Mipi ralkap nih Ralhrang motor bomb an thlak hna i, ralhrang ralkap zeimawzat an thi!

Chaung-U ah Copper Phurmi SAC Motor Cu Myaung T.G.R Nih Bomb An Thlak Hna i, SAC Ralkap 8 An Thi
========
Sagaing ramthen, Chaung-U peng, Natyekan(နတ်ရေကန်) khua pawng ah copper a phurmi SAC ralkap motor pakhat cu a rawk i an remh lio ah, Myaung T.G.R drone tlaitu phu nih drone in bomb an thlak hna i SAC ralkap 8 an thi, tiah theih a si.

SAC ralkap 20 hrawng cu nizaan September 9 zinglei sml 10 hrawng ah copper an phur. Cu copper phurmi motor cu a rawh caah an remh i, cu lio ah cun drone in bomb kan thlakhnawh hna, ralkap 6 cu kan mithmuh ah an thi i, minung 7 cu hliam an tuar. A thimi 6 ruak le hliamtuarmi 7 hna cu, Myinmu sii-inn ah an kalpi hna i, sii-inn ah ralkap 2 cu an thi ṭhan, tiah T.G.R hruaitu Bo Teih ka(ဗိုလ်တိုက်ဂါး) nih a chim.

Myaung T.G.R drone tlaitu phu nih cun September 8 lio zong ah khan Chaung U le Guaipintaw(ဂွေးပင်တော) khua kar ah drone in SAC ralkap bomb an rak puah cang hna. Atu bomb an puahhnawh mi hna he cun a voi 4 nak a si cang, tiah Bo Teik Ka nih cun a chim chap.

Myawaddy Ah Rallam Sialmi SAC Ralkap 2 Cu KNU Sinah CDM An Tuah: KNU Bataillon 6 nih an uknak Myawaddy peng, Tungthatguih(သုံထပ်ကွေ့) pawng ah rallam a sialmi Tat-Mah 44, Khah-Lah-Yah 8 in SAC ralkap 2 cu nizaan September 9 ah KNU sinah CDM an tuah, tiah theih a si.

SAC kuttang um, Tat-Mah 44, Khah-Lah-Yah 8, Tat-Khuai 1 in ralkap So Aung le Zaw Htun hna cu Myawaddy-Waylay lampi i rallam an sial lio ah kanmah sinah an rak zaam, tiah KNU in hruaitu pakhat nih a chim.

SAC ralkap nih myawaddy-Waylay lampi cu uk khawh an i zuam peng caah ralkap thazaang tampi hmang in thlathum chung an kan doh cang, sinain atu tiang a la kho rih lo. SAC ralkap hna cu cuka hmun ah cun a thimi an tam ngai cang i KNLA sinah CDM tuah in aa fonhmi zong an tam pinah, nizaan September 9 zong ah khan Tat-Mah 44, Khah-Lah-Yah 102 in ralkap pakhat zong KNLA nih an tlaih, tiah theih a si.

Monywa Thonginn Zohkhenhtu Phu In Officer Pakhat Cu PDF Nih An Tlaih! Sagaing ramṭhen, Monywa thonginn in palik bawi(officer) pakhat kan tlaih, tiah Fight For People F.F.P nih cathanh an chuah. Nizan September 9 ah Monywa thonginn zohkhenhtu phu in bohnih pa Myo Ngunt Aung, pumpak No. A-3386 cu Tharse(သာစည်) khua thonginn thar sakmi in a chuak i, Tharse lam ah Monywa pengkomh Battalion 2, Company(4) Fight For People F.F.P nih kan tlaih, tiah an langhter.

Fight For People F.F.P nih an tlaihmi Monywa thonginn zohkhenhtu phu in palik officer pa hi, zei tin dah dantatnak an tuah lai ti cu an cathanh ah an langhter lo. Khuapau dohthlennak, April 3 lio ah Monywa thonginn chung in thongtla mi nih, hramhram uknak duhlonak an rak langhter caah palik nih an rak kham hna i a thimi zong an rak um, tiah theih a si.

Bomb Fimhlawm Ding In A Kalmi SAC Ralkap Cu Bomb Puahhnawh An Ton Caah Ralkap 3 An Thi, 2 Hliamhma An Pu: Monywa-Chaung U lampi ah bomb hmanhmi fimhlawm ding in a kalmi SAC ralkap motor Jammer pakhat le ralkap 5 cu bomb kan puahhnawh hna, tiah Brave Heart Army – BHA in Bo Saney Maung Maung nih a chim.

