Mipi Ralkap Nih Ralhrang Pawl Ralrinnak An Pek!

Mipi Ralkap Nih Ralhrang Pawl Ralrinnak An Pek!
==========
Mipi Hna Nih SAC Ralhrang Ralkap Motor Cu Lamhlat Piin Hrial U, Tiah Monywa PDF Nih Ralrinnak Pek! Mipi hna nih SAC ralhrang ralkap he aa pehtlaimi motor paoh cu a hlat khawh chungin hrial dingin MPDF nih Febuary 28 ah cathanh an chuah.

Naihrawng ah Chaung U, Monywa, Gyi Mong, Ban Si, Gyi Uk, Baw Dih Ta Thaung lampi hmangin Monywa peng chungah SAC ralhrang ralkap he aa pehtlaimi motor tamtuk an luh caah a si tiah Monywa PDF nih an chim. Monywa peng chungah a lutmi SAC ralhrang ralkap he aa pehtlaimi dizel/datsi phortu motor siseh eidin phortu siseh SAC ralhrang ralkap zong an phorh pinah thilri dangdang an phorh tiah an chim.

Cupinah Monywa peng chungah a ummi mipi hna nih Monywa-Chaung U-Myin Mu lampi-Chaung U-Pakukuku lampi, Monywa-Amyint-Taw Caung Gyi lampi, Khin Mon-Gyi Kung-Shew Dar Giah lampi le Chaung U-Amyint lampi hna cu Febuary 23 thawkin tlunkal ti lo dingin Monywa PDF nih ralrin peknak cathanh an chuah cang.

Chin Pung Khuami Motor Le Cycle Hna Cu SAC Ralhrang Ralkap Nih Mei An Khanhpiak! Sagaing ramthen Yinmabin peng chung Chin Pung khua ah Febuary 26 ah helikopter hmangin kahdohnak a tuahtu SAC ralhrang ralkap nih khuami motor (4) le cycle (60) lengkai cu mei an khangh tiah khuami pakhat nih a chim.

Cupinah khua chung luhhnawhnak an tuah lio kahdohnak ruangah khuami minung 9 nak tam nunnak a liam tiah khuami nih an chim. SAC ralhrang ralkap nih cuka khua chungah PDF phu raltuk cawn dihnak puai an tuahmi a um tiah helikopter hmangin kahdohnak an tuahmi a si i, cu bantukin kahdohnak an tuah ruangah khuami hna cu himnak hmunah an zaam.

Cu bantukin an tli/zaam lioah pre-school ah a ummi ngakchia 80 leng le sayate hna zong SAC ralhrang ralkap nih an hren hna i, Febuary 28 zinglei caan tiang umnak sakhan tuah hratin atu bantukin khuami ngeihmi thilri hna cu mei an khangh hi a si. SAC ralhrang ralkap nih Febuary 28 zongah Yinmabin peng chungum Ta Pyi Aye khua cu mei an khangh tiah an chim.

Kha Yan Peng Ping Gan palek sakhan kahdohnak le cuka hmunah bawm dingin a rami SAC ralhrang ralkap cu bomb puah hnawh an si i, ralhrang (20) hrawng an thi tiah Kha Yan PDF ah tuanvo ngeitu pakhat nih a chim. Febuary 28 ah Ping Gan palek sakhan cu M79 bomb Laungchia hmangin kan kahdoh hna tikah kaphnih kahdohnak a chuak i, ralhrang ralkap (5) tluk an thi tiah a chim.

Cuka hmunah bawm dingin Kha Yan khuapi in a rami SAC ralhrang ralkap motor (4) hna cu Gan Gyi khua pawngah lamhlat in control-mi bomb in kan puah hna tikah motor a khenh hna ruangah an rawk dih bantukin ralhrang ralkap zong a thimi le hliammi an tam tiah amah nih a chim.

Cupinah Tung Khuah khuapi in anmah bawm dingah a rami SAC ralhrang ralkap motor zong bomb kan puah hnawh than hna tikah motor zong a rawh pinah a thimi an tam tiah amah nih a chim chih. An dihlak fonh ahcun palek le ralhrang ralkap (20) tluk an thih pinah hliam tuartu an tam ngai lai tiah amah nih a chim.

Cupinah Ta Man Gyi khua ah zanlei sml 3:30 hrawngah SAC ralhrang ralkap khat tthup in a phortu motor (4) hna cu bomb puah hnawh an si tikah a thimi laakah palek Wai Yan zong a tel ve tiah a thaisungnu nih fb ah a tial.

SAC ralhrang ralkap kahdohnak tuahtu hna cu: Kha Yan peng chung mipi vengtu le Thongwa Youth Force i fonhin Fire Dragon tiin kahdohnak kan tuah hi a si tiah cathanh an chuah. Kha Yan peng chung mipi vengtu phu nih Febuary thla chungah SAC ralhrang ralkap cu vawi (7) bak kan kahdoh hna tiah anmah hmanmi fb ah an tial. Credit: The Federal Times