Ngaih A Chia Ee, Ralhrang Nih Inn khangh Piakmi Thlanrawn Khua Le Tialti Khua Ah Thlacamnak An Tuah!

Ralhrang nih inn khangh le thil firpiak a tong mi Thlanrawn khua caah thlacamnak he thilri bawmh!
=========
Falam Baptist Association (FBA) hruainak in Ralhrang nih inn khanghpiak le thil firpiak a tong mi Thlanrawn khuami ca thlacamnak le thilri bawmhnak cu November 6 ah an tuah, tiah kan theih.

“Hi thlacamnak cu Thlanrawn Baptist Biakinn ah an tuah i FBA OC nih an telpi hna. Cun, Khrihfabu, Zaatlang Bu hna le pumpak tibantuk nih thilri bawmhnak thawhkhawm mi zong pekchanhnak an ngei,” tiah FBA nih an facebook cahmai ah an langhter.

Falam Peng, Thlanrawn khua cu October 14 le 16 lio ah Ralhrang nih inn 13 an rak khangh. Hi inn 13 ah hin chungkhar milu 71 an um, tiah kan theih.

Ralhrang nih khangh mi Rialti khua thianhhlimhnak le thlacamnak tuah. Nihin November 6 ah Ralhrang nih khangh mi Falam Peng Rialti khua a kaang mi pawl thianhhlimhnak le thlacamnak cu Rialti Baptist Biakinn hmunthing ah an tuah, tiah kan theih.

Falam Baptist Association Zung riantuantu hna, CCIT Bible sainginn in tuanvo ngeitu hna le Rialti khuami hna tiin thiamhhlimhnak le thlacamnak an ngei, tiah Chinland Herald News nih a langhter.

October 14 lio ah Ralhrang nih Rialti khua cu inn 13 chung ah inn 11 an rak khangh i khuami hna cu Lailun IDPs camp ah an i dor lio a si, tiah kan theih. Credit: The Hakha Times

CAM nih Chin Person of the Year 2021 ah Rev. NC Thawng Tha Thang an thim. Hi kong ah tuanvo ngeitu hna nih a tanglei bantuk in an langhter. CHIN PERSON OF THE YEAR 2021; CAM nih 2021 chungah Chin miphun chung in zohchunh thlak pasaltha, Chin Person of The Year 2021 thimnak cu a tanglei tahfung zohchih in thimnak kan tuah hnu ah Rev. Thawng Tha Thang cu Chin Association for Maryland nih Chin New year ah Chin Person of The Year 2021 ah kan thim.

Thimnak Tahfung; 1. Miphun le ram a daw mi, Chin miphun, a si lai. 2. Kan miphun le midang caah pumpek in rian a tuan khomi a si lai. 3. Kan miphun hmai a hngal tertu a si lai. 4. A riantuannak hlawh a tling (successful) mi le zohchunhtlak a si lai. 5. Kan miphun nih 2021 chungah a riantuannak aa hlawkpi mi a si lai.

Mah tahfung pa 5 ning tein a tlinh bik tiah kan ruahmi, Rev. Thawng Ṭha Thang cu 2021 kum chungah pulrai le ralhrang karlak ah luhlinh le nunnak thap in kan miphun chanh chuahnak caah din loin rian a tuanmi a si. A fimthiamnak, a chawva lawng si loin a caan le a nunnak dihlak thap in kan miphun caah luhlinh in a cawlcang mi a si caah Chin Association of Maryland nih Chin Person of The Year 2021 caah kan thimnak a si.

2021 Chung a rianṭuannak le a konglam; 𝐂𝐡𝐢𝐧 𝐑𝐞𝐬𝐜𝐮𝐞 𝐓𝐞𝐚𝗺, Chin Rescue Team (CRT) cu March 13, 2011 ah Rangoon hrambunh Chin zatlang le biaknak lei upa tampi telh in Rev. Thawng Ṭha Thang Hruainak he rak dirhmi a si. Rev. Thawng Ṭha Thang cu General Secretary in CRT ah aa tel. CRT nih aa tinh bikmi le a ṭuan bikmi cu Kawlram buainak nih a chuahpimi harsatnak a tuarmi Chinmi hna le thongtlami pawl bawmh a si.

