Natchaung ah Kum 13 Ngakchiapa Myanmar Ralhrang Ralkap nih an Kah

Natchaung ah Kum 13 Ngakchiapa Myanmar Ralhrang Ralkap nih an Kah
——-
April 2 ah Gangaw-Kalay karlak Natchaung khua ah Myanmar ralhrang ralkap nih kum 13 lawng a si rihmi ngakchiapa Mg Ngyi Naing Phyo cu a paw ah meithal in an kah caah a nunnak a liam, tiah thawng kan theih. Natchaung khua mino pakhat nih, “Ralkap nih a ruak a kan chuh sual lai timi kan phan caah an kah ni ah a ruak kan vui colh,” tiah a chim.

April 2, Natchaung khua ah kum 22 a simi tlangval Aung Naing Htwe zong ralkap meithal kahnak in a nunnak a liam ve.
Natchaung cu Laimi tampi khuasaknak Chaungkhuah le Hakhalay khua he aa pehmi khua a si.

Kachin Ram Palik Sakhaan ah “Kan Kap Hlah U” timi Langhternak Thantar Raang an Tun. Kachin ramkulh, Phakanh peng, Sankha khua pawng i Yadana Shwe Aik company ah hmun a khuarmi palik pawl nih rak kan kap hlah u timi langhternak ah thantar raang cu nihin April 3 ah an sakhaan ah an tun. March 28 thawk in Phakanh peng chung palik sakhaan pawl KIA nih nitin in an luh hnawh hna i palik 30 hrawng an thah cang hna, tiah Kachin tualchung media pawl nih an langhter.

The Hakha Post Zung Kutka an Bauh i an Luh Hnawh, Rianttuantu an Him. Nihin zinglei ah Myanmar ralhrang ralkap le palik 30 hrawng nih Hakha, Pyidawtha sang ah a ummi The Hakha Post zung kutka an bauh i zung chung ah kawlhawlnak an tuah, tiah kan theih.

Zung kutka bauh in an luh hnawhnak aruang fiang ngaingai in theih a si lo nain aluancia ni tlawmpal ah The Hakha Post rianttuantu pakhat kong he pehtlai in minung pakhat nih online in sualkawlnak ca a ttialmi ruang ah a si ko lai, tiah micheukhat nih an chim.

Myanmar ralhrang ralkap nih uknak an chuh hnu ah Hakha hrambunh Media pawl zung ah kai ti loin mahle umnak cio tu in rian an ttuan hna. Tu ni The Hakha Post zung an luh hnawh lio zong ah hin zung a kaimi an um lo i rianttuantu an him, tiah kan theih. Credit; The Chin Journal, April 3, Hakha