Myint Myiat Cu BGF Bawile He Nuam Ngaiin Caan A Hmang!
Myint Myiat Cu BGF Bawile He Nuam Ngaiin Caan A Hmang!
=========
SAC Ralhrang Le BGF Nih Thahnawnnak An Tuah Lioah Lemcang Myint Myiat Cu BGF Bawile He Nuam Ngaiin Caan A Hmang!
SAC ralhrang le BGF nih Kayin ramkulh chungah kahdohnak an tuah ruangah mipi tamtuk ralzaam dirhmun in an um lioah lemcang Myint Myiat cu BGF bawile he nuam ngaiin zaan riah an ei lio hmanthlak cu hmuh a si.
BGF hruaitu Saw Chit Naing i zumhtlakmi minung tiah theihmi Bohmu Naing Maung Zaw nih Myint Myiat he hman aa thlakmi hmanthlak cu March 11 ah social media ah a post. BGF cu SAC ralhrang kuttang ah a ummi phu a si. Kayin ramkulh ah KNU kuttang ummi KNLA le PDF hna cu SAC ralhrang ralkap he kahdohnak a tuahtu phu a si.
Bohmu Naing Maung Zaw cu Myit Than Lwin min in fb a hmang i, Myint Myiat, K-unau hna he an i thlakmi hmanthlak cu a post i “dinner” na kan dangh caah kan i lawm tuk tiah a tial. Rawl an einak ahcun eidin thawthaw le SAC ralhrang serchuahmi Myammar Beer zong aa tel.
Cupinah cuka dinner ahcun motor le cycle hna zuartu “Easy Rider Motorbike company le Naga Lady Auto Mobile ngeitu Tin Kyaw Nanda zong a tel ve. Easy Rider cu Kawlram-Thailand ramri in SAC ralhrang le BGF hna nawhthuh phaisa pek hratin motorcycle zuartu company pakhat a si tiah ramri ah a ummi pakhat nih a chim.
Myint Myiat cu nawlngeihnak laaknak kong he pehtlai in Nay Toe, Sain Sain Khan Hlaing bantukin daiziar in a um ruangah soisel a tong ngaingai. Cupinah Myint Myiat cu SAC ralhrang minung hlasakthiam Yung Lyi hawikom a si pinah Min Aung Hlaing fanu Khin Tyi Rih Thet Mon i company 7th Sense he movie chuah dingin hnatlaknak a tuahtu zong a si.
Kayin ramkulh Lyi Kih Kaw ah umnak sakhan tuahtu ralhrang hna cu ni (3) chungah Kayin ramkulh chuahtak dingin KNU Brigate (6) nih March -7 ah SAC ralhrang sinah cakuat an pek hnuin ralhrang nih vanlawng in a kahdoh caah an karlak boruak a linsa ngaingai.
Rampi nawlngeihnak a latu Min Aung Hlaing le a hawile tuahsernak cu duh loin mipi leikap ah a taangmi KNU cu ralhrang le BGF fonhmi nih an kahdoh caah Kayin ramkulh ah kum 2021 Fenuary 1 hnuin a zaammi zat hi 68900 an phan cang tiah UNHCR zung nih cathanh an chuah.
SAC Ralhrang Dirhkamtu Han Nyein Oo Hmanmi Telegram Cu An Thahpiak Cang! Democracy dirhkamtu le hramhram uknak duhlonak langhtertu paohpaoh an tlaih khawh nakhnga biatak tein thazaang chuahtu Han Nyein Oo i hmanmi Telegran, zultu sing (1) lengkai account cu March 11 zaan ah an thahpiak cang tiah theih a si.
Telegram nih cathanh a chuahmi ahcun Han Nyein Oo Channel cu Telegram zulhphung he aa ralkah ruangah kan thahpiak tiah an langhter. Han Nyein Oo cu March 11 chun ah Khik Thit Chief Editor Tha Lwin Yaung Htet he pehtlai in hrokhrol in thawngpang a tial manh i, cu a postmi cu a hnu bik ah a postmi zong a si fawn. Atu ahcun Han Nyein Oo min in a hmanmi Telegram, zultu 36000 lengkai ummi account pakhat a um rih tiah theih a si.
Lemcang Minthang U Phu Phyu Nunnak Liam! Nihchuak capo saih in lemcangtu Myiah Puk Namah (အငြိမ့်) in senoir capo saih thiammi U Phu Phyu nunnak a liam tiah Yangon hrambunh lemcang thawnglatu pakhat nih a chim. March 11 zanlei sml 6:45 ah U Phu Phyu cu Myauh-U-Kalapah OSC sizungpi ah aa thlop cuahmah lioah atu bantukin a nunnak a liam hi a si. U Phu Phyu cu nichuah capo saih thiamnak in movie le video tampi ah lemcangtu pakhat a si i, kum 63 a ti ah atu bantukin a nunnak a liam hi a si. Credit: The Federal Times