Nangkah Pa Nih Tei Hna Seh Tei Hna Seh!
=======
Zeitik kum set a si cu ka fiang ti loh. Kei cu ka hngakchia ko rih. Khua upa le lungfim deuh cu chuk le cho an hlat. An hoiher le an khuahrah, an mit-au zoh tikah poipang a um lai hi teh ti a fiang. Ruakhua lei lam khi an hei cuanh tawn. Sarmahrang in an um kal. Ka nu aw cawi zong cu zing cu a hrang ngai.
Voi dang i nem tein a kan kawh tawnmi kha tu zing cu ” Tluang Hup, na naule he thil itim uh, ngalvafiang ah kan zam lai” a hun ti. Kan unaurual in kan i tim. Ka pa cu Mizoram ah kuli a tuan lio ngelcel a si. Kanmah nufarual lawng sa le ral lak ah hnokcur in thil kan itim. Micheu nih kan biakinn chungah an thilri an chiah. Kan biakinn kha tlakrawh in sakmi a si caah a him deuh lai an ti caah a si lai. Khua upa cheukhat nih khua cu an hngah.
Ngalvafiang ahcun riahbuuk tom in khuapi tein zan cu kan riak. Kan khua cu loriah kin bang king dimdiam tein a um lai. Zeicatiah Nangkah tapung nih Thangzang an pal lai. Thangzang in Vanzang ah an lan lai ti asi. Kan hei hmuhmi Ruakhua ah certual khat in an i dil ko ti asi. Cu hmun ahcun meiphu an cheh i an it ti asi. Hlamphei i kawl ralkap he ai kapmi kha an si cumu.
Nagaland timi cu ka upat hnu lawng ah ka theihmi asi. Ka hngakchiat lio ah Naga ti cu ka theih bal. Cucu kawlral kap lakah Nangkah miphun cu an itel tawn. An khabe ah bawiphen rin bantukin catlang pali panga an i rin tawn. Cu kan hmuh poh ahcun a nih cu Nangkah mi phun a si ti kan theih.
Kan pale pawl nih a nih hi cu Nangkah heih a si hi, kanmah miphun an ti tawn ciau. Sakah thiam, hmuithiam an si ti asi. Kan hung upat hnu tu ahcun kawl ralkap lakah Nangkah miphun ralkap hmuh awk an um ve ti loh. Kan upat hnu ahcun geography te hna ah Nangkah tlangthluan te hna, an miphun kong hna kan hun theih.
Nangkah tapung cu Hlamphei an ikahnak ah mi tampi an thi, an lo tlau tiah kan rak theih. Kawl ralkap he an ral ikahnak a ruang zong kan nih hngakchia nihcun kan theihmi a um loh. Khualak i ai chokvai upa pawl nih cun Pakistan ah thening an kai le an kir lei ah lam an tlau tiah an chim. Anmah Nangkah ram a phan khomi cu mitlawmte lawng an si an ti.
Ulenau hna in ram le miphun caah a rak i thawhmi an um rua. Nangkah ram phan kho lo in Lairam ah ai thup ai dormi Nangkah tapung kha micheu khua nihcun kawl ralkap sinah van ripawt in kawl ralkap nih an nunnak lak in an tlaihmi hna zong an um tiah biachokvai a um len. A dik le dik lo tu cu theih asi loh.
Chin, Mizo le Nangkah cu unau kan si kan ti ko nain kawl ralkap he an rak ikah lio tu ahcun kan rak huppheng kho hna rua loh. Kan ruahphak khawh lomi thil tampi a um caah a si ko lai. Hei ruah siarmar ahcun kawl ralkap nih an rak kah hna ning tuak ah lung a fak ko. Anmah Nangkah tapung vial nihcun Chin mi cu unau kan si tiah an rak kan hunhphenhnak le an kan humzualnak cu CNA le No Than Kap kong ah siseh, Victor Biak Lian tialmi ” Ka Philh Kho Lo ” cauk ah a fiang ngai a lang ko cumu.
Ram a hung cangkaang deuh le Laipaih zong van tunmer asi. Nangkah ram ah Lai pathawng pawl zong voihnih bak an kal. A voihnih ning tein an kan tei. Tutan tu cu Lai mi nih rak kan tlawng ve hna seh, ulenau pei kan si cu. Kan ipehtlaihning zong tha chinchin seh tiah an khua USA ah an cah hna. Cucu thil dawh tuk asi. An ipaih dingmi le a nih nih a nih a tei tinak in kan ipehtlaihning a thatmi tu kha biapi deuh cu asi. Tutan zong Nangkah pa nih Lai pa pawl cu huai len ko hna seh, huai len ko hna seh! Credit: Chan Khar