Tonzaang Sianginn Umhmunkhuar SAC Ralhrang An Kah Hna Caah 2 An Thi; Meithal Zun 2 CDF-Tonzaang Nih An Lak
=========
Chin ramkulh Tonzaang peng BEHS sianginn chungah umhmun khuar mi SAC ralhrang hna cu CDF-Tonzaang nih an kah hna caah ralhrang 2 an thi tiah kan theih.
July 13 zinglei ah kahdohnak a chuah hi a si. Hi kahdohnak ah ralhrang 2 an thi i meithal zunkhat le 60MM zunkhat zong CDF-Tonzaang nih an lak piak hna. Hi sianginn chung ah ralhrang 5 tluk lawng umhmun khuar mi an si. Minute 15 tluk an i kap tiah kan theih.
July 12, khan North Korea nih an ram khuachaklei rili hoih in long-rang ballistic missile a kah ṭhan tiah an inn-pa si mi South Korea le Japan ṭuanvo ngeitu nih an chim. South Korea Joint Chiefs of Staff nih an ram caan zinglei suimilam 1:00 tluk ah Pyongyang hmunhma in long-rang ballistic missile hi an kah tiah a chim.
Japan coast guard le defence ministry zong nih North Korea missile an kah mi an hmuhnak kong a chim in minute 74 chung hrawng cu km 6,000 cungsang ah a zuang tiah a chim ve. Japan coast guard nih missile hi Korea peninsula chaklei lam rili ah a tla tiah a chim.
Nato summit hmangin Lithuania khuapi ah Japan prime minister Fumio Kishida le South Korea president Yoon Suk-Yeol hna cu July 12, khan tonpumhnak ngei in North Korea konglam zong an ceihphai tiah theih asi. Ram pahnih pin ah Australia le New Zealand telkhawhnak ding timhlamh a si tiah Matsuno nih a chim.
July 13, Assam palik le Mizoram Champhai Palik nih a puak kho mi hriamthil sernak Gelatin Kg 100, Amonium Kg 50, Safety Fuze bundle 6, Bom Kep 636, 12 zenthong -28 le Rs 75,000 an tlaih pin ah a phurtu motor cycle pahnih le minung 4 an tlaih hna tiah theih a si. Mizoram Champhai palik le Assam palik nih an tlaih mi hna minung 4 lak ah 2 hi Myanmar ram mi ansi tiah an langhter.