Mino pawl lungthin lei thawng tuk ruangah!

Russia Nih A Lak Cangmi Hmunhma Tam Ngai Ukraine Ralkap Nih An Lak Than!
=========
Russia ralkap nih an rak lak cangmi Ukraine ram chaklei Khakiv hmunhma, Kilometers 3000 hmun cu, Ukraine ralkap nih kan lak khawh than tiah Ukraine ralkap nih an thanh.

February ni 24, ah Russia nih Ukraine hmun tamlak cu arak lak, Ukraine nih cun i khamnak deuh in caan kan rak hmang, asinain a tuah cun kanmah nih kan nam cang hna i hmun tampi kan lak khawh cang. Ukraine ram thantar zong kan thlai khawh cang tiah, President Zelenskyy nih cun a chim.

Russia ram Ministry of Defense nih cun, Ukraine ralkap nih biatak tein a kan nam caah kan ralkap hnu kan kirter hna, kan ralkap hna cu Ukraine hmunhma a biapit deuhnak ah kahdohnak bawm dingin kan thlah than hna lai tiah, an chim ve.

US le Europe ram hna nih Ukraine hriamnam an bawmhmi cu Ukraine ralkap nih Russia ralkap tuknak dingah a kan bawmhchanh tuk, Ukraine ralkap nih cun Khakiv pengkulh khuapi tam ngai an lak cang i pengkulh khualipi Khakiv lei kal in hmai an fong tiah, President Zelenskyy nih cun a chim chap.

UK Ministry of Defense nih cun Ukraine ralkap nih khuapi tampi an lak khawh cang, Khakiv zongah Russia ralkap hna cu an cawlcang kho ti lo, Ukraine ralkap nih an van nammi hna hi Russia ralkap nih an i kham khawh lo caah a hawikom rampawl nih cun Ukraine cungah zumhnak kan ngei tiah, an chim.

Ramdang Hna Nih Russia Cung Phihkharnak An Tuahmi Kongah China Palai Nih A Mawhchiat Hna! Russia cung i ramdang hna nih phihkharnak an tuahmi cungah Russia ram Moscow khuapi a vatlawng mi Li Zhanshu, Chairman of the Standing Committee of the National People’s Congress of China nih mawhchiatnak bia achim tiah, China cozah ngeihmi Xinhua media nih a thanh.

Ramdang hna nih Russia buainak ah phihkharnak an tuahmi le ramleng in a langtlang in Russia tazacuainak atuah tu ram hna cu Russia le China i bawm in lehrulhnak kan tuah hna lai tiah, Li Zhanshu nih Russia Parliament palai hna he an i tonnak ah cun a chim.

Li Zhanshu cu President Vladimir Putin he zong tonnak an ngei tiah, theih a si. Tuthla chungah Russia President Vladimir Putin le China President Xi Jinping zong Uzbekistan ram meeting ah tonnak an ngei lai. Li Zhanshu cu Politburo of the Chinese Communist Party chungtel pakhat zong a si i President Xi Jinping he zong naihniam tein a ummi a si.

Ukraine-Russia buainak ah China nih cun an karlak ah ka um tiah, a chim ko nain Li Zhanshu a khualtlawn ningcang zoh tikah China hi Russia lei in a dirmi a lo tiah, ramkhel lei hlathlai tu hna nih cun an chim.

Pakistan Tilian Harnak A Tonngmi Ca Ah US Nih Bawmhnak A Pek! Pakistan ram ah dongcat loin ruah a sur caah tilian a chuak i mizapi harnak fakngai an tuarmi hna caah US nih a pek mi bawmhnak a phan tiah theih a si. Tilianh a tuar mi hmun hna lakah tilianh a zualnak Sindh ramkulh caah bawmhnak thilri a rak phurtu US Ralkap vanlawng pahnih cu bawmhnak thilri hna he a phan kho tiah, theih a si.

“Vanlawng pakhat nih bawmhnak thilri ton 39 hrawng a rak phurh i, hi bawmhnak hi World Food Programs nih, tilian atongmi ramkulh hna ah an phawtzamh lai” tiah tuanvo ngeitu hna nih an chim.

Pakistan ram ah July thlathok in dongcat loin ruah asur caah tilian a chuak i an ram mipi a thong leng nih harnak an ton hi a si. Hi bantuk in tilian a chuahnak a ruang bik cu khuacaan a thlennawn ruang ah a si tiin thiamsang hna nih an chim.

Khuacaan chiat ruang ah harnak a tongmi hna cu philh hna lo ding le ramdang mi zong nih bawmhnak pek cio dingin United Nations Secretary-General Antonio Guterres nih arak chim ve. United Arab Emirates ram zong nih vanlawng pahnih Pakistan caah bawmhnak an rak pek ve tiah, theih a si. Credit: The Chin Post