Ka Naule he kan Diary
=================
Urban Ranger Force (URF) dirh dingin CNA i Chief of Staff Pu Hla Thun nih ruahnak a rak kan cheuh i URF commander in tuanvo pek ka rak si. Minung kaa thim hna. Hmasabik ah keimah he Training a kai tti mi chungin Lt. Van Biak Thawng (Tleicia), Tial Chawn (Tleicia) Phun Sang (Tleicia) min langhter awk a tha lomi pahnih, le Cung Awi hna an si.
Mah lioah training a kai liomi chungin minung kaa zoh tthan hna i Bawino Ngun Cung Lian (Tleicia ) Salai Tluangte le Sui Jose Lian tiin ka rak ithim hna. Cun Lai Kulh (Tleicia) zong kanmah sin um ve ding a sinain kan sin a phak manh hlan June 5 ah Tial Chawn le Phun Sang he bomb puahnak in an kan liam tak.
==================================
2021 Feb 1 ah Ralhrang nih Uknak kan lak tiah thawng an thanh i a ni bak ah ka Naupa Phun Sang kaa tthit i CNF Headquater ah kan pu le ton ah kan rak kal. Zankhat kan riak i kan kir colh. Col. Solomon ThangDing he saupi bia kan rak iruah.
Feb 6 in lamzawh kan awt. Lamzawh kan awt sin tein Phun Sang, Tial Chawn, N G Cinzah, Tluangte, ZaHre Lian hi ramlak le mi lothlam ti bantuk i Patrick Brown (Elishama) he kan i thuhnawhnak paoh ah a rak kan zul i kan herhmi paoh a kan tawlrel piak tu an si. Lamzawh in kan lohma chuah khawh kan dawh tilo tikah hriamnam lei in ttanlak kan hau.
Kei le Elishama cu tlaih ding in warrant chuah kan si tikah CNF Headquater lei ah kan kal. Voikhat cu kan naupa Phun Sang cu a cycle khat in bomb kan phorh ter. Laikua tidil khi Ralhrang an um lio rak si kaw kan zulh ngam lomi a si. Asinain Thantlang zong cu Laipawnglung gate ah Ralhrang an rak um caah Laikua lei tu cu a rak ithim.
Lamka in Ralkap nih an rak kham i a dir ahcun a bomb he cun tlaih ding a si tikah a khamtu pa cu a rak pah i lo ko in a rak tli kho. A kir lei ah Pu Sui (Dr. Sui Khar) he zong bia an rak iruah i Pasal cu mah bak ding siko tiah tha a rak pek len.
Kan unau lawng bomb hmanh dingin Hakha kan rak tlung. Kan uupa thlam ah kan rak riak. A rawl a rak ttam tuk ko rua khah zanriah ka chuanter cu kan pahnih caah fang pawng 6 a rak chuan ko. Kan rak ei dih. Voikhat cu thawhhlam kan ei i U Aung Rawl hlei tuktak chiah hi tho zong a lem a ka ti i a khim hnu ah buhkio Kheng thum a rak ichap. Kan rak cakan tuk bia zong a si men laiš„Nain Phun Sang hi pa hme nawnte a sinain a thawng taktak Chuncung le Khuathar fa ciammam kan ti tawn.
May thla 16 ah Chuncung le Dokthek kar ah Tatmah 77 (Naite Kankaw in a kaimi) he khan kan ikap. KA meithal zun 3 te lawng kan rak ngei. Riffle pahnih kan ngei i kei nih pakhat kaa tlaih. Pakhat cu Tial Chawn nih aa tlaih i zun khat hmanh a rak khuang kho lo. Mah tan ah Chuncung Van Biak Ling (Bawlung chuih i Side Back ahcun ka uar bik ka ti tawnmi) nih a kan liam tak. Sai Ling a hnak ah an kah.
Phun Sang nih a ka chawnh. “U Aung Pa Sai an khen ka puak i a ai tuk ralkap pawl kan pawng te ah an um fawn puak awk thaloin a ai zeitin ka tuah lai?” a ti. Zuu naa ken maw a hma ah rak toih ka ti. Kaa ken lo a ti.
A si ahcun na angki rak iphoih law a hma kha tha tein rak tuam cun a remnak teah rak ihter law na thil pakhatkhat kha chantling ah tha tein rak tlinh cun rak kal, Ralhrang an lanh in kan lak than lai ka ti. A duh lo, a ttah buin ka kaltak kho lo a ka ti. Mah hlan vialte hi bur tang ah a bawk i amah nak ngan deuhmi Pa Sai cu a keng cungah a bawhter i meng khat tluk dengmang cho ah a kaipi. Pa Sai cu a hnak ah aa hliammi a si caah puak kha a celh lo.
Cucaah Phun Sang cu commander ka sinak in order kan pek ka chimning in tuah law nangmah kha rak ra ka ti. Cuticun a ttah tuk buin order cu a rak zulh. PATHIAN le Chuncung Mino pawl thawngin Pa Sai zong cu kan rak lak khawh than i tutiang dam le thawng ngai in Miphun caah hriam a tlai. (Phun Sang a thihnak kong cu a dang tein ka tial than te lai) Thaizing kip lei ah Tial Chawn (Tleicia) ka naupa kong le a dotdot in Lt. Van Biak, Bawino NG Lian kong tiin a kan kaltakmi ka naule kong tete ka rak ttial than te lai. by Salai Vakok