Nihin Chin ramkulh chung thawngpang update!

CDF-Kanpetlet Nih SAC Ralkap Pathum Ruak Kan Khangh Tiah Cathanh An Chuah!
=========
Chin Defense Force-Kanpetlet phu nih a luancia September 11 in kanmah hmunram chung ramri hna ah hmunhma thianhhlimhnak kan tuah, cuti hmunhma thianhhlimhnak an tuahmi kong cu SAC ralkap nih thawng an theih caah rallam an sial i, September 20, zaanlei suimilam 3:00 in 4:00 tiang kaphnih kar i kahdohnak a chuak tiah theih a si.

Kaphnih kar i kahdohnak ah SAC ralkap lei in minung 5 nak tlawmlo an thi i, minung 3 ruak cu kan khanghpiak hna tiah an thanhmi ah cun an langhter chih. Kaphnih kar i kahdohnak ah tualchung hriamtlai phu lei hliamhma tuarnak umlo in hnu an tolhkho tiah theih a si. Kahdohnak a dih hnu hmunhma thianhhlimhnak kal pah ah MA kuan 201, 40mm lung 3 le kuan kham angki zun khat kan lak tiah Chin Defense Force Kanpetlet nih September 21 ah cathanh an chuah.

SAC ralkap kutang um palik pakhat a hrimthil he CDF-Kanpetlet sin ah CDM a tuah. Palik battalion 17 Naypyidaw in Chin ramkulh Kanpetlet pengah SAC ralkap kuttang rianṭuantu palik Pyih Phyo Zin(တသ, လ – 266729) cu kanmah sin ah i fonh a duh caah CDF-Kanpetlet nih kan va don tiah CDF-Kanpetlet nih cathanh an chuah.

SAC ralkap kuttang rianṭuannak in a chuak i CDF-Kanpetlet sin ah aa fonhmi palik cu laksawng ah phaisa pek a si hnu ah, kal a duhnak le a himnak hmun ah kan kalter tiah an thanhmi ahcun an langhter. CDM a tuahtu palik nih aa kenmi hriamthil hna cu G-3 pakhat, M16 pakhat, G-3 kuanbawm 3, M16 kuanbawm 2, 7.62 kuan 110, 9mm kuan 5 le kuan kham angki zunkhat he CDM cawlcanghnak a tuah. CDF-Kanpetlet nih mupi sin ah fonh a duhmi palik le ralkap hna cu lunglawm tein kan in don peng ko hna tiah Chin Defense Force Kanpetlet nih cathanh an chuah.

CDF Mindat Nih SAC Ralkap Gate Pakhat An Kah Hna, Mipi Leng Chuak Lo Dingin Cathanh An Chuah. Chin ramkulh, Mindat khuachung luhka zawn i umhmun khuarmi SAC Ralkap Gate pakhat cu september 21 ni zinglei suimilam 5:30 ah CDF Mindat nih an kah hna tiah theih a si.

SAC Ralkap leiin a thimi le hliamhma tuarmi an tam lai tiah CDF Mindat nih an thanh.Hi kahdohnak an tuahnak cu SAC ralkap nih mipi lemsoinak caah tuah an timhmi eidin thilri zuarnak dohkalhnak caah tuah mi a si tiah CDF Mindat nih an langhter. SAC ralkap nih mipi lemsoinak caah eidin thilri zuar an timhmi ah mipi kal lo ding le leng ah chuak rih loin inn teah um cio dingin CDF Mindat nih cathanh an chuah theih a si.

Thantlang Peng Ah A Voi Thumnak Mipi Palik Training Cu Tlamtling Tein An Lim! Chin ramkulh, Thantlang peng mizapi hruainak in a voi thumnak Thantlang peng mipi palik training cu Thantlang peng hmun pakhat ah September ni 5 in 20 tiang tuah a si.

Cu trainning ah cun Karate, Palik riantuan ningcang, Upadi kong le checkhlatnak lei kong hna an i tel tiah theih a si. Cu tranining ah cun minung 56 an kai kho i, training an dih theihpinak minsen thutmi peknak zong an tuah piak hna tiah theih a si.

