Mon Ram Ah SAC Ralhrang Nih A Ruang Umlo In Bomb A Thlak Caah Mipi Hliamtuar Le In Kaang A Tam
=========
Mon ramkulh, Ye peng Wapate (ဝါပသဲ) khua cu kahdohnak umlo nain SAC ralhrang nih raltuknak vanlawng in bomb a thlak caah mipi hliamhma tuarmi le inn kaangmi zong a tam, tiah tualchung mipi nih an langhter.
May 7, zan suimilam 11 tluk ah kahdohnak umlo a ruang umlo in SAC ralhrang nih Wapate (ဝါပသဲ) khua bomb a thlak caah mipi hliamhma a tuarmi an tam pin ah mipi inn zong an kaang hna i, khuami dihlak khua chuahtak in ral an hrial hna, tiah Khit Thit nih a langhter. “Kahdohnak umlo bu in SAC ralhrang nih jet vanlawng in a kah caah mipi hliamtuarmi zong an um, a zah tu cu kan theifiang rih lo, inn tamngai zong an kaang i an ciam dih hna caah khuami dihlak nih khua chuahtak in ral kan hrial” tiah mipi pakhat nih a chim.
Khaikam Khuapi Ah SAC Ralhrang Nih Ralphaw Ah An Tlaihmi Motor Hna Cu Nithum Hnu Ah An Thlah Ṭhan Hna; Chin ramkulh, Tedim peng, Khaikham khuapi Gate ah SAC ralhrang nih May 6 ah ralphaw hman ding ah an tlaihmi motor hna cu May 8 zing ah an thlah ṭhan hna, tiah theih a si. SAC ralhrang nih Kalay khuapi in Chin ramkulh chung a rak kai dingmi motor hna cu kham in Khaikam khuapi um LCD Petrol zuarnak dawr ah an tlaih hna i, ralphaw hman ding ah an erh hna, tiah theih a si.
May 8 zing ah SAC ralhrang nih an tlaihmi motor hna cu an thlah ṭhan hna i, kalay-Chin ramkulh motor lampi zong onh a si cang, tiah Zalen nih a langhter. SAC ralhrang nih atu bantukin motor an khamnak le an tlaih hnanak a ruang cu mipi hriamtlai nih an sakhan luhhnawh in kahdoh lai an ṭhihphan caah a si, tiah kan theih.
Shan-Karenni Ramri Gate Ah SAC Ralhrang Pakhat Nih An Hruaitu Commender Pakhat A Kahthah; Shan-Karenni ramri Loi-linlay peng, Hti-se-kar (ထီးစဲခါး) SAC ralhrang gate hngak mi ralhrang pakhat nih an hruaitu Commander pakhat cu meithal in a kahthah tiah khua mi hna nih an chim.
“May 4 ah a thah hi a si, zuu an din lio ah an hruaitu Cammander nih a kuttang pa pakhat cu a biang ah a bengh caah a thinhang lung in Commander cu a hnulei in a kah hi a si, a kaptu pa zong a mah tein aa thah ve. “tiah khua mi nih an chim.
“Hi gate hngaktu SAC ralhrang hna nih khualtlawng motor pakhat ah 5000 in 10000 tiang an hal lengmang hna. Tangka luh a thatnak gate pakhat zong a si tiin chim khawh a si.” tiah an chim chap.
Hi kong he pehtlai in KNIC tuanvo ngeitu hna nih thil sining hlathlai dingin an i zuam lio zong a si. Ralhrang 2 a thi mi ruak cu Loikaw siizung ah an kal pi hna. Hi gate cu SAC ralhrang kuttang PNO nih tuah in khualtlawng sin ah tangka an hal lengmang hna nak hmun pakhat a si.
Gangaw Khua Ah SAC Ralhrang Nih Khua Upa Pakhat An Kahthah; Magway ramthen Gangaw peng, Min-yua (မင်းရွာ) khua lei a kal mi SAC ralhrang pawl cu May 7 ah Bomb puah hnawh an ton hnu ah lam aa chok mi khua upa pakhat cu an kahthah pin ah a phone zong an chuh tiah kan theih. “Kum 60 tluk a si cang mi upa cu thah a tong, a thimi pa a fa le zong SAC ralhrang chung ah an um hna, ralhrang nih zeitin dah an thah timi tu cu kan hngal lo” tiah Gangaw khua mi pakhat nih a chim.
Yaw-Alin-Tan nih a langhter ning ah “Bomb puah hnawh nak ah SAC ralhrang pawl a thi le hliamtuar an tam caah ralzam a si mi pakhat an thah. Ralhrang pawl cu May 8 ah Min-yua khua in an chuak i Gangaw lei ah an kir i Paw-lay khua an phan” tiah a langh ter. Aluan cia May 3 zanlei sangah Mit-thar tiva ah takkholh dingin a kal mi SAC ralhrang kuttang riantuan Palik 2 thah an ton hnu, May ni 4 ah Min-yua khua ah umhmun khuar ding in SAC ralhrang an rat hi a si. “Hi hna pawl cu Min-yua an phak hlan lam pi ah Bomb kan puah hnawh hna i ralhrang pakhat a thi” tiah tualchung PDF pakhat nih a chim. Credite; Lungmili Post