“Monywa lei in a rami SAC ralkap pawl cu bomb lung 3 in kan puahhnawh caah 3 an thi i, 2 cu hliamhma faak ngai an pu. An motor zong a rawh dih caah thil cawinak seh(Crane) in an cawi i, motor nganmi cung ah an khin i an kalpi,” tiah Bo Saney Maung Maung nih cun a chim.

September 4 lio zong ah Monywa in Sagaing lei ah a kalmi SAC ralkap motor Jammer pakhat le ke ralkap hna cu, Brave Heart Army – BHA nih bomb an rak puahhnawh hna caah ralkap 2 an thi i, 1 hliamhma a rak pu cang.

Sagaing Ramṭhen, Ayartaw Le Khin U Peng Kahdohnak Ah PDF Nih SAC Ralkap 7 An Thah Hna. Sagaing Ramṭhen, Ayartaw Le Khin U Peng Kahdohnak Ah PDF Nih SAC Ralkap 7 An Thah Hna: Sagaing ramṭhen, Ayartaw peng Naungkyi Ai(နောင်ကြီးအိုင်) lei kap ah rallam a sialmi SAC ralkap pawl cu Ayartaw Pah Kah Pha le NBARS-North Brothers phu nih bomb an puah hna caah SAC ralkap 1 a thi, midang 3 zong hliamhma faak ngai an pu.

SAC ralkap hliamhma pumi hna cu ram lakah an thlopbul hna lio ah Monywa pengkomh Battalion 6 i bawm in hriamngan in an kah chap hna, tiah theih a si. Khin U Ah PDF Nih Drone In An Kah Hna Caah SAC Ralkap 6 An Thi : Sagaing ramṭhen, Shwe Bo pengkomh Khin U peng ah SAC ralkap sakhan pakhat cu nizan September 9 zinglei ah drone in bomb an thlak i, SAC ralkap 6 an thi, tiah theih a si.

September 9 zing sml 7:00 hrawng ah Muting(မူးတိမ်) tiva hlei pawng ah umhmun khuarmi SAC ralkap pawl cu, drone in PDF nih an kah hna caah ralkap 5 an thi i, 3 nak tlawm lo hliamhma an pu. A thimi ralkap 5 le hliamhma pumi hna cu i ralkap motor nih a laak hna, tiah theih a si.

Nizan September 9 chun sml 12:00 hrawng ah Myindaung(မြင်းဒေါင်း) lam in umhmun an khuarnak lei ah cycle in a ṭinmi SAC ralkap 5 cu, bomb kan puahhnawh ṭhan hna caah ralkap 1 a hmun ah a thi colh. September 9 zanlei tiang a ruak cu an la rih lo, tiah PDF lei nih an chim.

Thanphyo Zayet Peng Ah Palik Nih Sentari An Cawnghnak Hmun Cu PDF Nih An Kah Caah Palik Pahnih An Thi: Mon ramkulh, Thanphyo Zayet(သံဖြူဇရပ်) Waykali khua pawng Ye-Thanphyo Zayet motor lam um sentari cawnghnak gate cu nizan September 9 zing sml 2:00 ah PDF nih an kah caah palik 2 an thi, tiah tualchung mi hna nih a chim.

Khualtlawng mi le mi lutchuak hna cu sentari cawnghnak gate in palik nih an dirter hna i, checkhlatnak an tuah hna. An duh paoh in tangka an hal lengmang hna caah PDF nih an kah hna, tiah theih a si. Mizei phu nih dah an kah hna ti belte hngalh a si rih lo, tiah theih a si.

Nizan September 9 zing sml 11:00 hrawng ah Ye khua, Yankhi Aung sang ummi pengkomh biaceih zung cu Ye Bilu(ရေးဘီးလူး) phu nih 40mm in an kah. Peng biaceih zung kah a ton hnu in SAC ralkap nih Ye khua chung cu humhimnak ṭha tein an laak dih. Cycle in aa chawkmi mino 2 zong an tlaih hna, tiah tualchung mi pakhat nih a chim.

