“Motor pakhat cu dengteo te in a khen ca ah aa cit mi ralhraang 15 an thi!

Tigyaing peng kahdohnak ah ralhraang 15 an thi, Tigyaing PDF in pakhat nih nunnak a pek ve
=========
Sagaing ramthen, Tigyaing peng chung kahdohnak ah ralhraang 15 an thi i Tigyaing PDF in pakhat nih a nunnak pek ve tiah Tigyaing Revolution nih an chim.

Tigyaing peng, Tonlon khua i umhmun a khuar mi ralhraang 68 cu nihin zing ah Cheikthin khua lei ah motor pahnih in an kal lio ah Tigyaing PDF nih bomb in an puah hna hi a si.

Tigyaing Revolution nih, “Motor pakhat cu dengteo te in a khen ca ah aa cit mi ralhraang 15 an thi, hliamtuar zong an um. Ahnu in a ra mi motor pakhat cung in hriamngan in an kan kah ca ah Tigyaing PDF in pakhat a thi ve,” tiah an chim.

Khayan Peng Palek Sakhaan le Fimcawnnak Zung ah bomb a puak i ralhraang pathum an thi. Yangon Ramthen, Khayan Peng Palek Sakhaan le Fimcawnnak Zung ah umhmun a khuar mi ralhraang pawl cu Khayan PDF nih December 5 zaan suimilaam 8:20 hrawng ah a lang in control mi bomb pathum in an puah hna i ralhraang pathum an thi, 7 hliamtuar an um tiah tualchung thawnghram in kan theih.

“Khayan kan thi a dai lo, kan tuanbia a chia lo ti kan langhternak a si. Kyeemyindaing ca zong ah phuba kan hlam mi a si” tiah Khayan PDF nawlngeitu nih Khayan Channel ah a chim.

Natogyi ah ralhraang pawl bomb puah an tong; 23 an thi i 17 hma an pu. Mandalay ramthen, Mingyan pengkomh, Natogyi peng chung ah hmunhma thianh ah aa chawklet mi ralhraang pawl cu December 6 zing ah 27 Revolution Forces le Natogyi PDF nih bomb an puah hna i ralhraang 23 an thi, 17 nih hliam an tuar tiah 27 Revolution Forces nih an thanh.

“Natogyi peng Kyauktan khua lamtonnak ah bomb paruk in voi hnih kan puah hna,” tiah 27 Revolution Forces nih an chim.

Daw Aung Sang Suu Kyi le President U Win Myint tazacuai mi thongthlak ding kum zat nawl an chuah. Myanmar Ram Ruahnak Petu Daw Aung San Suu Kyi le President U Win Myint nih atu lio an ton mi tazacuai nak pawl chung ah Kokek raal lei upadi pohmah 25 in tazacuai mi le pohmah 505(b) in tazacuai mi kong cu nihin December 6 ah Ralkap Council kuttang Nay Pyi Taw Biaceihnak zungpi nih nawl a chuah.

Daw Aung San Suu Kyi cu Pohmah 505(b) ca ah kum hnih le Kokek raal lei upadi pohmah ca ah kum hnih thong thlak ding ti in nawl an chuah. President U Win Myint zong Pohmah 505(b) ca ah kum hnih le Kokek raal lei upadi pohmah ca ah kum hnih thong ti in nawl an chuah ve. Dr. Myo Aung zong Pohmah 505(b) in kum hnih thong thlak ding nawl an chuah ve. Ref. BBC, Khit Thit Media, The Hakha Post