CRT nih Rangoon, Monywa le Naypyitaw in ram harsatnak ruangah chungkhar rianṭuan awk a ngei ti lomi kan Chinmi minung 300 lengkai cu thlachiar in a bawmh hna. Chinmi chungin, Rangoon ah a tang i khua tlun a duh nain tlun-kalnak aa harhmi chungkhar minung 76 cu tlun-kalnak mawṭaw hlanpiaknak in an herh mi pohpoh an rak bawmh hna.
Ramkhel cawlcanghnak ruangah tlaihkhih a tongmi thongtla hna cu Lawyer an hlanpiak hna. CRT nih Lawyer hlan man a pekpiak hna pin ah, a herh ning in chimrelpiaknak le pehtlaihpiak a herhmi dang pawl caah a tawlrelpiak hna. Cu bantukin Lawyer he an cawlcanghnak ruang ah thongtla minung 14 chuah an si cang.

𝐂𝐡𝐢𝐧𝐥𝐚𝐧𝐝 𝐅𝗼𝐮𝐧𝐝𝐚𝐭𝐢𝗼𝐧; Chinland Foundation cu March 13, 2020 ah Rev. Thawng Ṭha Thang nih a rak dirhmi a si. Humanitarian lei, Funeral lei le Chinmi nih harnak phunphun kan ton tikah dirkamhtu Foundation ṭha si kho seh timi hmuitinh he a rak dirhmi a si. Rev. Thawng Ṭha Thang nih Chairman sinak in a hruai. Nikum 2020 ah Paletwa le Rakhine ram i a ummi ralzam hna bawmhnak program a rak ṭuanchuah. “Chinland for Paletwa” timi program in Rakhine ram i a ummi ralzam chungkhar 1000 leng sinah facang le eidin dangdang bawmhnak an rak pek.

Rallak Rian Tunnak; February nikhat ralkap uknak lak mi duh lonak Lamzawhnak in hliamh a tongmi minung 15 cu Siizung kai man, Operation tuahnak le a herhmi thlopbulnak pin ah kutput dangdang he an bawmh hna. Lamzawh lio i, kahnak ruangah nunnak a petu hna tantakmi chungkhar bulhnak zong chungkhar 18 sinah an pek hna. Kan Chin mino tlaih a rak tong mi hna cu, zaan lai curfew pahchih in ah police station ah a rak lak hna.

Covid 19 Rai; February 1, 2021 ah Kawl ralkap nih uknak a lak ruangah July thla thawkka hrawng in Covid-19 Thirdwave (Delta variant) cu tawlreltu cozah ngei loin ram pumpi nih kan tuar. Rangoon um Chinmi zong fak taktak in a kan den. Hi lioah Rev. Thawng Ṭha Thang hruainak in Chinland Foundation, le Chinland Foundation nih caan karlak caah a sermi Covid-19 Response Volunteer Team hmang in thih le nunnak karlak ah Rangoon Chin mipi chanhchuahnak rian cu an ṭuan. Oxygen a har tuk lioah Chinland Foundation nih aa chiah-retmi Oxygen dur tampi cu Covid-19 mizaw hna caah a herh ning in bawmhchanhnak a tuah.

Chinland Foundation nih aa chiah-retmi Oxygen dur nih a nguh lo caah midang pumpak nih an i chiah-retmi oxygen dur hlanhnak (community sharing system) zong a tawlrel; hlanh a duhmi hna le an hlanh duhmi mizaw karlak ah Chinland Foundation Volunteer Team hna nih an thiarpiak hna. Covid-19 rai dohnak caah a herhmi thilri dangdang (Mask, Faceshield, Test Kit, Sanitizer tbk) bawmhchanhnak a tuah.

Covid-19 rai nih nunnak a lakmi hna ruak fimtawlnak le thlan khur tiang kal in ruakvuinak cu Rev. Thawng Ṭha Thang nih amah pumpak le, a volunteer team hna he an rak tawlrel. Covid-19 Thirdwave chung ahhin Chinland Foundation nih Chinland for Tedim, Chinland for Cikha, Chinland for Kalay timi program dangdang zong in rai dohnak thilri pawl a bawmh hna.

Hmailei ah Oxygen dur i zat lo le, Oxygen dur lawng lo tein a um peng khawh nakding caah Oxygen rawnnak sehzung (Oxygen Plant) cu Chinland Foundation nih ramleng ah sing 1000 MMK dih in a cah. Hi ca kan ṭial tiang ah Oxygen Plant seh cu Rangoon a phan cang i, an bunh cuahmah lio a si.

Covid-19 rai khamnak sii (vaccines) chunhnak caah Chinland Foundation nih a harsa deuhmi minung 100 bawmhnak a pek hna. Kawlram chung Pastor le Evangelist pawl nih Covid-19 rai doh rian an ṭuannak caah tiin Chinland Foundation nih Myanmar Evangelical Christian Alliance (MECA) sin ah Ks. 8,000,000 a bawmh hna.

