SAC Vanraldohnak A Ngeihmi le Kah A Tong Mi Cheukhat!
========
Khaupau dohtlennak ah SAC nih vanraldohnak ah ahman mi, helicopter 2 le jet fighter 1 cu mipi ralkap lei nih tla lak in an rak kah tiah theih a si. Cun, a dang Helicopter 1 zong rawk lak an kah a tong. Khuachung kahnak ah Hmawbi Air Base HQ (former 501 Air Base) vanlawng 2 an hrawh khawh. Mipi ralkap nih Vanlawng tla lakin an kahmi le an hrawh cang mi dihlak 6 an si cang. Mah vanraldohnak ah mipi ralkap lei hriam an hman mi cu bomb, drone, meithal ngan mi in an kah hna ti a si. Vanral kahnak rocket hriam an hman lo.
KIA nih Mi-35 Helicopter an thlak: A voikhatnak vanlawng kahnak cu May 3, 2021 khuapau dohtlennak a hramthok ka Kachin ramkulh, Moemeik peng, Tower tung kahdohnak ah Russia ser Mi-35 cu KIA nih tlalak in an kah.
PDF nih Hmawbi ah Yak-130 pahnih an hrawh: A voihnihnak vanlawng rawklak in an kahnak cu Hmawbi Air base ah Russia ser Yak-130 vanlawng number 1802 le 1803 an si. Cucu February 18, 2022 ah People’s Force (Yangon) nih lamhla remove control bomb in an kah.
CNF/CDF Thantlang nih an hrawh: A voithumnak cu January, 2023 Chin ramkulh, Thantlang khua lei a rami Mi 17 thilphur Helicopter cu CDF- Thangtlang le CNA nih drone in an kahnak ah Helicopter an khen caah meikhu a chuak i, Thantlang khua ah tum kho ti loin, a hnu lei a khir than. Cun, a dang pakhat CDF nih an bawh ruang ah Hakha a zuan tawnnak lam zulh lo in, a dang in an zuan ruang ah pakhat a rak tla fawn.
A voilinak ah Sagaing ramthen, Hommalin peng, Shwe Phi Aung khua kahnak ah Ralkap Helicopter 1 cu February 1, 2023 ah an kah khawh. SAC fighter 1 a voikhatnak kahnak cu June 30, 2023 Karenni ram, Bawlakhe pengchungah K-8 cu tlalak in an kah khawh.
Ralhrang Nih Raltuknak Vanlawng An Ngeihmi Cu, Russia ser Su-30= 2, Mig-29=31, Tuluk le Pakistan komh in ser mi JF-17=7, Tuluk ser A-5= 21, Tuluk le Pakistan komh in sermi vanlawng mawgh cawnnak K-8= 16, Russia ser Yak-130= 18, Tuluk ser raltuk cawnnak FTC-2000G= 6, Russia ser Helicopter Mi 17= 12, raltuknak Helicopter Mi-35= 9 an ngei. Vanral in hmunrawn kahnak an hman bik mi ah Yak-130=18, Mig-29=31, Helicopter Mi-35= 9 an si. A dang vanlawng cu nihin ni tiang an hmang tuk lem hna lo.
Mipi Ralkap Hmailei Ruahchannak SAC airforce nih an bochan bik mi Yak-130, Mig-29, Mi-35 tiin an dihlak 53 hrawng an tang. Mah vanlawng pawl cu Myanmar chaklei le thlanglei kahdohnak ah an hman i, ramchung vanral kahdohnak rikhiah mi a um caah aa ralring ngai. Cun, a laibik hmunrawn kahdohnak ah Mi-35 hi biatak tein a hmanmi vanlawng 9 chungin 2 cu a tla cang i a tu 7 a tang. Cucaah, SAC raltuknak vanlawng a ngeih mi 53 cu operation a tuah peng caah remhcan le dimh can he cun operation a liam deuh ah cun a hmang kho tuk ti lo.
Kahdohnak Ruang Ah Khampat Khua A Chuahtak Mi Khua ah Kir Kho Than Cang. Sagaing ramṭhen, Tamu peng, Khampat khua ah July 22 zaan 8:00 ni thok in kahdohnak ruangah Khampat khua le Kanaan khuami nih khua chuahtak in Kalaymyo le pawngkam khua ah an rak tli/zaam mi hna cu, August 3 thok in khua a chuahtakmi mipi cu an umnak khua ah kan kir kho cang, tiah theih a si.
July 22 in Khampat khuachung No.1 sang um palek sakhan le ralkap sakhan ah mipi hriamtlai phu le SAC ralkap kar kahdohnak a rak chuah ruangah khuami 3,000 leng cu khua chuahtak in Kalaymyo, Tamu le a dangdang hmunkip ah an rak zaam hna. Khampat ummi Khampat Christian Council (KCC) in ṭuanvo ngeitu pastor hna nih August 2 ah mipi ralkap phu le SAC ralkap kar biaruahnak an ngeih hna hnu ah atu bantuk in khua ah an kir khawhṭhannak hi a si.
Khua mi hna nih mah umnak inn pawngkam ah a puak kho mi bomb nan hmuh a si ahcun ṭuanvo ngeitu hna sin ah thawngthanhnak tuah colh ding in le mibu piin um lo ding in, mi bawmchantu phu nih ralrin an pek hna. July 22, ni Khampat khua kahnak ah SAC ralakp nih hriamngan in khuachung an kahnak ah No. 1 RC Biakinn hmai bom thla ruangah Pu Nga Nga a fapa cu a khen caah a nunnak a liam.
July 28, Khampat No 2 ah tuzing Sml 9:00 AM hrawng ah UPC pastor Pu Lalroding le a fale 2 hna cu Saikel he an i phurh liomi cu SAC Ralhrang hna nih an rak kap hna i, Saikel a khalhpiaktu tlangval Lalremruat kum 26 cu an khen caah a hmun ah ril in a thi colh. Nunnak liam mi Lalremruat (kum 26 ) cu amah umnak khua zong ah a ruak vui kho lo in Tahan Thlanmual ah an vui colh tiah theih a si.
Kalaymyo No.2 Siangsangrun (High School) Pawng Bompuahnak Ah Ralhrang Mi 4 An Thi, Ralhrang Nih Tualchungmi Pakhat An Kah. Kalaymyo, Taungphilla sang ah a um mi siangsangrun sianginn No.2 (Basic Education High School) hmai mipi umkalmi checkhlatnak a tuahtu SAC ralkap hna cu August 3, zinglei suimilam 9:00 ah bomb puahhnawh an tong i ralkap 4 an thi, tiah theih a si.
Bom puah hnawh an tonnak hmun ah ralhrang rual an hun phan i, pawngkam ummi hna cu an meithel in an kah hna ruangah tualchung mi pakhat cu a phei ah kuan hliamhma a pu, tiah tualchung mi nih an chim. Bomb puahhnawh an tonnak hmun ah SAC ralkap 1 cu a thi colh i, midang 3 zong an hliamhma tuar kho loin an thi ve, tiah theih a si.
Ralhrang bom nih a puah hna hnu ah, an duhnak hmun poah ah meithal an thlah ruang ah khuachungmi pakhat kuan nih a khen tiah kan theih. Kalaymyo khuachung ah SAC ralkap nih an duhnak hmun paoh ah mipi umkalmi checkhlatnak an tuah: motor cycle aa citmi license le phone an check hna i mipi umkal nuamkho lo in an tuah lengmang hna theih a si.#