Myinmu Peng Lattaukdaw Khua Inn 500 Leng Khanghpiak An Tong, Tualchung Mi Pakhat Nunnak Liam
=============
Sagaing ramṭhen Myinmu peng Lattaukdaw(လက်ထုတ္တော) khua cu SAC ralkap nih May 6 ah luhhnawh in an khangh caah khuachung inn 500 leng a kangh pin ah khua mi pakhat mei kanghnak in a nunnak a liam tiah tualchung mi nih an chim. Inn 600 hrawng khuasaknak Lattaukdaw khua cu SAC ralkap nih an khangh caah inn 500 leng a ciam, inn 80 hrawng lawng a tang cu pin ah tualchung mi Ko Aung Soe(kum 40) cu mei nih a kangh chih caah a nunnak a liam tiah an chim.
Lattaukdaw khua he meng khat tluk aa hlatnak hmun ah tualchung hriamtlai phu le SAC ralkap kar kahdohnak a chuah hnu ah SAC ralkap cu khuachung ah lut in tualchung mi umnak inn an khangh tiah khua mi pakhat nih a chim.
SAC ralkap nih khuachung an khangh lio ah a zaam manh lo mi hna cu an tuk velh hna, phone le an thilri zong an chuh hna. Khuachung inn an khangh hnu chunhnu suimilam 2:00 hrawng ah SAC ralkap cu khuachung in an chuak tiah tualchung mi nih an chim.
Mizo Hlasakthiam Joseph Zaihmingthanga Mual A Liam!; Mizo hlasakthiam Joseph Zaihmingthanga cu nihin May 7, 2023 zanlei suimilam 1:20 hrawng ah khan a umnak inn Ramhlun North, Aizawl ah nikhua hngal lo in hmuh a si i, LRM Hospital panhpi a si nain a nunnak a liam. Joseph Zaihmingthanga nih hin a fapale pahnih a taantak hna, tiah theih a si.
SAC Ralkap Nih Humalin Peng Ah Bomb An Thlak Ruangah Tualchung Mi 4 An Nunnak Liam; Sagaing ramṭhen, Humalin peng chung um SNA sakhan pahnih cu PDF nih an va kah caah SAC ralkap Fighter nih bomb a thlak i, tualchung mi 4 an nunnak a liam, tiah PDF nih an langhter.
April 4 zing suimilam 6:00 hrawngah Humalin peng Nantaungoo khua um SNA sakhan cu PDF nih suimilam 1 chung an va kah caah an sakhan an lak khawh. Ngupin khua um SAC ralkap le SNA sakhan zong an va kah caah SAC nih Fighter hmang in bomb an thlak i, khuami 4 an nunnak a liam pinah inn 4 hrawng a kang. Ngupin khua cacawnnak sianginn zong a rawk, tiah theih a si.
Cu kahdohnak ah Humalin hriamtlai ṭangṭi phu a simi Khanti pengkomh Battalion 1, HPDF 124 ၊ HPDF le HPDF hna i bawm in kan kah hna, tiah Humalin PDF nih cathanh an chuah. Cu pinah May 5 zanlei suimilam 4:00 hrawngah Humalin le Hpawngpin PDF ṭangṭi phu an sakhan umnak Natset khua cunglei ah SAC ralkap, SNA Brigade 891 le Kate hriamtlai phu nih 60mm in voi 10 an kah ruangah khuami inn tampi zong a rawk, tiah theih a si.
Pekhon Peng Ah Kahdohnak Um Loin SAC Ralkap Nih Bomb An Thlak, Tualchung Mi 3 Hliamhma Fak Ngai An Tuar; Shan ramkulh, Pekhon peng khuate pakhat ah SAC ralkap nih kahdohnak zeihmanh um loin bomb an thlak ruangah tualchung mi 3 hliamhma fak ngai an pu, tiah tualchung mi hna sinin theih a si.
Nihin May 6 deilei suimilam 3:50 ah SAC ralkap nih kahdohnak um loin Pekhon peng khuate pakhat ah Fighter in bomb an thlak ruangah Roman Catholic Biakinn le tualchung mi inn cheukhat a rawk, tiah theih a si. Bomb an thlak ruangah kum 10 tluk ngakchia pakhat zong hliamhma fak ngai a pu i, a nunnak ca ah thinphang ngai a si. A dang pahnih zong an hliamhma a fak ngaingai, tiah theih a si. Credite; The Chin Post,