February 1, 2021 Kawlram buainak aa thawk hnu in ral ruang ah harnak a tuarmi ralzam hna le ramchung sipuazi rawhral ruang ah harsatnak a tongmi innchungkhar 17,000 hna sinah Chinland Foundation nih eidin le sii-ai lei bawmhchanhnak a pek. Chinland Foundation nih Chinmi chung in cawm kengtu ngei lo, ngakchia 100 zong la in Education le Foundation ṭhaṭha bawmhchanh aa tim.

𝐂𝐡𝐢𝐧 𝐂𝗼𝐯𝐢𝐝 𝐑𝐞𝐬𝐜𝐮𝐞 𝐓𝐞𝐚𝗺; Chin Covid-19 Rescue Team (CCRT) cu August 5, 2021 ah dirh a si. Covid-19 Thirdwave nih Rangoon Chinmi fak piin a den cuahmah hna lioah Chinmi dihlak huap in kau deuh piin rai dohnak rian ṭuan a si khawh nakhnga Rev. Thawng Ṭha Thang hruainak in dirhmi a si. CCRT ahcun Rangoon um Chin community an tling; Hakha-Thangtlang, Falam, Tedim, Mindat, Kanpalet, Paletwa lei in miphun tling in an i tel. Rev. Thawng Ṭha Thang nih chairman sinak in a hruai lio a si.

CCRT nih Chinmi covid-19 raldohnak caah tiin Taungzalet Covid-19 Care Center cu Rangoon khualipi, Rev. Dr. Aung Myint Thang campus ah an hun. Cozah ṭhalo kut tangah kan um lio a si nain Chinmi caah tiin Kawl ralkap nih hnahnawhnak pek lai ding zong hmaichon ngam in dirhmi a si. Care Center ah cun Mizaw 70 leng nih damnak hmu in care center an chuahtak cang.

Taungzalet Covid-19 Care Center ah aa thlopbulmi mizaw hna cu CCRT Volunteer team hna nih don le thlahnak an tawlrel. Mizaw zohtu caah Doctor le nurse hna le Chin volunteer mino hna chiahpiak an si. Mizaw an i thlop chung eidin le an herhmi dangdang zong in zohkhenh le tawlrelpiak dih an si. Chinmi nih Covid-19 Vaccines mandeng tein an i chunh khawh nakhnga CCRT nih Covishield cu India ram ah minung 1000 caah an cah. An i chunh cuahmah lio a si. Minung pakhat caah voi hnih chunh Ks. 70,000 in an chunh hna. Sii man pek awk ah harsatnak a ngeimi hna caah vaccines 600 (minung 300 ca) zong chiahpiak a si.

Rian Dang A Tlaih Chihmi; Rev. Thawng Ṭha Thang cu Believers Church Myanmar ah General Secretary le Chinland Football Club ah President a ṭuan liomi a si. MFF 2020 Congress thimnak ah a lut i teinak a hmuh hnu in Myanmar Football Federation (MFF) ah Executive Council member rian a tlai. MFF EC member a sinak in MFF nih rian an pekmi hna cu Infrastructure Development Committee chungtel, Youth Development Committeee chungtel le Referee Committee chungtel rian hna an si. 2018 kum, Russia i rak tuahmi FIFA worldcup zongah kawlram MFF ai awh in thlahmi ah a rak i tel.

Hi rian hna pin ah Chin miphun huap in siseh, Kawlram huap zong in rian lianngan tampi a tlaih chih hna.
Atulio ah rian dang a tlaih cuahmahmi hna cu kum 2010 thawk in Gospel for Asia (GFA) ah Vice President le Believer
Church Theological Seminary ah Vice President hna an si. kum 2014 thawk in Myanmar Christian Youth Alliance ah Patron, kum 2016 thawk in Myanmar Theological Student Council ah President, kum 2017 ah Myanmar Evangelical Christian Alliance Literature and Publication commission Director.

2018 ah Myanmar Evangelical Christian Alliance’ Mission Director a ṭuan hnuah 2019 kum thawk in Myanmar Evangelical Christian Alliance (MECA) ah Associate General Secretary ah thim ṭhan a si. 2019 kum thawk in Chin Public Company ah Board of Director le Chin Ethnic Entrepreneur Association (CEEA) ah ruahnak petu (advisor) zong a ṭuan chih.
Cu hlan ah a rak tlaih balmi rian hna cu Kum 2005 in 2010 tiang Believers Church Myanmar National Council ah Mission Assistant Director le kum 2017 in 2019 tiang Believers Church Theological Seminary ah principal hna an si.

