Mindat Paraltha Pawl Cu Uar An Um Tuk Hringhran Ko!

SAC Ralhrang Ralkap Hna Nih CDF-Mindat Sinah Kuanfang 800 Hrawng Zuar Dingah An Chim Hna!
=========
SAC ralhrang ralkap pahnih nih Mindat-CDF sinah an kuanfang 800 tluk cu zuar kan duh tiah pehtlaihnak an tuah tiin Mindat CDF ah tuanvo ngeitu pakhat nih Than Lwin Khet News ah a chim. “Sml 3:00 chungah ralkap pahnih nih an kan pehtlaih colh. Pakhat nih kuanfang (300) zuar dingin, cun a dang pakhat nih 500 tluk zuar dingin. An zuar dingmi kuanfang cu MA kuanfang an si tiah a chim.

Chin ramkulh Mindat, Matupi, Kanpalet, Kyaukhtu, Saw le Gangaw telh in Hti Lin peng chungah a ummi ralkap hna nih phaisa nan herh ahcun nan kuanfang nan kan zuarh khawh tiah Mindat CDF page ah Febuary 7 chun ah cathanh an chuah hnuin atu bantukin an kan pehtlaih hi a si.

MA kuanfang 40 MM le 60 MM hna cu Mindat CDF phone number 09 4486 85594 sinah nan zuarh kho tiah cathanh an chuahmi ahcun an langhter. 40 MM pakhat ah kyat 40000, 60MM kuanfang pakhat ah kyat sing (1) kan in pek hna lai i, MA kuanfang hna cu a tam ahcun a tam ningin kyat 3000 tiang kan in pek hna lai tiah CDF Mindat nih an chim.

Kuanfang zuarh a duhmi ralkap hna nih ralkap zulhphung ningin nan zulh a herh tiah Mindat CDF nih ralrinnak an pek.
Kahdohnak cu kahdohnak lawngah a si lai. Kahdohnak ahcun thluak hmanh a herh ahcun hman khawh a si. Asinain thil zuar thil cawk ahcun zulhphung ningin kaphnih nih zulh veve ding kan duh tiah Mindat CDF pakhat nih a chim.

SAC ralhrang ralkap hna nih PDF sinah CDM nan tuah khawh lo hmanhah mipi thahnak ah hman dingmi kuanfang hna cu nan zuarh nakhnga atu bantukin timhtuahnak kan ngeihnak a si tiah a chim. A hlan ahcun hriamnam tling he Mindat CDF sinah aa fonhmi cu Mindat CDF nih phaisa zeimawzat kan pek hna pinah himnak hmunah kan thlah hna tiah a chim chih.
Nihin tiangah Mindat CDF sinah hriamnam tling he aa fonhmi ralkap 12 an um cang tiah theih a si.

Lai Pasal ttha hna, Vawlei pi uk khi kan itimhmi si lo! Rili ral ah kal in mi hranchaw va lak dingah raltuk zong kan ithawh lo. Thlanglei Africa ah va kal in raltuk i sal va tlaih ding in ral tuk aa thawhmi zong kan si lo.

Yangon le Naypyidaw ah va ttum in Kawl miphun hna va pen dingin ral a tho mi zong kan silo. Teinak thantar he Federal Democracy tlunzoh iphurh in kan tlun tikah thutdan sang i thut te ding zongah ral a tumi kan silo.

Cu nak cun, Pathian nih Miphun tling ah a kan ser ve nak in kan i ngeihmi kan ram, kan nunphung, kan caholh le kan biaknak hna sunhlawi le cawisan ve nak nawl kan ngeih i kan tappi le lungthu kongah kanmah tein khuakhan nak nawl kan ngeih nak hnga le kan techin fapar hna chan ah mi ramdang i hlawhhlan le fimcawn len hau loin kanmah tappi khor te ah zalonnak taktak he an tlonlen khawhnak dingah kan hauhruang a vengmi kan si.

Chizawh a rat i a au len tung nain Pawpi a rat tik i a zaammi innhngak uico phun zong kan si lo. Nan tei lai maw???tiah a ka halmi cu hitihin ka leh tawn hna.

Kan tei le tei lo cu Pathian nih hna a ka tlakpi i kan Miphun dihlak kan tan ahcun kan tei ko lai. Kannih cu kan tei lo zongah kan nunnak a dih tiang kan Miphun ven dingah aa thawhmi kan si. Kan nun bu cun sunghnak he cun kan kir bal lai lo. Kan ruak in kan kir sual le kan khuallam a pehtu hna cungah teinak hmuh le hmuh lo cu aa hngat te lai.

Kum khat cu a liam cang ko. Zeitik kan tei lai bel ho chim kho hlah. Hnu kir awk a tha ti lomi hi dothlennak ah zei can khi dik kan kal rih hnga…i hnek tulmal rih ko kun usi! Zeipaoh te Bawipa nawl si ko.

CNA/CNF le tualchung Miphun runvengtu hriamtlai hna nih kan khuate vialte kan nunnak pek in kan venhim lai. CDM a lami Siangcachim le Sianghleiruun kai kan mino vialte nih kan fimthiamnak kan chuah lai. Ram chung ram leng ummi kan nulepa vialte nih ngeihchiah chawva bungh ve uh.

Cuticun hmailei kan ram a sertu ding simi kan fale hna fimcawnnak biatak tein kan tunmer lai. Ral kan tei tikah kan ram serthan nak caah a biapi bik a simi fimthiamnak hriamtha aa tlaih kho mi chanthar (New Generation) mino tampi kan chuahter khawh hna a herh.

CBCUSA Youth Director Za Thawng Cin nih cun hitihin a chim “Ralhrang nih uk tthan nak hmanh in ka ttih deuhmi cu next generation ah Chin mino cacawng loin chimh cawnpiak khawh lomi an tam tuk te sual dingmi a si.” Credit: Salai Ngun San Aung