnak a liam i adang pakhat fak ngai in aa hliam tiah theih a si. Update-Timit lei Pialva pawng kam leiah zingkhuan in tutiang ralhrang le Chinralkap an i kap peng. Thi le hliam an um le um lo fiang in kan thei ve rih lo, nawlngeitu nih an thanh te ko lai.