Nihin Chin ramkulh thawngpang update thar!

Nihin Chin ramkulh thawngpang update thar!
=========
Matupi le Paletwa lamcung lei ah a rak kaimi SAC ralkap pawl cu April 10 mengtung 9 ah CDF-Matupi he kahdohnak a chuak. Cu kahdohnak ahcun, SAC ralkap a tlawmbik 2 hliamhma an tuar, CDF-Matupi in mipi hriamtlai 1 hliamhma a tuar tiah CDF-Matupi nih a thanh.

April 12-14 tiang SAC ralkap le CDF-Matupi cu Walampi khua, Kala khua le Walamte khua an phan. SAC ralkap nih an rak tannak khua mipi ar, vok le maheh hna an lak lengah Walampi khua nih an zapi te caah an khonmi facang vialte an khanghpiak dih hna tiah theih a si. SAC ralkap pawl le CDF-Matupi karlak ah kahdohnak voi 3 a chuak i SAC ralkap 10 an thi, 5 nih hliamhma an tuar tiah theih a si.

SAC ralkap nih kahdohnak an tuah ruangah Matupi-Paletwa lam cungah a ummi khuami 1,000 leng ram tangah an zaam tiah CDF-Matupi nih cathanh a chuah.

Mon Ramkulh Kyaitmayaw Peng BGF Camp Kahdoh An Tong BGF 5 An Thi, Mon ramkulh, Kyaitmayaw (ကျိုက်မရော) peng Chawng Hnakhuah (ချောင်းနှစ်ခွ)hleidonh ah umhmun khuar mi SAC kuttang BGF hna cu nihin April 16 zinglei ah a ho si theihlo mi phu nih an kahdoh hna caah BGF 5 an thi tiah theih a si. ” BGF sakhan kahdoh an tong, minung 5 an thi, a tu tiangah cun cu hleidonh cu an phih chung” tiah tualchung mi nih an chim.

” Thil canning dikthlir cu fiang in theih a si lo, nihin zinglei suimilam 6:30 hrawngah kahdohnak a chuak i BGF 5 an thi, an ruak cu thlaan hmunah kalpi an si” tiah Chawng Hnakhuah(ချောင်းနှစ်ခွ) mi bawmchantu phu chungtel pakhat nih a chim. A luancia March 19, ni zong ah cu Chawng Hnakhuah (ချောင်းနှစ်ခွ) hleidonh ah ummi palik sakhan cu a ho si theihlo mi phu nih an rak kahdoh hna caah palik pakhat a thi i, palik 2 nih hliamhma an rak tuar tiah theih a si.

Pauk Pengah SAC Ralhrang Nih Minung Umnak Inn Mei An Khangh Pinah Ralzaam Mipi Eidin, Facang, Ti Rawl Mei An Khangh Piak Than! Maggui ramthen Pauk peng chungah a ummi mipi umnak inn meikhanghtu SAC ralhrang ralkap nih inn an khangh lawng siloin ralzaam mipi eidin tirawl tiangin meikhangh in an hrawhpiak than tiah thawng kan theih.

SAC ralhrang ralkap le Buesawtyi hna nih April 7 thawkin meikhangh an thawk i, khua (13) nak tam mei an khangh cang tiah tualchungmi hna sinin kan theih. Pauk he naihniamnak Pakukku le Seikphyu peng hna zongah SAC ralhrang ralkap nih mei an khanghpiak tiah kan theih.

Pauk peng chung Kyaukh-U khuami razaammi hna an si. SAC ralhrang ralkap nih khua chung i minung umnak inn meikhangh lawng siloin ralzaam mipi eidin tirawl tiangin mei an khangh. Ralhrang ralkap an tih tuk caah khuami dihlak an zaam tiah Pauk Alliance Group nih April 15 ah cathanh an chuah. Cucaah ralzaam mipi hna caah eidin, tirawl, sii ai le thilpuan hna cu bawmh an herh hringhran tiah an langhter.

Mariupo khuapi Vuanci ” Mariupo Khuapi Chung Lawngah Mithi Ruak 1,0000 Leng Hmuh A Si!! Ukraine ram ah a um mi Mariupo khuapi cu Russia ralkap hna nih zarhhnih chung an kulh dih hnu ah tih a anung tuk mi thawngpang hna a chuak i khuami miluu 10000 leng an nunnak aliam mi miruak hmuh an si tiah tiah Mariupo khuapi vuanci nih a chim tiah AP thawngzmah nih a tial.

Ukraine ram ah a um mi Russia nih lak dingah aa timh mi lawng si lo in an ram in nichuak lei ah ralkap thazaang tam taktak in Russia nih tuk kah ding in timhlamh nak a ngeih cuahmah lio ah ” Putin nih chemical hrimnam pawl a hman khawh nak kong ” Ukraine president Zelensky nih ralring nak a pek hna tiah theih a si.

Tig a nung tuk mi pakhat cu Mariupo khuapi chungah sivai a si mi thilri pawl van lei in an rak tlak nak kong, Ukraine tatyin pakhat sinin fiang fai tein theih khawh a si lo mi thawngpang zamhnak pakhat cungah Nitlak lei i Cozah riantuan tuanvo ngei tu hna nih hlethlainak an ngeih cuah mah lio a si tiah theih a si.

Kiev khuapi chungah a um mi hna nih a fak tuk mi  kahdoh an tuar cuah mah mi hmuh an si ko nain Russia ralkap hna nih lak dingah kuan le zen bomb, cung lei vanlawng le tanks hna in khuapi chungah a kah cuah mah ko nain, Kiev khuapi chungah a cang mi thawngpang pawl cu online cungah thawngzamh lo dingin an phihkham tiah theih a si.

