Nihin Kawlram Pumpi Thawngpang Nehnuai

Nihin Zanlei Suimilam 4:PM tiang Thawngpang Nehnuai.
================
Yangon khua, Mayangone Myone, Thamine, ah min theih lomi nu pakhat ruak an char, online chuekhat ah nizan CNN reporter nu nih bia a halmi hna nu pahnih lak ah pakhat nu kha a lo tiah an langhter, nain a ho a si theih a si rih lo. Yangon khuachung, Thingangyun Myone ah minung 15 an tlaih hna. Yangon khuachung, Thaketa, Dawbon le Thanlyin ah lamkhamnak tete an tuah than. North Okkalapa le Hlaing Thayar ah cheukhat hmunhma ah, pangpar i ken in Feb.1 ni a tu tiang a thimi upat peknak an tuah.

Kawlrawl laifang hrawng hrang khua pawl ah duhlo langhter nak lamzawhnak a fak deuh deuh. Sagaign ramthen, Monywa ah nizan minung pathum an thi, 16 hma an pu, atu zing lamzawhnak minung pathum an thi than, Mon ramkulh Thaton khua ah atu zing lamzawhnak ah minung pakhat a thi, pakhat hma a pu. Mandalay ramthen, Amarapura khua ah lamzawhnak a tuahmi han cu ralkap le palek nih an then cheu hna, minung pakhat hma a pu.

Chin ramkulh, Hakha khua ah atu zingah minung 8 an tlaih hna, Hakha Post zung an luhhnawh. Nihin zongah, Mandalay ramthen, Kyaukse, Myingyan, Chan Mya Tharzi, Bagan, Sagiang ramthen, Sagaing, Kalay, Tamu, Mon ramkulh Mudon, Magway ramthen Aunglan, Kayah ramkulh Loikaw, Pyinmana(Nay Pyi Taw), Kachin ramkulh Myitkyina, Tanintharyi ramthen Dawei, Shan ramkulh Kyaukme hna ah lamzawhnak an tuah rih thiam thiam. Atu tiang ah a thimi le hliam hma a pu mi an um rih lo.

Nizan ah, Sagaing ramthen, Yinmabin Myone, Thabyay Aye khua te ah palek pawl nih phungki pa tlaih an timh, cu lio ah meithal an puak hnawh hna i minung 6 hliam an tuar. Nizan i Kalay lamzawh nak i hma a pu mi pakhat a thi.

Zahan Thawngpang. Zahan zantim suimilam 2 hrawngah Yangon khua, Shwepyithar Myone, Wartayar Sethmuh zone ah meithal kahnak a um, zei ruangah an kah, a ho nih a kah timi an thei rih lo. Zahan zanlei suimial 7 hrawngah CRPH acting minister Dr. Zaw Wai Soe inin cu mei in an cheh caah tlawmpal rawh ra nak a um. Zahan ah Thaketa ah minung 6 an tlaih hna. Zahan ah Dagon Seinkan, Yuzana Garden ah minung 11 cu inn ah an tlaih hna.

Kayin ramkulh, Myawaddy khua ah palek umnak cu zan suimilam 8 hrawng ah kutcheh bomh in an cheh hnawh hna. Palek lei pakhat aa hliam. Nizan ah Sagaing ramthen, Tamu Myone, Nan Par Lone khua ah, CDM a tuahmi palek pakhat a thi. Nihin ah Nan Phar Lone khua ah CDM a tuahmi palek nih kutcheh bomh pathum cu palek umnak ah a cheh hnawh hna i, Palek panga an thi, cun a mah le mah zong aa kah i a thi ve.

Radio line a thar, Federal FM an timi kha, nizan ah SAC nih theihpi mi a si lo, illegal a si tiah an thanh. Cu FM cu Yangon khua chung myone 15 ah ngaih khawh a si cang. MRTV nih nizan ah, minung 20 cu penal code article 505 (a) in sual phawt an si lai tiah thawng a thanh. Cu ahcun hlasak thiam R Zarni zong aa tel ve.

Nizan ah U Win Htein cu video conference in biacheih nak an tuah, a sitni pa nih a ngandam nak a tha mi a lo ko, April ni 9 ah court ah chuah than a si te lai a ti. EPC nih thawng an thanh ningah, zarhpi ni April 4 ni ah Lanmadaw, Latha, Pabedan, Dagon, Bahan le Mingalar Taungnyut ah zingka suimilam 10 in zanlei 3 tiang mei a mit lai tiah thawng an thanh. Credit; Van Lian Thang