Kalaymyo Peng Kahdohnak Ah Ralhrang 4 Le Pyusawhtii 7 An Thi, Ralhrang Hriamngan Nih Biakinn A Hrawh!
==========
Kalaymyo peng, Myo Hla le Sekan (Ceikkan) khua karlak, August 10-11 ah SAC ralkap le mipi hriamtlai phu hna karlak kahdohnak ah ralhrang 4 le Pyusawhtii 7 an thi tiah mipi hriamtlai sin in theih a si. Ralhrang pawl nih kahdohnak a dih hnu ah Kalaymyo nitlak thlanglei khua ah hriamngan in an kah ruang ah Sekan khua Independent Presbyterian Church a hrawh tiah khuami sin in theih a si.
Kahdohnak chung in ralhrang AK zuunkhat, kuankhamnak angki (Equipment) le Phone mipi ralkap nih an lak khawh. Ralhrang lei in Kalaymyo nichuah lei Taung Ngo khua Pyusawhti 7 an thi. Mah a thimi ah Pyusawhtii hruaitu minthang Than Hto Aung zong a tel. A hmai a rawk dih I a mit hmu a pawt tiah mipi ralkap nih Khit Tit Media ah an chim.
Kalaymyo ah SAC ralhrang nih July 13, zaan sml 8:22PM ah khuate cheukhat lei ah hriamngan an kah ruang ah Kalaymyo nitlak lei Chinram he naihniam mi Ci Cai khua inn pakhat cung ah a tla i nu/pa pahnih an nunnak a liam.
July 13 zaan sml 8:22pm ah Kalaymyo hrambunh hriamngan battalion nih voi 7 tiang hriamngan an kah ruang ah Kalaymyo nitlak thlanglei khua Sekan khuapawng CiCai (Kawl min in Si San) khua inn pakhat ah hriamngan a tla i, Pu Lal Lian le Pi Lal Pek Hlu an nu/pa an thi. An fapa kum 3 zong a lu ah hliam a pu. Mah inn hmai um Nu pi pakhat zong hliam a tuar tiah theih a si.
Nihin August 11 Kalaymyo Kahdohnak Ah SAC Ralkap 4 An Thi. Nihin August 11, zinglei 7 in 10 hrawng tiang, Kalaymyo Myohla sang le Sekan khua kar ah SAC ralkap le tualchung hriamtlai phu kar kahdohnak a chuak i, kahdohnak ah SAC ralkap 4 an thi, tiah tualchung hriamtlai phu chungtel pakhat nih a chim.
Kahdohnak a chuah hnu ah Kalaymyo nitlak thlanglei ummi SAC ralkap nih hriamngan in Sekan khua Independent Presbyterian Church, Biakinn cu an kah i Biakinn zong a rawk ngai, tiah tualchung mi nih an chim. “Kahdohnak chung ah CDF KKG nih kuankham, phone le AK pakhat a laak. SAC ralkap 30 leng nih kee in Myohla lei an panh, Indaikone khua lei zong ah rallam an sial,” tiah tualchung hriamtlai phu chungtel pakhat nih a chim.
Nizan August 10 zong ah Indaikone khua lei i rallam a sialtu SAC ralkap hna cu tualchung hriamtlai phu nih an kah hna i Taung Oo khua in pyusawhti 7 an thi. Tualchung hriamtlai phu lei hliamhma tuarmi an um lo, tiah tualchung hriamtlai phu chungtel pakhat nih cun a chim.
Monywa Khuapi Ah Mifir Nih Inn Pakhat Luhhnawh In Naupawi Lio Nu Pakhat An Thah! Sagaing ramṭhen, Monywa khuapi Htantawinn sang um inn pakhat cu nizan August 10 zanlei suimilam 3:00 hrawngah mifir nih an luhhnawh i inn ngeitu naupawi lio, nau ngei deng cangmi nu pakhat cu an thah pinah a thilri zong an fir, tiah sangchung ummi hna nih an chim.
Mifir nih cun phone lung 2 le cycle pakhat zong an laak. Thah a tongmi naupawi lio nu hi atu August zarhhnihnak ah nau ngei ding a si, tiah an chim. Inn a luhhnawhtu mifir hna hi mizeidah an si ti cu hngalh an si lo. SAC nih nawlngeihnak an laak hnu in Monywa khuapi ah thilri fir le mi thah lainawnnak atu le tu a chuak, tiah theih a si.
A luancia January 20 lio zong ah Monywa khuapi Aungchanthar sang um Chanmya Thukhah eidin dawr cu mifir nih an rak luhhnawh i dawr ngeitu nuva hna cu nam in tuk an ton ruangah sii-inn an phan i a vapa cu a thi, tiah theih a si.
Gangaw Nitlaklei Ah Rallam A Sialmi SAC Ralkap Nih Tualchung Mi 4 An Thah Hna. Magway ramṭhen, Gangaw peng nitlaklei um khuate ah SAC ralkap pawl cu rallam an sial i tualchungmi 4 an thah hna, tiah theih a si. Gangaw khuapi Khah Lah Yah 50 in SAC ralkap 100 hrawng cu August 9 ah Gangaw nitlaklei khuate ah rallam an sial i, ralphaw hman dingin an tlaihmi tualchung mi pakhat le Daidin khuami 3 cu an thah hna, tiah tualchung mi hna nih an chim.
Rallam a sialmi SAC ralkap pawl cu nitlaklei Gangaw in August 10 zanlei suimilam 2:00 hrawngah Daidin khua chung ah an lut i khuami hna innlo an hrawh pinah an thilri zong an fir, tiah theih a si. SAC ralkap pawl cu Daidin khua sianginn ah August 10 ah umhmun an khuar i Daidin, nitlaklei Gangaw le Zahaw khua in tualchung mi 3,000 hrawng cu ralhrial in an zaam hna, tiah Special Ranger Force in ṭuanvo ngeitu pakhat nih a chim.
Monywa Ah Naupawi Nu A That Tu Pawl An Tlaih Cang Hna. Sagaing ramthen Monywa khuachung ah nau neih nak lai nithum lawng aa duh mi nu naupawi pakhat a that tu pawl hna cu tlaih an si cang tiah Monywa Generation Tigers tuanvo ngeitu pakhat nih a chim. August 10 zan suimilam 9 tluk ah mithat tu phu hna cu hmun pakhat ah Monywa-PDF le thangti phu hna nih luhhnawh in an tlaih hna hi a si.
“Sualnak a tuahtu hna hi dothlennak a thokka in hriamnam aa tlaih ve mi misual phu khat an si. Hi hna phu sin ah micheu khat zong an i tel hna. A thahnak a ruang zong a um ngaingai loh” tiah a cunglei PDF upa nih a chim.
Nu naupawi thah in an thilri a latu Monywa-gyui-kyi (မုံရွာကျွဲကြီး) misual phu minung 7 hna cu tlaih in hlathlainak an tuah lio hna i NUG cozah upadi ningin dantatnak tuah an si lai. Mah misual phu hna cu voidang zongah sualnak voi 3 nak tlawmlo a rak tuah bal cang.
August 10 zanlei suimilam 3 tluk ah Monywa khua Htan-daw sangchung um mi, nau a neih lainak ah nithum lawng aa duh cang mi Aye Nyein Thu (kum 24) cu misual 6 nih inn chung ah luhhnawh in a lu ah meithal in an kah caah a nunnak a liam. Hi inn ah um mi nu pakhat zong meithal kahnak in hliam a tuar i misual phu hna nih phone 2 le motor cycle lak in an zampi tiah kan theih. Credit: The Chinland Post, The Chin Post