Moe Peng Ah SAC Ralhrang Hriamngan Kahnak In Ngakchia 1 A Thi; Khuami 10,000 Leng Ral An Zam
==========
KNU humhaknak hmunram a si mi Moe peng chungah SAC ralhrang nih hriamngam dongcat lo in an kah caah kum tlinglo ngakchia 1 a thi i khua mi 2 hliam an tuar tiah KNU nih May 20 ah thanh ca an chuah.
Mah pin ah hriamngan kahnak in inn pakhat le phunki sianginn pakhat a rawk, May 18 zing lei suimilam 8 ah Moe peng Sa-way, Kyundaw khua le Nyaung Pin Thar khua chung hna ah hriamngan 30 tluk dongcat lo in an kah caah kum 14 ngakchia pakhat a thi i kum 47 nu le kum 18 pa pakhat hliam an tuar. SAC ralhrang hna cu chuak lo in khuachung ah umhmun an khuar caah khua te khua 9 in minung 13,991 hna cu a himnak hmun ah an zam hna tiah an langhter chih.
Thlichia Ruang Ah Harnak A Tongmi Matupi Peng Mipi Hna Cu SAC Ralhrang Nih Bawmhnak An Pek Hna; Chin ramkulh chung ah Mokha thlichia ruang ah harnak a tongmi Patupi khuapi le Lailenpi khuapi ah inn a rawkmi mipi hna cu SAC ralhrang nih Matupi khuapi um Hall ah an ton hna i bawmhnak an pek hna, tiah theih a si.
“Chin ramkulh, Matupi khuapi le Lailenpi khuapi hna cu Mokha thlichia ruang ah harnak a tongmi hna inn chungkhar 170 caah ei-din le thilri pawl an pek hna” tiah tualchungmi pakhat nih The Matupi Times ah a chim.
Hi tonpumhnak cu SAC lei in Chin ramkulh lutlaitu vanci Dr. Vung Suan Thang le runvennak lei ah ṭuanvo ngeitu Second General Yat Za Kyaw hna telh in SAC ralhrang bawizik hna nih tuahpi in bawmhnak an pek hna hi a si, tiah kan theih.
Thinlung Lei Damlonak A Ngeimi Nu Ngakchia Voi Tam Ngai A Tlaihhremtu Pa Cu TNLA Nih Dantatnak A Tuah Lai; Shan ramkulh chaklei Namhsan peng, Longtauk khua ah thinlung damlonak a ngeimi kun 16 Nu ngakchia voi tamngai a tlaihhremtu pa Mine Hla Win (kum 23) cu May 17 ah TNLA nih an tlaih i upadi ning in dantatnak kan tuah lai, tiah Ta’ang National Liberation Army (TNLA) nih cathanh a chuah.
Mine Hla Win nih mah ngakchia nu cu 2022 kum December thla thok in thlakhat ah voi khat an khua sianginn ah auh in a tlaihhrem i ngakchia nu cu fa a pawi caah an theih hi a si, tiah theih a si.
“Tlaihrem a tongmi nu ngakchia hi a thlatlin ruang ah mi nih an chawnh zong ah mi a let lomi a si i a umning aa dan caah a nu le pa nih checknak an tuah i fa a pawi cu an ngalh khawh. A nu le pa nih an lemsawi hnu lawng ah anmah khua a simi Mine Hla Win nih a tlaihhrem cu a chimphuan” tiah TNLA nih cathanh an chuahmi ah an langhter.
Nu ngakchia nih a pawimi a fa cu thla 3 a si cang, tiah theih a si.
TNLA nih a luancia kum 2021, April, 1 ahkhan kumtlinglo ngakchia a tlaihhremtu pakhat cu thihdan an rakpek bel cang i mizapi hmai ah meithal in an rak kahthah bel cang, tiah theih a si. Credite; Lungmili Post