Mingalardon vanlawng sakhaan hriamngan in kah a tong!
Mingalardon vanlawng sakhaan hriamngan in kah a tong!
=========
SAC nih a tawlrelnak sipin nih a ngeihmi Yangon khua Golf certual cu April 9 zinglei 6:00am luan hrawngah hriamngan in kah a tong i minung pakhat a hliam, bom in kah an tong tiah thawngtheih a si.
“Golf certual No. 11 ah bom a tla. Golf certual ah rian a ṭuanmi pakhat a khen. A tu cun, ralkap le palik pawl an phan. Certual a chung le leng zohfelnak an ngei. Thil a can hi sml 6:00am luan 7:00am a tlin lai hrawngah a si. Golf certual hi an khar lo” tiah Golf certual in rianngeitu pakhat nih Khit Thit ah a chim.
Yangon Golf certual hi ralkap Golf certual he aa pehmi a si i pension a la cangmi ralkap bawi pawl, zung bawi pawl le ralkap he aa pehtlaimi sipuazi minung pawl an rak tu tawn, bia an i ruahnak hmunhma pakhat a si tiah Yangon khuami hna nih an chim.
Cun, Mingalardon vanlawng sakhaan, minung an ummnak a khan pawl hriamngan in kah a tong i ralkap nih a ngeihmi khoh-suai sehzung pawng a puak tiah khuami hna sin in theih a si tiah Khit Thit nih a langhter. Hriamngan a puah thawng cu Hmawbi le North Okkalapa lei in kan theih khawh tiah Hmawbi khuami pakhat nih Khit Thit sin ah a chim.
“Zing sml 7:15am ah thawngpang thang taktak in voi 4 a puak”. North Okkalapa khuami nih “Kan lu ah ṭek nih an kan tlak cang rua tiah kan ruah. Bom puah thawng ka theihmi lak ah a thang bik a si. Zinglei sml 7:00am hrawng ah a puak” tiah Khit Thit ah a chim.
Ayadaw le Chaung U kahdohnak ah SAC ralkap 14 nak tlawm lo an thi. Sagaing ramṭhen, Ayadaw peng le Chaung U peng hna ah kahdohnak a chuak i SAC ralkap lei in 14 nak tlawm lo an thi tiah PDF nih an thanh. April 8 ah thazang 80 hrawng a simi SAC ralkap pawl cu Ayadaw peng Shoihkha khua zing sml 4:30am ah hriamngan kah pah in khua chungah an lut i mipi 1 an thah leng ah mipi inn 30 leng mei in an khanghpiak hna.
SNAKE EYES-PDF, PDF-Shwebo, ALPHA-7, Daungman phu, PyungShwin phu (Depeyin), Shwebo peng phukomh 2, Ayadaw mipi hriamtlai phu hna fonh in SAC ralkap cu Zuatazua-Baungkya khua tiang an dawi hna i an kah hna caah SAC ralkap 7 an thi i 15 nih hliamhma an tuar tiah C&T SHWEBO phu nih an thanh.
Cun, Sagaing ramṭhen, Chaung U peng ah April 5 zaan sml 10:00pm ah Pakokku in Mandalay lei ah a chuakmi SAC ralkap phu 7 aa telmi mawṭaw cu Chaung U mipi hriamtlai phu nih bom an puah hnawh hna caah ann-sa-tone mawṭaw hrap khatlei a rawk. Bom puah hnawh ruangah a thimi cazin theih a si lo tiah PDF-Chaung U nih a thanh.
Cun, April 7 zinglei 2:30am ah Mandalay in Monywa lei ah SAC ralkap pawl an i citnak Express mawṭaw 2 le mawṭaw a hmemi 4 cu Chaung U le Myaung mipi hriamtlai phu hna nih bom an puah hnawh hna caah mawṭaw 3 a khen i a thimi an tam tiah PDF-Chaung U nih a thanh.
April 7 zing sml 7:30am ah bom a thianh liomi SAC ralkap phu cu PDF-Chaung U le Immortal Guerilla Force nih bom an puah hnawh hna caah SAC ralkap 7 an thi tiah PDF-Chaung U nih a thanh.
KNU battalion 5 nih a tlaihnak hmunhma ni 3 chung kahdohnak ah SAC ralkap 6 an thi. Karen National Union (KNU) battalion 5 nih a tlaihnak hmunhma Papun ah a rak lutmi SAC ralkap, BGF le Karen National Liberation Army (KNLA) karlak ah nithum chungah kahdohnak voi 10 a chuak. Cu kahdohnak hna ahcun, SAC ralkap 6 an thi i 5 nak tlawm lo nih hliamhma an tuar tiah KNU nih a thanh.
April 6 chun sml 1:59pm hrawngah nyapawkalo le kahawkalo lam karlak himnak a lami BGF phu cu voikhat, 2:30pm ah Kyebuhlu ah voikhat kahdohnak a chuak i BGF lei in a thimi an um kho nain a fiang lo tiah KNU battalion 5 nih a chim.
April 7 ah Lutaw peng chungah kahdohnak voi 5 a chuak i SAC ralkap 2 an thi, a hliammi an um kho men. Dwelu pengah SAC ralkap le BGF phu hna cu KNLA nih voi 3 an kah hna i SAC ralkap 4 an thi, 5 hliamhma an pu tiah Mutaw thawngzamh nih a langhter.
SAC ralkap pawl cu fur a tlak hlan ah ralram ralkap buk pawl caah eidin le hriam chap khawhding aa zuam caah KNLA battalion 5 he nifatin ngawt in kahdohnak a chuah hi a si. Credit: The Chin Journal, The Chinland Post