Nihin Hakha Khualipi Thawngpang update!

SAC Ralkap Helicopter Pakhat Hakha A Phan!
=======
Chin ramkulh, khualipi Hakha ah SAC ralkap Helicopter pakhat cu nihin November 27 ah a phan, tiah theih a si. Nihin chun sml 12:00 hrawngah SAC ralkap Helicopter pakhat Hakha a phan. Raltuknak Helicopter cu a si lo, voidang a rak phan tawnmi a si ko. Raltuknak Helicopter a zuan tawn ning nak niam deuh in a zuang, tiah tualchung mi pakhat nih The Chin Post ah a chim.

“Caan sau ngai aa dinh hnu zanlei sml 2:42 ah Helicopter cu Hakha in a kir ṭhan. Zei dah a phurh ti tu cu hngalh a si lo nain hriamnam le zen-kuan a phurh men lai,” tiah tualchung mi pakhat nih cun a ruah damhnak a chim.

SAC Ralkap Nih Hriamngan An Kah Ruangah Tahan Sangum Minung 6 Hliamhma An Pu. Sagaing ramṭhen, Kalaymyo Tahan sang ah November 26 zinglei le zanlei ah SAC ralkap nih hriamngan an kah mi hriamngan kuan cu inn cungah a tlak caah sangmi minung 6 hliamhma an pu, tiah tualchung mi hna nih an chim.

“A voikhatnak hriamngan kuan hi inn cungah a tla i tarnu pakhat le ngakchia pakhat an ke ah a khen hna pinah uico pakhat zong a khen caah a thi. Cu zan ah cun hliamhma pumi hna cu sang mino nih sii-inn ah an kalpi hna,” tiah Tahan sang ummi pakhat nih a chim.

Sang chungah a voikhatnak an kahmi hriamngan kuan a tla hnu caan tlawmpal ah Yahthahsone(ရသာစုံ) dawr le private sianginn karah a tlak ṭhan caah tualchung minung pathum hliamhma an pu chap, tiah theih a si. Hliamhma pumi hna cu an inn he ai naihnak sii-inn ah an kalpi hna. Atu kar hrawng hi Kalaymyo nitlaklei le chaklei ah kahdohnak a zual ngaingai caah tualchung mi hna zong ai chawkhlat mi an tlawm ngangai, tiah theih a si.

ZinKyaik Khua Ah Uihrut Nih Ngakchia 10 Telh In Minung 11 A Seh Hna. Mon ramkulh, Zinkyaik(ဇင်းကျိုက်) khua Falat sang ah uihrut nih ngakchia 10 telh in minung 11 a seh hna caah hliamhma an pu, tiah theih a si. November 27 zing sml 9:00 hrawngah Falat sang um Kong Htauk(ကုန်ထုတ်) hlei pawng ummi uihrut pakhat nih lam ah ai chawkmi le ngakchia 10 telh in minung 11 a seh hna, tiah tualchung mi hna sinin theih a si.

“Uihrut nih ngakchia nu a hmai ah a seh dih hnuah a zam i inn chungah a ummi zong a va seh hna. Bazar zong ah a va lut i mi a seh hna pinah Khalauk Ing(ခလောက်အင်း) sang a ummi pakhat zong a seh,” tiah tualchung mi pakhat nih a chim.

Uihrut nih ngakchia 10 le upa pakhat a seh hna i an hmai, an ke le an baan ah a seh hna, tiah theih a si. A luancia September 11 lio zong ah Paung peng Pankone khua in Zinkyaik khua lei ah a zammi uihrut pakhat nih, ai chawkmi le inn chungah a ummi minung 20 leng a rak seh bal cang hna, tiah theih a si.

Kanbalu Peng Khua 7 In Tualchung Mi A Thong Renglo An Zaam. Sagaing ramṭhen, Kanbalu pengchung ah SAC ralkap nih rallam an sial caah khua 7 in khuami a thong renglo hna cu nihin November 26, zinglei ah an zaam tiah Kyunhla, Kanbalu peng ah cawlcanghnak a tutu phu hna nih an thanh.

Kanbalu peng Kotaungbo(ကိုးတောင်ဘို) kha-mah-yiah 363 in minung thazaang 53 cu nihin November 26 zinglei suimilam 8:30 ah rallam sial in khuachung ah checkhlatnak an tuah tiah theih a si. Rallam sialtu SAC ralkap hna ruangah Chatkone, Kaimah, Shiasaung, Mitalinkone, Hnawkone, Zikana le Shawphyukone khua tiin khua 7 ah khuami a thong renglo cu an umnak inn kaltak in an zaamnak a si.

SAC Ralkap Nih Tualchung Mi An Thah Lengmang Hna Caah Punnakyun Peng Khuabawi 60 Leng Nih An Rian An Chuah Taak. Rakhine ramkulh ah khadohnak a chuah than hnu Punnakyun peng ah SAC ralkap nih tualchung mi hna cung ah a phunphun in hremnak le tazacuai pinah mipi an thah lengmang hna caah khaute lei khuabawi minung 60 leng nih tuthla chung ah kan rian ngol ding in ca kan chiah tiah khuabawi hna nih an chim.

“Keimah cu tu thla ni 18 in rian chuahnak ca ka chiah, cun khuabawi dang 60 leng nih rian chuahnak ca an chiah ve, cu hnu ah midang zong a chiami an um rih, kan tuahmi rian cu zeihmanh a umlo, SAC ralkap nih khuachung an luh tik ah thawng an kan thanh hmasa ding a si na in a tu ah cun thawngthanhnak zeihmanh umlo in an duh tik ah an chuak an lut, cu leng ah khuami zong faktuk in an thah hna” tiah khuabawi rian in ai dinmi pakhat nih a chim.

Punnakyun peng ah khuabawi 95 kan um i cu chung ah 60 leng nih rian chuahnak ca kan chiahcang tiah an chim chih.
A luancia November 10 ah SAC ralkap hna nih Sininnkyi(ဆင်အင်းကြီး) khua cu luhhnawh in tualchung mi 10 cu faktuk in a hrem hna hnuah a rak thah hna leng ah tualchung mi an umnak inn hna zong an khanghpiak hna tiah theih a si. Credit: The Chin Post