Hi bantuk rian lianngan pin ah ngakchia harsami zohkhenhnak le fimcawnnak lei zongah rian tampi a ṭuanmi a si. Kum 2009 ah Bridge of Hope (Bridge Of Hope) timi ngakchia zohkhenhnak bu a rak thawkpi hna i, ralkap uknak chan lio i sianginn kainak caah chawva lei harsatnak a ngeimi ngakchia hna, Chin ramkulh in 800 le Chinram leng (Kawlram chung) in ngakchia 400 (an dihlak 1200) hna cu kum 10 chung bawmhnak an pek hna. Atu ramkhel lei dirhmun a ṭhat hnu in fimcawnnak lei ah kan miphun hawi hna an ti khawh tawk bawmhchanh rih ding in a pa Bishop Dr. CK No Chhum he Myanmar Flower International School (Yangon), le Chinland Flower Private School (Thantlang) ah an dirh cuahmah lio a si.

Zangleknak Lei; Thawng Ṭha Thang hi biaknak lei le zatlang bu hna caah Pathian mihman pakhat a si lawng si loin zaanglek celhnak lei zong ah mithiam pakhat a si. Kawlram pumpi huap pumpululh chuih zuamnak ah Chin ramkulh pumpululh phu hna cu kum 2006 ah captian in a rak chuihpi bal hna. Yangon khualipi i North Dagon township team zong Yangon Region Chief Minister Cup 2010-11 ah champion a rak lakpi bal hna.

Hihi North Dagon nih Yangon pumpululh chuih zuamnak ah champion an lak hmasa bik tan a si. Cu cup ahcun a thiam bik (best player) le Kawl sut tam bik laksawng zong a rak hmuh. Amah bantukin zaangleknak a duhmi Chinmi mino tampi, club i chuih kho ding in lam a rak sialpiak hna i, Chin mino 3 zong Yangon Football Academy ah lut kho ding in a rak tuahpiak khawh hna.

Ṭhan-lianhnak le cacawnnak (childhood and education). Thawng Ṭha Thang cu Hakha i an chungkhar in khua an sak lio kum 1983 October 28 ah Falam siizung ah a rak chuak. A chuah kum khat hnu (1984) in Hakha ah an kir. 1988 kum ah Hakha ah cun tang cheu a rak kai nain Kawlram ramkhel buainak (1988 Uprising) ruang ah sianginn an rak khar i, a rak i din. Kum 1989 ah Kalaymyo a pule sinah i ṭhial in tang khat le tang hnih a rak kai.

A pa Bishop Dr. CK No Chhum cu Pathian rianṭuanmi a si bantukin, kau deuh in Pathian rian a ṭuan khawh nakhnga kum 1991 ṭhal lioah an chung tein Rangoon ah a rak ṭhialpi hna. Thawng Ṭha Thang cu 2001-2002 cacawn kum ah Economics subject ah distinction (kungthu) he tang (10) a rak awng. Tang (10) a awn le cangka in Pathian auhnak a rak tong i, kum 2002 in 2005 tiang India ram Asia Biblical Seminary (ABS) ah B.Th a rak kai.

Hi sianginn a kai lio ahhin siangngakchia 500 lakah Best Performance Award (laksawng) a rak ngah. Kawlram a tlun hnuah Philosophy in BA le Gospel for Asia Theological Seminary in M.Div, Poland ram University of Information Technological Management timi sianginn nih a pekmi Master of Business Administration (MBA) cu a lak.

Chungkhar kong (family and personal life); Thawng Ṭha Thang i a nulepa cu Believers Church Myanmar le Believers Church Theological Seminary a dirhtu Bishop Dr. CK No Chhum (Sopum) le tleicia Pi Sui Caan (Tahtlang) hna an si.
Unau chuahpi pahnih a ngei hna i, amah hi upa bik a si. A naule hna cu Gordon Thang (atulio Chinland FC General Manager) le Jully Thang (Myanmar Flower International School director) hna an si. Thawng Ṭha Thang cu a nupi Lalremsiami he fapa pakhat le fanu pahnih an ngeih hna i, an fapa cu Jeremy Thawng Za Thang, an fanu hna cu Jasmine Lalruatdik le Jessica Iang Hlei Par hna an si.