April ni 12, AP thawngzamh nih phone in thawng hal nak an tuah tikah Mariupo khuapi vuanci Vadim Boyle nih ” Russia ralkap hna nih minung fa lo loh in an thah mi pawl cu an thawngpang theih ter hna lo in an thuh i minung zawruahnak bomtu pawl cu zarhkhat chung caan sau pi luh ter duh loin an kham hna” tiah a chim. Mariupo khuapi chungah a nunnak a liam mi thongkul lei an um kho ti zong in a chim chap.

A rauh hlan ah himnak hmun kan ser khawh cang lai tiah NUG caan karlak President nih a chim. People Defennse Force le tlangcung hriamtlai hriamtlai phu hna nih khuate tampi cu an tlaih khawh cang i a ruah hlan ah himnak hmunhma pawl kan ser khawh cang lai tiah NUG caan karlak President Duwa Lashi La nih a chim.

Caan karlak President nih April 16 zinglei ah biachimmnak a ngeih i cu chungah cun, NUG cozah nih himnak hmumhma pawl ah uknak le biaceihnak hna kan dirh chih lai tiah a chim. A hlan ah kan rak thanh cang bantuk in Democracy phung a si lomi 2008 phunghram ah kir than a si ti lai lo i Democracy charter ning tein kan kal lai tiah a chim.

SAC cu ramdang nih theihpinak le hnatlaknak a tlawm chin lengmang i NUG cu phungning tein cohlannak a karh chin lengmang tiah a chim. Cun, kan pawngkam ram hna nih, Myanmar ram mipi hna duhnak kha upat le thapek in ramri hna ah buainak tampi a chuahter tu SAC cu hnatlakpi loding ah caan karlak President nih a forhfial hna.

Cun, Russia nih Ukriane a tukmi cu ka tangthlak i Ukraine cozah hnatlakpinak a ngeimi UN General Coference biakhiahnak cu ka dirkamh. Hramhram uknak hrawh khawhnak ding caaah bawmhnak kan pe rih ko uh tiah a nawlnak zong a chim chih.

President zung biachimnak nawl a ngeitu pakhat NUG nih rian a khinh. President zung biachimnak nawl a ngeitu siding ah U Kyaw Ze cu riankhinh a si cang tiah NUG President zung nih April 16 ah a thanh.

NUG President zung nih mipi, ramdang hna he tha deuh in pehtlaihnak a ngeih khawh nak le caankhel tein thawngpang a thanh khawhnak hnga caah tiin U kyaw Ze hi rian khinh a si tiah NUG caan karlak President Duwa Lashi La nih a thanh.

NUG cozah dirh kumkhat a tlin hnu ah a tu bantuk in President zung biachimnak nawl a ngeitu riankhinh a si hi a si.
NUG cozah nih mipi he tha deuh in pehtlaihnak a um khawhnak hnga caah le bawmhchannak fek deuh in rian a tuan khawhnak hnga caah tiin Media phu dirhding in kan i timhtuah cuahmah lio a si tiah NUG Minister U Htin Lin Aung nih American um Myanmar rammi hna tonnak puai ah a rak chim.

Myanmar ram pumpi in khanghpiak a tongmi inn 9,187 a phan. Kawl ralkap nih hramhram in uknak a lak hnu ah Kawlram pumpi in khanghpiak a tongmi inn 9,187 a phan cang tiah Data for Myanmar ni April 14 ah a thanh. A tu cazin hi SAC ni hraamhram in uknak a lakhnu 2021 February 1 in 2022 April 13 tiang khawmhsuat khawhmi a si tiah theih a si.

Cu chungah, Sagaing ramthen hi inn 5,617 in a tambik khanghpiak a tongmi an si. Magway ramthen ah inn 1,814 le Chinram ah 1,132 in pahnihnak le pathumnak ah an dir. Khanghpiak a sinak hi rampumpi hmunhma 254 ah a cang tiah Data For Myanmar cazin in theih a si.

SAC in biachimnak nawl a ngeitu Major-General Zaw Min Htun nih cun inn a khangmi hi SAC ralkap si loin PDF pawl an si tiah a rak chim. Data For Myanmar cazinning ahcun, March 31 tiang inn 7,973 khanghpiak a si i April 13 cun inn 9,187 tiang a phanh caah zarhnih chungah inn 1,214 khiangpiak a si tiah a langhter.

HTPHC nih innkhangh a tongmi Tinam khuami hna le Ralzaam khua 14 bawmhnak an pek hna. Hakha Township Public Healthcare & IDPs Management Committee nih Tinam khua ah SAC ralkap nih an inn an khanghpiakmi hna le Ralzaam khua 14 hna sin ah bawmhnak tete an pek hna tiah theih a si.

Eidin le a dangdang an bawmh khawhmi hna hi Facang tun 207, chiti cuai 214, cite thuk 1449, pe cuai 321, nga dur 214, Calcium thuk 1o7 le innkangmi hna caah phaisa tlawmpal te an si tiah theih a si. Hakha Township Public Healthcare & IDPs Management Committee cu 2021 June 21 ah HCMF le HBA thluachuah peknak in Covid-19 zohkhenhnak, mipi ngamdamnak le Hakha pengchung ralzaam pawl zohfelnak caah rak dirh a si. Credit: The Chinland Post