Cu training a dihmi palik hna nih cun Thantlang peng chungah palik ṭuanvo an lak lai tiah CDF- Thantlang nih cathanh an chuah.

Tedim Khua Chungah Mifir An Tam Chin Lengmang. Chin ramkulh, Tedim khua chungah atu kar hrawng hi chun zong ah mi thilri chuh, mi inn bauh le firnak a tam chin lengmang, tiah theih a si. “Nizaan September 20 chun ah inn ngeitu cu leng a chuak, cu karah mifir mi an inn an bauh i tangka kyats 104,000 an fir, a dang thilri bel an la lo. Chun ah biakinn ah Pathian thangṭhat lio caan hmanh ah cycle an fir. Ruak a hummi hna cycle zong an firpiak hna,” tiah Tedim khuami pakhat nih a chim.

Mi thilri a firtu hna hi rithaisii a hmangmi an si i, atu bantuk in kan ram boruak a chiat lioah eidin thilman a kai, rianṭuan awk a um lo caah mi inn bauh le firnak a tam khun, tiah a chim chap. Tedim khua chungah mifir an tam tuk caah sang kip in mino bu an ser i, khuami cu humhimnak an lakpiak hna, tiah theih a si.

Atu bantuk in kan ram a chiat lio caan ah eidin a harmi le thilman zong tam tuk a kaimi hna hi a hram thawk lawng a si rih, hi nak fak in kan tuar deuh te kho men,” tiah Tedim khuami pakhat nih a chim. Tedim khua chungah September 18 lioah sakremhnak zung chung zung rianṭuantu an umnak quarter cu mifir nih an bauh i, tangka kyats 150,000 an firpiak hna.

Mizoram Cozah Nih Ralhrial Myanmar Rammi Hna Cu Vawlei Hmun Cawknak Nawl A Pe Hna Lo. India ram, Mizoram ramkulh cozah nih a hlankan in theihternak le cohlannak kan tuah hlan ah Mizoram chungah vawlei hmun le chawleh chawhrawlnak tuah lo ding in ralhrial Myanmar rammi hna cu Mizoram cozah nih September 17 ah theihternak a tuah hna, tiah theih a si.

Ralhrial Myanmar rammi hna nih dawr tampi an tuah pinah ramri ah vawlei hnun cawk dingin timhtuahnak an ngei, tiin thawngpang a len caah atu bantuk in Mizoram cozah nih thawng a thanh hi a si. Mizoram ramkulh chungah ralhrial camp 150 leng a um i, ralhrial 30,000 leng an um. Ralhrial mi tam deuh cu Mizoram cozah le khuate lei nawl ngeitu hna nih caan karlak ralhrial camp ah an chiah hna.

Cheukhat cu anmah tein inn hlan in a ummi zong an um, tiah theih a si. Mizoram cozah nih vawlei hmun cawknak, chawleh chawhrawlnak, eidin thilri phorh zuarnak, motor/cycle khalh khawhnak le vote pek khawhnak hna hi an khammi cu a si.

India, Mizoram University ah Kawlca an cawn cang lai! Institute Of Chin Affairs le Mizoram University hna i bawmin, a ra laimi October thla thokin Mizoram University ah, Kawlca le Burmese Communication Skill an cawn cang lai tiah theih a si. Cu Burmese ca chim tu ding cu Dr. Elis Thangi a si lai i, Mizo holh zong Myanmar holh zong tha tein a thiam mi a si pinah, Kawlca(subject) in Dr degree hmutu zong a si.

Kawlca cu thla 10 chung cawn a si lai, cu thla 10 chung ahcun, sml 120 chung cawn a si lai i, sml 30 cu mah tein study tuah caan a si lai. Sianginn luh man cu, Rupee’s 1000 a si lai i, cu cawnnak ah a herhmi thilri cawknak ding caah thla 10 chung ah Rupee’s 1200 a dih lai tiah theih a si. Credit: The Chin Post