Sagaing, Chin Le Karenni Ah Fak Deuh In Kahdohnak Tuah Dingin MAH Nih Nawl A Pek Hna
==========
Sagaing ramthen, Chin le Karenni ramkulh ah fak deuh in kahdohnak tuah dingin SAC hotu Min Aung Hlaing nih July 13 i SAC chungtel upa hna le ralbawi hna tonnak ah nawl a pek hna tiah theih a si.
Hi kong hi SAC tang thawngthanhnak a si mi MWD nih July 13 zaan suimilam 8 thawngchimnak ah an chim. Sagaing, Chin le Karenni cu SAC ralkap tambik an thihnak hmun le dohthlennak ralkap hna nih hmunhma tambik an uk khawhnak a si.
Magway, Ramṭhen, Tatkone Le Yawthit Khua Kahdohnak Ah SAC Ralkap Le Pyusawhti Lei 28 An Thi. Magway ramṭhen, Pauk peng, Tatkone le Ywathit khua ah a ummi pyusawhti cu kan va kah hna i SAC ralkap 5 le pyusawhti 23 an thi, tiah Myaing peng rungvengtu Pah Kah Phah in ṭuanvo ngeitu pakhat nih a chim.
July 11 zing suimilam 5:00-6:45 tiang Tatkone le Ywathit khua ah a ummi pyusawhti pawl cu tualchung hriamtlai phu hna nih an va kah hna. Kahdohnak ah cun SAC ralkap, pyusawhti le palik pawl cu an zaam hna i, Ywathit khua um pyusawhti inn zong kan khangh pinah July 11 zing suimilam 8:00 luan ah SAC ralkap Mi 35 Helicopter nih a kan kah ve nain kanmah lei hliamhma pumi kan um lo, tiah Myaing peng rungvengtu Pah Kah Phah nih an langhter.
Pauk ah umhmun a khuarmi SAC ralkap nih 120mm hriamngan in voi tam tuk an kah ruangah Tatkone le Ywathit khuami hna zuatmi caw, na le innzuat saṭil cheukhat a thimi zong an um, tiah theih a si. Kahdohnak ah tualchung hriamtlai phu lei in ralkap 3 hliamhma an pu i pyusawhti nih an tlaihmi tualchung mi 7 zong an chanh khawh hna.
Kahdohnak ah cun Pauk peng YRF, Pakokku Battalion 11,18, PKU Earthquake, Pauk Pah Kah Phah, Myaing Pah Kah Phah Battalion 3, Company 2, 4 le a dang ṭangṭi phu hna i bawm in an kah hna i kutser meithal zun 7 zong an laak, tiah Khit Thit Media nih a ṭial.
Mizoram Ah Myanmar Lei In Phorhmi Zenthong Assam Rifle Nih An Tlaih. India, Mizoram ramkulh, Champhai peng, Vaikhawtlang khuahlun pawngah India mi pa 2 le Myanmar mi pa 2 nih an i citmi motor chungah Assam rifle nih zenthong an tlaih.
Assam rifle nih an tlaihmi thilri hna cu kuanfang bawm 12, detonator 363, safety fuze bundles 6, zeidang thilri le phaisa Rs. 75,000 kan tlaih, Assam rifle nih an langhter. Cu thilri a phortu motor telh in 125 Kenbo cycle 2 zong kan tlaih chih, cu thilri a phortu hna cu Champhai palik kut ah kan ap, tiah Assam rifle nih an thanhmi ah an langhter. Credit: The Chin Post