A luancia August 3 ah Ye khua um Lah Wa Kah(လဝက) zung cu PDF nih an rak kah caah zung rianṭuan telh in 3 an rak thih caah SAC ralkap nih khua chung cu humhimnak ṭha tein an tuah i, lam cheukhat zong an rak kham.

Pakokku Pengkomh Myaing Peng Ah PDF Sakhan Pakhat Cu SAC Ralkap Nih An Laak. Magway ramṭhen, Pakokku pengkomh Myaing peng ah umhmun a khuarmi PDF sakhan pakhat cu SAC ralkap nih an luhhnawh caah hriamnam le zen-kuan an laak, tiah theih a si. Nizan September 9 zing sml 5:30 hrawng ah Myaing peng ah umhmun khuarmi King Fighter PDF sakhan cu, SAC ralkap nih hriamngan he hriamhme he an kah i an laak khawh, tiah Pakokku City le University News nih a langhter.

SAC ralkap 70 hrawng nih kan sakhan an rak fuh i, G3, MA 30, 40mm, 60mm le hriamhme in an kan kah, tiah King Fighter phu in ṭuanvo ngeitu nih a chim. SAC ralkap nih meithal kuan 90 hrawng, kutser meithal zun 10, kedan thar tuah 40, angki le bag(ruksai) tam ngai cu an khangh dih. A dihlak ah kyats sing 80 hrawng man a si, tiah a chim chap.

“Ruahlopi in an kan kah caah meithal, phone le a dangdang thilri hriamnam zeihmanh kan laa manh lo. Minung tu cu kan him dih. Ralkap nih khuami meheh pakhat an thah pinah suiṭhi le a dangdang thil mansung zong an fir,” tiah King Fighter phu in ṭuanvo ngeitu nih cun a chim.

Saw Peng Ah Aho Hngalh Lomi Hriamtlai Nih Tualchung Mi 12 An Tlaihmi Hna Cu Pehtlaih Khawh an Si Rih Lo. Magway ramṭhen, Gangaw pengkomh Saw peng, Kywinchaung(ခွင်းချောင်း) khua ummi USDP party chungtel 12 cu aho hngalh lomi hriamtlai phu nih an tlaih hna i, atu tiang pehtlaih khawh an si ti lo, tiah Saw khuami hna nih an chim.

“September 6 zinglei sml 2:00 hrawng ah Kywinchaung khua ah hriamtlai 50 hrawng an lut i, USDP party chungtel 12 cu an tlaih hna. Nihin tiang an tlaihmi hna cu pehtlaih khawh an si lo. Thinphang in kan um ko,” tiah tlaih a tongmi hna an chungkhar sinin theih a si.

Gangaw pengkomh palik zung he aa naihniam mi pakhat nih, “September 6 zinglei sml 2:00 hrawng ah hngalh lomi hriamtlai 50 hrawng cu Kywinchaung khua ah an lut i, khuabawi Tin Aung a inn cu meithal in an kah hnu ah USDP party chungtel 12 cu an tlaih hna,” tiah a chim. Tlaih a tongmi 12 cu palik nih nili chung an kawl len ko hna nain atu tiang an hmu kho rih hna lo, tiah theih a si.

A luancia August thla lio zong ah Saw khuachung ummi tlakrawh sertu hna chungkhar zong hriamtlai phu nih an rak kah i, khual 2 le inn ngeitu chungkhar 4 an rak thi.

Moebye Ah SAC Ralkap Hriamngan Kahnak In Kum 8 Tluk Ngakchia A Nunnak A Liam: Shan le Kaya(Karenni) ramkulh ramri, Moebye(မိုးဗွဲ) khua cu SAC ralkap nih hriamngan in an kah caah kum 8 tluk ngakchia pakhat a nunnak a liam, tiah tualchung mi hna sinin theih a si.

September 8 zing sml 7:00 in zanlei sml 6:00 tiang kahdohnak ah tualchung mi 12 cu PDF ṭangrual phu hna nih an chanhchuah khawh hna i, kum 8 tluk ngakchia pa cu hriamngan hliamhnma in a nunnak a liam, tiah theih a si. Tualchung mi pakhat nih cun, “Ngakchia pa cu September 8 lio ah a nunnak a liam i, nihin September 10 ah a ruak kan laak khawh,” tiah a chim. Credit: The Chin Post