Karen Ramkulh Thla 6 Chung Kahdohnak Ah SAC Ralbawi Telh In Ralkap 2623 An Thi
================
2023 kum thawk in kum cheu tiang Karen ramkulh chung kahdohnak ah SAC ralbawi commander 5, deputy commander 5, captain 9 le Lieutenant 4 telh in ralkap 2632 an thi, tiah Karen National Union(KNU) nih nizan July 9 ah cathanh an chuah.
2023 January 1 in June 30 tiang ah nawlngeihnak latu SAC ralkap le Karen ralkap hna cu Karen ramkulh chung voi 2495 an i kap, tiah an thanhmi ah an langhter.
Kaphnih kar kahdohnak ah SAC ralkap lei ralbawi hna telh in ralkap 2632 an thi i, ralkap 1685 hliamhma an tuar pinah SAC ralkap nih an hmanmi motor 99 zong Karen ralkap nih an hrawh.
Kahdohnak ah cun KNLA, KNDO le tualchung hriamtlai phufonh lei in ralkap 76 nih ram le miphun ca ah nunnak an pek i, ralkap 257 hliamhma an tuar, tiah Karen National Union(KNU) nih an thanh.
Vermont ah chungkhar khuasaknak inn rawk in thilfir tu ah ruah mi pa pakhat nih palik motor cu an hnu lei in a pah hna ca ah palik bawi 1 nunnak liam a kuttang 2 nih hliam an tuar tiah Vermont khua palik nih an chim.
July 9, khan Rutland khuapi palik officer Jessica Ebbighausen kum 19 mi cu misual pakhat thilfir tu misual Tate Rheaume kum 20 mih nih motor in a pah ca ah a nunnak liam tiah theih asi. Palik officer Jessica Ebbighausen hi motor pahnak hmun ah a nunnak liam colh. palik dang 2 le a pahtu hliam tuar mi cu an dirhmun a derthawm ca ah si-inn pi ah an tlikpi colh hna tiah kan theih.
Jessica hi Vermont ah khuasa mi si in, May thla khan Rutland Palik ah part-time in palik officer rianṭuan mi a si tiah an langhter. August thla thok hin Vermont Palik Academy ah full-time in officer rian tlai ding mi a si tiah an chim.
July 10, zing suimilam 11:00 tluk ah Mizoram lemcangthiam V.L. Peka Zote, Bethlehem sang khuasa mi cu LRM si-inn pi ah kum 42 in a nunnak liam tiah theih asi. Lemcangthiam Peka hi caan saupi typhoid, dehydration le septicemia zawtnak a ngeih ruang ah ICU ah zohkhanh rak si a voihnihnak ICU kalpi a si hnu ah tuban tuk in a liam hi si tiah an chim.
American lemcangthiam Brad Pitt cu F1 British Grand Prix thimnak ah Silverstone ah aa langh lai i formula 1 thimnak ah ai tel ve lai tiah theih asi. Hollywood lemcangthiam Brad pitt hi F1 driver bantuk in a lemcannak ah F1 driver bantuk in a rak i langh.
Tuzarh chung ah British Grand Prix thimnak ding ah aa langh ve lai i a ton bal lo mi thil thar a ton lai tiah theih asi. Brad pitt hi thimnak caan a phak hlan ah Silverstone track ah tlawng in mipi hna he tonpumhnak a va tuah lai Mercedes phu nih a motow khaltu ding zong an hlan piak tiah an langhter.